• సీపీఐ (ఎం ఎల్) న్యూ డెమోక్రసీ జిల్లా నాయకురాలు వై గీత

వేద న్యూస్, వికారాబాద్:

‘బీసీ’ రిజర్వేషన్ బిల్లు ఆమోదానికి కేంద్ర, రాష్ట్ర ప్రభుత్వాల సమన్వయ కృషి అవసరమని, ఇరు ప్రభుత్వాలు సమన్వయంతో కృషి చేయాలని సీపీఐ (ఎం ఎల్) న్యూ డెమోక్రసీ జిల్లా నాయకురాలు వై గీత పేర్కొన్నారు. బిసి రిజర్వేషన్ బిల్లు రాజ్యాంగ సవరణకై తెలంగాణ రాష్ట్ర బంద్ సందర్భంగా వికారాబాద్ జిల్లా కేంద్రంలో బందులో శనివారం ఆమె పాల్గొని మాట్లాడారు. బిసి రిజర్వేషన్ బిల్లు అమలు కొరకు రాజ్యాంగ సవరణ కు కేంద్ర రాష్ట్ర ప్రభుత్వాలు సమన్వయంతో కృషి చేయాలని చెప్పారు. 

రాష్ట్ర గవర్నర్ కానీ అటు కేంద్ర ప్రభుత్వం కానీ పట్టించుకోకపోవడం వల్ల నోటికాడి ముద్దను లాగేసుకున్నట్లుగా బీసీ ప్రజానీకం పరిస్థితి ఉన్నదని వివరించారు. జనాభాలో 60 శాతం ఉన్న బీసీలు వివిధ రాజకీయ పార్టీల జెండాలు మోసే కార్యకర్తలు గానే కొనసాగుతున్నారని, రాజ్యాధికారం వైపు ప్రయాణించడం లేదని వివరించారు. 

రిజర్వేషన్ల అమలుతో నైనా బీసీలు అభివృద్ధి చెందే అవకాశం ఉన్నప్పటికీ.. అధికారంలో ఉన్న పాలకవర్గ పార్టీలు అందుకు కృషి చేయడం లేదని చెప్పారు. బీసీ రిజర్వేషన్ బిల్లు అమలు కు రాజ్యాంగ సవరణ చేసి తమ సామాజిక బాధ్యతను పాలకవర్గ పార్టీలు నిరూపించుకోవాలని కోరారు.

The post ‘బీసీ’ బిల్లు ఆమోదానికి..కేంద్ర, రాష్ట్ర ప్రభుత్వాల సమన్వయ కృషి అవసరం appeared first on VEDHA NEWS.

•  ప్రైవేటు డీలర్లకు అలాట్ అయిన యూరియా బ్లాక్ కు వెళ్తుందా..?
• నిగ్గు తేల్చాలని రైతుల డిమాండ్

వేద న్యూస్, నల్లబెల్లి:

రైతులకు మళ్లీ కష్టాలు ఆదిలోనే మొదలయ్యాయి. పంటను కంటికి రెప్పలా కాపాడుకోవడం ఒక ఎత్తు అయితే, పంటకు బూస్టర్ గా పనిచేసే యూరియా దొరకక, యూరియాను పట్టుకోవడం గగనమవు తున్నది. యూరియా వచ్చిందంటే చాలు.. యూరియా కోసం రైతులు క్యూ కట్టి రెండు మూడు రోజులు ఒక బస్తా కోసం వెంపర్లాడిన ఘటనలు జరిగాయి. ఇదే తంతు మళ్లీ వర్షం కాలం ప్రారంభం కాగానే మొదలవడంతో రైతులు ఆగ్రహం వ్యక్తం చేస్తున్నారు. పిఎసిఎస్ల ద్వారా, ఆగ్రోస్ ద్వారా ప్రభుత్వం పంపిణీ చేస్తున్నప్పటికీ మరి వివిధ కంపెనీలకు చెందిన ప్రైవేటు ఫర్టిలైజర్ షాప్ డీలర్లకు అలాట్ అయిన యూరియా ఎక్కడికి వెళుతుంది ?అక్కడ ఎందుకు ప్రతి రైతుకు యూరియా అందివ్వడం లేదని రైతులు.. వ్యవసాయ శాఖ తీరుపై దుమ్మెత్తి పోస్తున్నారు. ఇప్పుడిప్పుడే రైతులు మొక్కజొన్న, పత్తిలాంటి పంటలు వేసి యూరియా కోసం ఎదురుచూస్తున్న తరుణం లోనే యూరియా కొరత ఉండడంతో.. రైతులు ఆందోళన వ్యక్తం చేస్తున్నారు. వరి నాట్లు వేస్తే ఇంకా యూరియా డిమాండ్ పెరుగనున్న నేపథ్యంలో మళ్లీ పాత రోజులు వచ్చాయని గత ఘటనను అన్నదాతలు గుర్తు చేస్తున్నారు.

డీలర్లకు అలాట్ అయిన యూరియా ఎక్కడికెళ్తుంది…?

వ్యవసాయ శాఖ అధికారులు పిఎసిఎస్ సొసైటీలకు, ఆగ్రోస్ సేవా కేంద్రాల ద్వారా యూరియాను పంపిణీ చేస్తున్నప్పటికీ.. ప్రైవేటు డీలర్లకు అలాటైన యూరియా ఎక్కడికెళ్తుంది, బ్లాక్ మార్కెట్ కు తరలుతోందా, అధిక రేటు పలుకుతుందా,? లేదా యూరియా బస్తాకు మరేమైన పురుగుమందులు గుట్టు చప్పుడు కాకుండా కలిపేసి దగ్గర దగ్గర రైతులకు డీలర్లు అమ్ముతున్నారా? అని రైతులు సందేహం వ్యక్తం చేస్తున్నారు.

ప్రైవేటు ఫర్టిలైజర్ షాపులకు వచ్చిన యూరియా విషయంపై వ్యవసాయ శాఖ అధికారులు జిల్లా అధికారులు సమగ్ర విచారణ చేసి.. ఎక్కడికెళ్తుంది యూరియా ? అనేది పసిగట్టి చర్యలు తీసుకోకపోతే యూరియాను పెద్ద మొత్తంలో బ్లాక్ చేసే దందా నడుస్తున్నదని, ఇది వ్యవసాయ శాఖ అధికారులు డీలర్లకు మద్దతు పలకడంతోటే ఇలా జరుగుతుందని పలువురు రైతులు ఆగ్రహం వ్యక్తం చేస్తున్నారు.

నానో యూరియా తీసుకోవాల్సిందే

వ్యవసాయ శాఖ అధికారులతో పాటు ప్రభుత్వం పిఎసిఎస్ ద్వారా ఆగ్రోస్ ద్వారా యూరియాని పంపిణీ చేస్తూనే నానో యూరియా కొనాల్సిందేనని.. గట్టిగా బలవంతంగా రైతులను కొనేలా చేస్తున్నారు. నానో యూరియా పంటలకు వాడితే లాభాలు జరుగుతున్నప్పటికీ..రైతులకు అవగాహన లేకపోవడంతో అధికారులు పెట్టె ఇబ్బందుల వల్ల నానో యూరియా డబ్బాను కొనాల్సి వస్తుందని రైతులు అసహనం వ్యక్తం చేస్తున్నారు.

యూరియాకు బదులు నానో యూరియాను స్ప్రే చేయడం ద్వారా.. యూరియా బస్తా ఎంతయితే ఫలితం ఇస్తుందో.. నానో యూరియా సైతం పంటలకు బలం చేకూరుస్తున్నప్పటికీ రైతులకు సరైన రీతిలో అవగాహన లేకపోవడంతో వ్యవసాయ శాఖ రైతుల చేతిలో అభాసు పాలవుతు న్న దని పలువురు పేర్కొంటున్నారు.

The post యూరియాకు రైతుల క్యూ లైన్లు.. “ప్రైవేటు”గా బ్లాక్ చేస్తున్నారా!? appeared first on VEDHA NEWS.

• హైదరాబాద్ సెంట్రల్ వర్సిటీ అడవుల జీవవైవిధ్య విధ్వంసం పైన OWLS ఆధ్వర్యంలో రౌండ్ టేబుల్ సమావేశం

వేద న్యూస్, వరంగల్:

తెలంగాణ ప్రభుత్వం గత వారం రోజుల నుంచి రాష్ట్రంలోని హైదరాబాద్ సెంట్రల్ యూనివర్సిటీ (HCU) లో హైదరాబాద్ కు ఊపిరి అందిస్తున్న అడవిని, అడవి జంతువులను, వృక్షాలను, నీటి కుంటలను చట్టవిరుద్ధంగా 400 ఎకరాలను రాత్రికి రాత్రి నాశనం చేయడం దారుణం అని పలువురు పర్యావరణవేత్తలు పేర్కొన్నారు. హైదరాబాద్ సెంట్రల్ యూనివర్సిటీ కి సంబందించిన 400 ఎకరాల అడవి విధ్వంసం గురించి ఓరుగల్లు వైల్డ్ లైఫ్ సొసైటీ(OWLS) ఆధ్వర్యంలో హనుమకొండ నక్కలగుట్టలోని హరిత హోటల్ లో రౌండ్ టేబుల్ సమావేశం నిర్వహించారు.

ఈ చర్చా కార్యక్రమానికి ముఖ్య అతిథిగా మాజీ శాసనసభ్యులు దాస్యం వినయ్ భాస్కర్  హాజరై మాట్లాడుతూ ప్రపంచ స్థాయి ప్రమాణాలు గల హైదరాబాద్ సెంట్రల్ యూనివర్సిటీ లోని 400 ఎకరాల విస్తీర్ణంలో ఉన్న జీవులను ఛిద్రం చేస్తూ, చెట్లను, జీవుల ఆవాసాలను, నీటి వనరులను, పర్యావరణ చట్టాలను, అటవీ చట్టాలను, నీటి చట్టాలను తుంగలో తొక్కి కోర్టు ఆదేశాలను సైతం ఉల్లంఘిస్తూ అక్కడి జీవవైవిధ్యాన్ని నాశనం చేస్తున్న తెలంగాణ రాష్ట్ర ప్రభుత్వం పైన చట్టప్రకారంగా చర్యలు తీసుకోవాలని డిమాండ్ చేశారు.

సామాజిక బాధ్యతతో జీవ వైవిధ్య పరిరక్షణ కోసం పోరాటం చేస్తున్న విద్యార్థులపైన, ఇతరులపైన పెట్టిన అక్రమ కేసులను ఎత్తివేయాలని కోరారు. తాను పర్యావరణ పరిరక్షణ కోసం కట్టుబడి ఉన్నానని తెలిపారు.

మాజీ మేయర్ టి. రాజేశ్వరరావు మాట్లాడుతూ… మనిషి తన అస్తిత్వం కోసం ప్రకృతిని నాశనం చేయడం దారుణం అన్నారు. 400 ఎకరాలల్లో అడగని విధ్వంసం చేయడం ప్రభుత్వ ఏకపక్ష నిర్ణయమేనని పేర్కొన్నారు.  ప్రభుత్వ ప్రజా వ్యతిరేక విధానాలపై పౌర సమాజం పోరాడాలని పిలుపునిచ్చారు.

“ఓరుగల్లు వైల్డ్ లైఫ్ సొసైటీ” సంస్థ సభ్యులు మాట్లాడుతూ ప్రైవేటు వ్యక్తులతో కుమ్మక్కై రాష్ట్రప్రభుత్వం ఎన్నో సంవత్సరాల వయసు కలిగిన చెట్లను పీకివేస్తూ జింకలను, నెమళ్లను,వివిధ రకాల పక్షులను, షెడ్యూల్ 1,2,3,4, జాబితాలో గలిగిన జీవులను,నక్షత్ర తాబేళ్లను, ఉడుములను, పాములను, తొండలను జీవ వైవిధ్యం పరంగా ప్రాధాన్యత కలిగిన వివిధ రకాల జీవులను, నాశనం చేయడం అత్యంత దారుణమని పేర్కొన్నారు. ఈ సందర్బంగా HCU జీవవైవిధ్యం,  ప్రభుత్వం చేపట్టిన విధ్వంసంపై 10 నిమిషాల వీడియో అదేవిధంగా 30 నిమిషాల పవర్ పాయింట్ ప్రెజెంటేషన్ ను ఔల్స్ జాయింట్ సెక్రెటరీ రవిబాబు పిట్టల ప్రజెంట్ చేశారు.

వివిధ NGO’S ప్రతినిధులు మాట్లాడుతూ నీరు, భూమి, ఖనిజాలు, చెట్లు వంటివి పరిమిత వనరులు కాబట్టి  వాటిని బాధ్యతాయుతంగా ఉపయోగించాలన్నారు . సహజ వనరుల సంపద నశిస్తే రాబోయే తరాలకు మనుగడ సాగించడం ఒక సవాల్ గా మారుతుందని వెల్లడించారు.

భూమి ఆరోగ్యంగా ఉండాలంటే, అడవులను సంరక్షించుకోవాలని, ఊపిరితిత్తులు దెబ్బతింటే శరీరానికి ఎలా నష్టం కలుగుతుందో, అదే విధంగా అడవులు నాశనం అయితే వాతావరణ మార్పులు, వాయు కాలుష్యం, నీటి కొరత వంటి సమస్యలు ఏర్పడతాయని చెప్పారు. ఈ సందర్భం గాహైదరాబాద్ యూనివర్సిటీ విద్యార్థుల అక్రమ అరెస్టులను ముక్త ఖంఠంతో ఖండిస్తూ వారిని బేషరుతుగా విడుదల చేస్తూ వారిపైన పెట్టిన కేసులను వెంటలే ఎత్తివేయాలని ప్రభుత్వాన్ని కోరారు.

 కార్యక్రమంలో ఓరుగల్లు వైల్డ్ లైఫ్ సొసైటీ సంస్థ అధ్యక్షులు ఇందారం నాగేశ్వరరావు , సెక్రెటరీ చెల్పూరి శ్యాం సుందర్, జాయింట్ సెక్రెటరీ పిట్టల రవి బాబు, “టార్చ్” వ్యవస్థాపక అధ్యక్షులు అరవింద్ ఆర్య, వన సేవ ప్రతినిధులు పొట్లపల్లి వీరభద్రా రావు, నరేష్, పర్యావరణవేత్త రతన్ సింగ్, డాక్టర్ ప్రసాద్ ,నిమ్మ శ్రీనివాస్, నిఖిత, జేవీవీ సంస్థ ప్రతినిధి పరికిపండ్ల వేణు, కమలాకర్ స్వామి, కుమారి రాపోల్ నిఖిత, విద్యార్థి నాయకులు శరత్, రాకేష్ యాదవ్, బైరపాక ప్రశాంత్, శ్రీకాంత్ చారి, వీరస్వామి, అనిల్ తదితరులు వివిధ ఎన్జీవో సంస్థల ప్రతినిధులు పాల్గొని ఈ రౌండ్ టేబుల్ సమావేశాన్ని విజయవంతం చేశారు.

The post HCUలో 400 ఎకరాల విధ్వంసం దారుణం: పర్యావరణవేత్తలు appeared first on VEDHA NEWS.

 వేద న్యూస్, జమ్మికుంట:

ప్రభుత్వ డిగ్రీ కళాశాల జమ్మికుంట ఫ్యాకల్టీ ఫోరం నిర్వహణలో భాగంగా శుక్రవారం ” క్రిటికల్ అనాలసిస్ ఆఫ్ ఎన్ ఈపీ 2020 ది నీడ్ ఫర్ డికోడింగ్” అనే అంశంపై రసాయన శాస్త్ర అధ్యాపకులు ఎడమ శ్రీనివాస్ రెడ్డి ప్రసంగించారు.  ఇండిపెండెన్స్  అనంతరం అనేక విద్యా కమిషన్లు ఏర్పడ్డప్పటికీ సమగ్రమైన విద్యా కమిషన్లు మూడు అని అవి.. 1964 ఏర్పాటుచేసిన కొఠారి కమిషన్, 1986 నూతన విద్య విధానం, అలాగే నూతన విద్యా విధానం 2020, నూతన విద్య కమిషన్ 2020 కస్తూరిరంగన్ ఆధ్వర్యంలో ఏర్పడదని ఈ కమిషన్ మాతృభాషకు ప్రాధాన్యత ఇచ్చినప్పటికీ దాని అమలు ఎలా చేయాలో స్పష్టత కొరవడిందని అన్నారు.

ఈ విధానంలో విద్యార్థి డిగ్రీ అయిపోగానే నేరుగా పరిశోధన చేసుకునే వెసులుబాటు ఉందని అన్నారు. అభివృద్ధి చెందిన దేశాలలో ప్రాథమిక విద్య మొత్తం ప్రభుత్వ ఆధీనంలో ఉండి.. విద్యా లక్ష్యాలు సక్రమంగా నెరవేరుతున్నాయని చెప్పారు.విద్యార్థులను యంత్ర పరికరాలుగా తయారు చేయకుండా వారిలో ఉండే ప్రతిభను గుర్తించి వారి సృజనాత్మకతను వెలికి తీయవలసిన అవసరం ఉందని పేర్కొన్నారు. విద్య ప్రైవేటుపరమైతే మానవ విలువలు నశించిపోతాయని , విద్యా లక్ష్యాలు నెరవేరయని అన్నారు.

ప్రైవేటు రంగంలో ఉన్నప్పటికీ దానిపై నియంత్రణ తప్పనిసరిగా అవసరమని అన్నారు. లేనిపక్షంలో విద్యార్థులు యంత్ర పరికరాలుగా మారి వారిలో సృజనాత్మకత లేకుండా పోతుందని ఆవేదన వ్యక్తం చేశారు. అనంతరం ప్రిన్సిపాల్ డాక్టర్ డి .రాజశేఖర్ మాట్లాడుతూ ఇటువంటి కార్యక్రమాల ద్వారా జ్ఞానాన్ని పంచుకోవడం జరుగుతుందని తద్వారా విద్యార్థులకు మేలు జరుగుతుందని అన్నారు.
తర్వాత విద్యార్థులు,అధ్యాపకులు అడిగిన ప్రశ్నలతో చర్చ కొనసాగింది. సమావేశంలో అధ్యాపకులు డాక్టర్ ఎం రామ్మోహన్ రావు, రేణ ఈశ్వరయ్య, డాక్టర్ బి. సువర్ణ, డాక్టర్ వి. స్వరూపారాణి, మమత, డాక్టర్ పి. సుష్మ, డాక్టర్ ఎంబడి రవి , పి శ్రీనివాస్ రెడ్డి,దేవేందర్ రెడ్డి, ఎల్ రవీందర్ , సుధాకర్ ,అనూష, రమేష్, , ప్రశాంత్, సాయి కుమార్, అరుణ్ వి ద్యార్థులు పాల్గొన్నారు.

The post నూతన విద్యా విధానం 2020 పై అవగాహన కార్యక్రమం appeared first on VEDHA NEWS.

వేద న్యూస్, హన్మకొండ:

మన దేశంలోని బాల బాలికలు, గర్భిణులు, బాలింతలకు పౌష్టికాహారం అందించాలనే లక్ష్యంతో భారతప్రభుత్వం ‘అంగన్ వాడీ కేంద్రాల’ వ్యవస్థను ప్రవేశపెట్టింది. కేంద్ర, రాష్ట్ర ప్రభుత్వాలు ఈ వ్యవస్థ పట్ల ప్రత్యేక శ్రద్ధ వహిస్తుంటాయి. ‘అంగన్ వాడీ’ కేంద్ర సిబ్బందికి కేంద్ర, రాష్ట్ర ప్రభుత్వాలు తమ వాటా ప్రకారం వేతనాలు చెల్లిస్తుంటాయి. పౌష్టికాహారాన్ని అందించడంలో అంగన్ వాడీ టీచర్లు, హెల్పర్ల వ్యవస్థ కీలక పాత్ర పోషిస్తోంది. కాగా, హన్మకొండ జిల్లా శాయంపేట మండల పరిధిలోని నర్సింహులపల్లి గ్రామంలో అంగన్ వాడీ కేంద్రంలో పౌష్టికాహారం అందించాలనే లక్ష్యాన్ని నీరు గారుస్తున్నారని గ్రామస్తులు చర్చించుకుంటున్నారు.

సదరు అంగన్ వాడీ కేంద్రంలోని అవకతవకల గురించి బాహాటాంగానే ఊరి ప్రజలు ఆరోపిస్తున్నారు. గర్భిణులు, బాలింతలకు ఇవ్వాల్సిన పౌష్టికాహారాన్ని పక్కదారి పట్టిస్తున్నారని అంటున్నారు. తమ సొంత వాళ్లకు మాత్రమే గుడ్లు, ఇతర ఆహార సామగ్రి ఇస్తున్నారనే ఆరోపణలు వ్యక్తమవుతున్నాయి. పౌష్టికాహారం అందుతున్న తీరు గురించి ఇప్పటి వరకు గ్రామంలో కనీసంగా అధికారులు తనిఖీ చేసిన దాఖలాలు లేవని గ్రామస్తులు అంటున్నారు.

నూతన ప్రభుత్వ ‘ప్రజాపాలన’లో ‘ప్రత్యేక’ అధికారులు ఈ విషయమై దృష్టి సారించాలని కోరుతున్నారు. తనిఖీలు చేపట్టే నాథుడు లేక ఇలా ఇష్టారాజ్యంగా సదరు అంగన్ వాడీ కేంద్రంలో వ్యవహారాలు ఉంటున్నాయని అనుమానాలు కొందరు వ్యక్తం చేస్తున్నారు. ఇప్పటికైనా సంబంధించిన అధికారులు వెంటనే స్పందించాలని ఆ ఊరి ప్రజలు అంటున్నారు. అంగన్ వాడీ సెంటర్ పని తీరును పరిశీలించి తగు చర్యలు తీసుకోవాలని వేడుకుంటున్నారు.

The post పౌష్టికాహారం అందట్లే..నీరు గారుతున్న లక్ష్యం! appeared first on VEDHA NEWS.