•  మాతృమూర్తి ఆకలి ఆర్తనాదాలు బిడ్డలకు వినిపిస్తలేవో?
•  బుక్కెడు బువ్వకు భిక్కుభిక్కుమంటున్న గుండెకారి అంబక్క
•  మాయమైపోతున్నారమ్మా..కడుపున పుట్టిన సంతానమూ
•  వృద్ధురాలి సంరక్షణ మరిచిన బిడ్డలు..
•  ఠాణా మెట్లెక్కిన తల్లి.. న్యాయం చేయాలని వేడుకోలు

వేద న్యూస్, కమలాపూర్:
బాగోగులు చూసుకోవాల్సిన కుమారులు పట్టించుకోకపోవడంతో ఆ తల్లి దీనంగా కాలం వెల్లదీస్తున్న దుస్థితి.. ఆ మాతృమూర్తికి ఏడుగురు సంతానం అందులో నలుగురు కుమారులు. పింఛను డబ్బులు తీసుకుని అయినా సరే.. తనకు బుక్కెడు బువ్వ పెట్టాలని తల్లి వేడుకున్నా కొడుకుల్లో ఎవరూ ముందుకు రావకపోవడంతో.. ఆమె పరిస్థితి దయనీయంగా మారింది.

‘మాయమైపోతున్నడమ్మా మనిషన్న వాడు’ అని అందెశ్రీ రాసిన మాటలను ఆ తల్లి పుత్రరత్నాలు అక్షరాలా నిజం చేస్తున్నారు. కని పెంచిన తల్లికి తిండి పెట్టకుండా..ఆమెను క్షోభ పెడుతున్నారు.

అనారోగ్యంతో వంట చేసుకోలేని స్థితి

వివరాల్లోకెళితే..హనుమకొండ జిల్లా కమలాపూర్ మండలం శనిగరం గ్రామానికి చెందిన గుండెకారి అంబక్క అనే వృద్ధురాలి దీనగాధ ఇది. ఆమెకు ఏడుగురు సంతానం. అందులో నలుగురు కుమారులు, ముగ్గురు కూతుర్లున్నారు. ఇంతమంది ఉన్నా ఆ తల్లికి బుక్కెడు బువ్వపెట్టేవారే కరువయ్యారు.

ఆ తల్లి చిన్న కూతురు తన భర్త చనిపోయిన తర్వాత తన ఇద్దరు పిల్లలను తీసుకొని…పదేండ్ల క్రితం కమలాపూర్‌కి బ్రతుకుతెరువుకు వచ్చారు. అప్పుడు తన తల్లి అంబక్కను కూడా వెంటబెట్టుకుని..ఆనాటి నుంచి బాగోగులు చూసుకుంటూ వచ్చింది.

భర్త కోల్పోయిన ఆమెకు తన ఇద్దరు పిల్లల్ని పోషించడం, చదివించుకోవడమే కష్టంగా మారినా.. ఇన్ని రోజులు ఏదో ఒకలా వెళ్లదీసుకొచ్చింది. ఆర్థిక కారణాలరీత్యా ఆమె కూడా బతుకుదెరువు కోసమని హన్మకొండకు వెళ్లింది. దాంతో వృద్ధురాలు అంబక్క ఎలాగోలా కొంతకాలంగా నెట్టుకొస్తున్నది.

ఇటీవల కాలంలో ఆమెకు ఆరోగ్యం సహకరించక వంట కూడా చేసుకునే ఓపిక లేక గోస పడుతున్నది. వృద్ధురాలి పరిస్థితిని చూసి చలించిన మహిళా సంఘాల వీవోఏ పుల్ల బుజ్జమ్మ కొద్ది కాలం పాటు తన ఇంట్లో ఆశ్రయం కల్పించింది.

కానీ, రోజురోజుకూ ఆ వృద్ధురాలి ఆరోగ్యం ఇబ్బందిగా మారుతుండడంతో ఆమెను చూసుకునే వారే లేకుండా పోయారు. ఈ నేపథ్యంలోనే వృద్ధురాలు న్యాయం కోసం పోలీస్ స్టేషన్ మెట్లు ఎక్కింది. పోలీసులు, అధికారులు తనకు న్యాయం చేయాలని, తన కుమారులను పిలిపించి తనకు బుక్కెడు బువ్వ పెట్టించేలా చూడాలని ఆ వృద్ధురాలు వేడుకుంటున్నారు.
 

The post ఏడుగురిని కన్న తల్లికి ఏడుపే దిక్కా? appeared first on VEDHA NEWS.

వేద న్యూస్, కొండమల్లేపల్లి:

దీపావళి పండుగ రోజున నల్గొండ జిల్లాలోని కొండమల్లేపల్లిలో అత్యంత విషాదకర ఘటనచోటుచేసుకుంది. భార్యాభర్తల మధ్య తలెత్తిన గొడవల కారణంగా తీవ్ర మనస్తాపానికి గురైనఓ తల్లి.. తన ఇద్దరు చిన్నారులను గొంతు నులిమి చంపిన అనంతరం, తానూ ఉరివేసుకునిఆత్మహత్యకు పాల్పడింది.

ఈ దారుణ ఘటన సోమవారం తెల్లవారుజామున జరిగింది. మృతులను ఆంధ్రప్రదేశ్ రాష్ట్రంలోని బాపట్ల జిల్లా, జనగాల/జనకవరం గ్రామానికి చెందినకుంచాల నాగలక్ష్మి (27), ఆమె కుమార్తె అవంతిక (9), కుమారుడు భవన్ సాయి (7)గాపోలీసులు గుర్తించారు.

పూర్తి వివరాలు చూస్తే ఏపీకి చెందిన కుంచాల నాగలక్ష్మి, రమేష్దంపతులు నాలుగేళ్ల క్రితం బతుకు తెరువు కోసం నల్గొండ జిల్లా కొండమల్లేపల్లికి వలసవచ్చి నివాసం ఉంటున్నారు.

భార్యభర్తల మధ్య కొంతకాలంగా కుటుంబ కలహాలుజరుగుతున్నట్లు తెలుస్తోంది. ఈ గొడవల కారణంగానే నాగలక్ష్మి తీవ్ర ఆవేదనకు లోనై.. తనఇద్దరు పిల్లల గొంతు నులిమి హతమార్చింది.

అనంతరం ఇంట్లో ఫ్యాన్‌కు ఉరి వేసుకునిబలవన్మరణానికి పాల్పడింది. ఈ విషయం తెలుసుకున్న స్థానికులు పోలీసులకు సమాచారం అందించారు.

ఘటనాస్థలానికి చేరుకున్న పోలీసులు మృతదేహాలను పరిశీలించారు. కుటుంబ కలహాలే ఈదారుణానికి దారితీసినట్లు పోలీసులు ప్రాథమికంగా నిర్ధారించారు.

కేసు నమోదుచేసుకున్న కొండమల్లేపల్లి పోలీసులు.. పోస్టుమార్టం నిమిత్తం మృతదేహాలను స్థానికప్రభుత్వ ఆస్పత్రికి తరలించారు. పండుగ రోజున జరిగిన ఈ ఘోరం స్థానికంగా తీవ్రవిషాదఛాయలు నింపింది.

The post పండుగ పూట ఘోరం..! పిల్లలను చంపి తల్లి ఆత్మహత్య..? appeared first on VEDHA NEWS.

వేద న్యూస్, నల్లబెల్లి:

ఎక్సైజ్ కానిస్టేబుల్ గా విధులు నిర్వహిస్తున్న కొడుకు అక్రమాలపై విచారణ చేపట్టి తనకు న్యాయం చేయాలని దళిత వృద్ధురాలు బస్టాండులో నిరసన కార్యక్రమం చేపట్టింది. వరంగల్ జిల్లా నల్లబెల్లి మండల కేంద్రంలో ఈ ఘటన జరిగింది.

తల్లి, కుటుంబ సభ్యుల కథనం ప్రకారం .. మహబూబాబాద్ జిల్లా గూడూరు ఎక్సైజ్ పోలీస్‌ స్టేషన్‌లో కానిస్టేబుల్‌గా విధులు నిర్వహిస్తున్న లద్దునూరి యుగేందర్‌పై అతని తల్లి 70 ఏండ్ల లద్దునూరి సూరమ్మ  పలు ఆరోపణలు చేశారు. యుగేందర్, తన భార్య పరిపూర్ణతో కలిసి పెన్షన్ పేరుతో భూమిని అక్రమంగా రిజిస్ట్రేషన్ చేసుకున్నాడని విమర్శించింది. తన హక్కులను కాపాడి న్యాయం చేయాలని జిల్లా కలెక్టర్‌ను కోరారు. దళిత వృద్ధురాలిగా తాను అన్యాయానికి గురవుతున్నానని ఆవేదన వ్యక్తం చేశారు.

The post కసాయి ఖాకీ..! పింఛన్ పేరుతో పొలం అక్రమ రిజిస్ట్రేషన్.. తల్లి నిరసన! appeared first on VEDHA NEWS.

వేద న్యూస్, ఇబ్రహీంపట్నం:

ఇబ్రహీంపట్నం మండలం వర్షకొండలో ఆయుష్మాన్ ఆరోగ్య మందిరంలో బుధవారం తల్లిపాల వారోత్సవాలను ఘనంగా నిర్వహించారు. హెల్త్ సూపర్‌వైజర్ బి హేమలత, హెచ్ఈఓ కృపాకర్, ఎమ్ఎల్‌హెచ్‌పి బి గణేష్‌ హాజరై వేడుకలను ప్రారంభించారు. ఈ సందర్భంగా హెల్త్ సూపర్‌వైజర్ హేమలత మాట్లాడుతూ ఆగస్టు 1 నుండి 7 వరకు తల్లిపాల వారోత్సవాలు నిర్వహిస్తున్నామని తెలిపారు.

ఈ వారోత్సవాలలో భాగంగా పుట్టిన వెంటనే గంటలోపు బిడ్డకు ముర్రుపాలు పట్టించాలని, తల్లిపాలు పిల్లలకు రోగానిరోధక శక్తిని పెంచుతుందని వారు పేర్కొన్నారు. కాబట్టి పుట్టినప్పటి నుండి 6 నెలల వరకు కేవలం తల్లిపాలు మాత్రమే పిల్లలకు పట్టించాలని అన్నారు.

గర్భిణీలకు బాలింతలకు అవగాహన కల్పించేందుకు తల్లిపాల వారోత్సవాలు నిర్వహిస్తున్నామని తెలిపారు. తల్లిపాల వారోత్సవాలలో భాగంగా గర్భిణీ స్త్రీలకు సీమంతం, అన్నప్రాసన చేయడం జరిగింది. ఈ కార్యక్రమంలో ఏఎన్‌ఎమ్ భవానీ, ఆశా వర్కర్లు వినోద, ప్రమీల, వనిత, అంగన్వాడీ టీచర్లు చిన్న గంగు, త్రివేణి, పద్మావతి, నీలిమ, గర్భిణులు, బాలింతలు తదితరులు పాల్గొన్నారు.

The post వర్షకొండలో ఘనంగా తల్లిపాల వారోత్సవాలు appeared first on VEDHA NEWS.

వేద న్యూస్, జమ్మికుంట:
బిడ్డకు తల్లి అందించే అమృతం ముర్రుపాలు అని ఐసీడీఎస్ సూపర్‌వైజర్, అంగన్‌వాడీ టీచర్లు తల్లులకు అవగాహన కల్పించారు. తల్లిపాల వారోత్సవాలు వీణవంక మండల పరిధిలోని కొండపాక అంగన్ వాడీ  కేంద్రంలో శుక్రవారం నిర్వహించారు.

పుట్టిన వెంటనే బిడ్డకు ముర్రుపాలు తాగించాలని, ఆరు నెలల వరకు కేవలం తల్లిపాలు మాత్రమే ఇవ్వాలని,  రెండేండ్ల వరకు తల్లిపాలు కొనసాగించాలని  తల్లులకు సూచించారు. అనంతరం గర్భిణులకు సీమంతాలు చేశారు. కార్యక్రమంలో ఐసీడీఎస్ సూపర్ వైజర్ రమాదేవి, అంగన్ వాడీ  టీచర్స్ మాధవి, మల్లేశ్వరి,హెల్పర్లు, కార్యదర్శి పల్లె దవాఖాన డాక్టర్ జయంతి ఆశాలు పాల్గొన్నారు.

The post కొండపాక అంగన్‌వాడీ కేంద్రంలో ఘనంగా తల్లిపాల వారోత్సవాలు appeared first on VEDHA NEWS.

వేద న్యూస్, డెస్క్:

ఈ వీడియో చూస్తే మీ ఒళ్లు గగుర్పాటుకు గురవుతుందని చెప్పడంలో ఎలాంటి అతిశయోక్తి లేదు. ఓ తల్లి  బుజ్జి చిరుతను ముద్దాడుతున్న సమయంలో మరో మూడు నాలుగు చిరుత కూనలు ఒంటి మీదకు వస్తుంటే.. సాధారణంగా మనమైతే భయపడిపోతుంటాం. కానీ, ఆ మాతృమూర్తి మాత్రం ప్రేమతో సదరు చిరుత కూనలకు ప్రేమను పంచుతోంది. 

ఆకాంక్ష పర్మర్ అనే ‘ఎక్స్’ యూజర్ ఎక్స్ వేదికగా షేర్ చేసిన.. ఇందుకు సంబంధించిన వీడియో సోషల్ మీడియాలో తెగ వైరలవుతోంది. ‘‘సావిత్రమ్మ.. ద హీలింగ్ హ్యాండ్స్ ఆఫ్ ద జూ, ‘హార్ట్ ఆఫ్ ది జూ’ ’’ శీర్షికన ఆమె షేర్ చేసిన వీడియో చూసి నెటిజనాలు షాకవుతున్నారు. చిరుత పులులు వైల్డ్ గా ఉంటాయి కానీ, ఆమెకు(అమ్మ) మాత్రం కుటుంబమే అని పేర్కొంటున్నారు. ఈ వీడియో చూసి నెటిజన్లు రకరకాల కామెంట్స్ చేస్తున్నారు. రీట్వీట్ చేస్తున్నారు. పోస్టును మరింత వైరల్ చేస్తున్నారు.

వీడియోలో సావిత్రమ్మ తొలుత ఓ బుజ్జి చిరుతను దగ్గరకు తీసుకుని దాని నొసట మీద ముద్దిస్తూ.. ముద్దాడుతున్న క్రమంలో.. మరో రెండు బుజ్జి చిరుత కూనలు సావిత్రమ్మ చీర చింగుల నుంచి ఒడిలోకి వచ్చేందుకు ఎగురుతుండటం గమనించొచ్చు. అదే సమయంలో మరో చిరుత.. కర్రపైకి వెక్కి.. సావిత్రమ్మ వీపుమీదకు వస్తుండటం పరిశీలించొచ్చు.  అమ్మ తన బిడ్డలతో ఎలా సమయం గడుపుతుందో.. అలా సదరు తల్లి సావిత్రమ్మ.. చిరుత కూనలకు తల్లిగా ఆలంబనగా నిలుస్తోందని నెటిజన్లు పోస్టులు పెడుతున్నారు.

https://x.com/iAkankshaP/status/1934800601952449022

The post సూపర్ మామ్.. సావిత్రమ్మ.. చిరుత పులులను ఒడిలోకి తీసుకుని ముద్దాడుతున్న తల్లి appeared first on VEDHA NEWS.

వేద న్యూస్, జమ్మికుంట:
జమ్మికుంట పట్టణానికి చెందిన అన్నదమ్ములు మాతృమూర్తిపై తమ ప్రేమను చాటుకున్నారు. తల్లికి ఎప్పటికీ గుర్తుండి పోయేలా ఒక గుడి కట్టించారు.
జమ్మికుంట మున్సిపల్ పరిధిలోని ధర్మారం 2వ వార్డు కు చెందిన సముద్రాల రాధమ్మ (59) మూడేండ్ల క్రితం కరోనా బారిన పడి అకాల మరణం చెందారు. రాధమ్మ కు భర్త సైదయ్య, ముగ్గురు కుమారులు సముద్రాల నందకుమార్, విజయ్ కుమార్, కిరణ్ కుమార్, కూతురు మంద సంతోష సంతానం. మనవలు, మనవరాళ్లతో ఎప్పుడు సంతోషంగా ఉన్న ఈ పెద్దకుటుంబలో కరోనా రూపంలో రాధమ్మను మృత్యువు కబళించింది.

ముగ్గురు అన్నదమ్ములు ఉమ్మడిగా ఉంటూ తల్లి తండ్రులే మనకు మొదటి దేవుళ్లు అని భావించి వారి తల్లి కి ఎప్పటికీ గుర్తుండి పోయేలా ఒక గుడి కట్టించారు. ప్రతి సంవత్సరం వారి తల్లి చనిపోయిన రోజున వారి ఆత్మకు శాంతిచేకూర్చాలని..కుటుంబసబ్యులందరూ దాదాపు 25 మంది సభ్యులు ఒకేదగ్గర వారి జ్ఞాపకార్ధం నివాళులు అర్పించి ఒక వేడుకగా చేసుకుంటారు. తల్లిని దైవంగా భావించి ఒక గుడిలా నిర్మించుకోవడం పట్ల పట్టణవాసులు హర్షం వ్యక్తం చేశారు.
 

The post తల్లికి ఆలయం.. మాతృమూర్తిపై ప్రేమను చాటుకున్న తనయులు appeared first on VEDHA NEWS.