వేద న్యూస్, ఆసిఫాబాద్ ప్రతినిధి:

తపాలా శాఖ పథకాలను ప్రతి ఒక్కరు సద్వినియోగం చేసుకోవాలని ఆ శాఖ జిల్లా అధికారి గుంప స్వామి అన్నారు.
బెజ్జూరు గ్రామానికి చెందిన రంగయ్య ఇటీవల అనారోగ్య సమస్యలతో మృతి చెందాడు.
రంగయ్య మూగవెల్లి బ్రాంచ్ పోస్ట్ ఆఫీస్ నుండి ఇండియా పోస్ట్ పేమెంట్స్ బ్యాంక్ ద్వారా పాలసీ తీసుకోగా నామిని తారాబాయి (మృతుని భార్య) కి రూపాయలు రెండు లక్షలు చెక్కుని వారికి అందజేశారు.ఈ సందర్భంగా ఆయన మాట్లాడుతూ పిఎంజె జెబివై యాక్సిడెంట్ పాలసీ, ఇతర పోస్టల్ పథకాలని సద్వినియోగం చేసుకోవాలని తెలియజేశారు. ఈ కార్యక్రమంలో కాగజ్ నగర్ పోస్టల్ ఇన్స్పెక్టర్ సతీష్ ,(ఐపిపిబి) సీనియర్ మేనేజర్ శ్రీనివాస్ ఇతర పోస్టల్ సిబ్బంది పాల్గొన్నారు.

The post తపాలా శాఖ పథకాలను సద్వినియోగం చేసుకోవాలి appeared first on VEDHA NEWS.

వేద న్యూస్, హైదరాబాద్/చార్మినార్:
వినియోగదారులు లేకుండా వ్యాపార రంగాల అభివృద్ధి సాధ్యం కాదని, అందుకే ఎల్లప్పుడూ నాణ్యతా ప్రమాణాలకు లోబడి, వారికి ఉత్తమ వస్తుసేవలను అందించాలని బిఐఎస్ పూర్వ అధ్యక్షులు ఎ.పి. శాస్త్రి అన్నారు. మార్చి 15 ప్రపంచ వినియోగదారుల దినోత్సవం సందర్భంగా సిటీ కాలేజి స్టాండర్డ్ క్లబ్, బ్యూరో ఆఫ్ ఇండియన్ స్టాండర్డ్స్(బీఐఎస్) సంయుక్తంగా సదస్సు సోమవారం నిర్వహించాయి.

ఈ సదస్సులో ఆయన అతిథిగా పాల్గొని మాట్లాడుతూ టెక్నాలజీ సేవలు విస్తృతంగా పెరుగుతున్న నేపథ్యంలో 2024 వ సంవత్సరానికి ‘వినియోగదారుల కోసం న్యాయమైన మరియు బాధ్యతాయుతమైన ఆర్టిఫీషియల్ ఇంటలిజెన్స్’ అనే నినాదాన్ని ఐక్యరాజ్యసమితి ప్రకటించిందని తెలిపారు.

విద్యార్థులు ఈ విషయమై విషయ పరిజ్ఞానం పెంచుకోవటమే కాక తమ ఇంట్లోని వారికి, తెలిసిన వారికి అవగాహన కలిగించాలని సూచించారు. వినియోగదారులుగా తమ హక్కులకు భంగం వాటిల్లినా, మార్కెట్ దుర్వినియోగాలకు వ్యతిరేకంగా నిరసన తెలపాలని పేర్కొన్నారు.

స్టాండర్డ్ క్లబ్ మెంటర్ డా.వై.వాసుదేవ రెడ్డి సమన్వయం చేసిన ఈ కార్యక్రమంలో కామర్స్ విభాగం అధ్యక్షులు డా.రత్న ప్రభాకర్ మాట్లాడుతూ వినియోగదారుల హక్కుల గురించి అందరికీ అవగాహన ఉండాలని, వాటికి భంగం కలిగితే వినియోదారుల ఫోరంలో న్యాయం పొందొచ్చని వెల్లడించారు. సదస్సు అనంతరం నిర్వహించిన వ్యాసరచన పోటీలో గెలిచిన పూజ మీనా, కావ్య, జగదీష్, నాగు, ఉదయ్ కిరణ్, మురళీ కృష్ణ తదితర విద్యార్ధులకు రూ.15,000 నగదు బహుమతులను అందజేశారు.
 

The post డిజిటల్ వస్తుసేవల వినియోగంపై అవగాహన appeared first on VEDHA NEWS.

వేద న్యూస్, డెస్క్ :

దేశ రాజకీయాల్లో డాక్టర్ బాబు జగ్జీవన్‌ రామ్ సేవలు మరువలేనివని, ఆయన స్ఫూర్తితో అట్టడుగు వర్గాల అభ్యున్నతి కోసం కాంగ్రెస్ ప్రభుత్వం కృషి చేస్తుందని ముఖ్యమంత్రి రేవంత్ రెడ్డి అన్నారు.హైదరాబాద్‌ బంజారాహిల్స్‌లో డాక్టర్ బాబు జగ్జీవన్‌రామ్ భవన్‌ను సీఎం తన చేతుల మీదుగా ప్రారంభించారు. ఈ సందర్భంగా జగ్జీవన్‌రామ్ నిలువెత్తు చిత్రపటానికి సీఎం పుష్పాంజలి ఘటించారు.

ఈ సందర్భంగా సిఎం మాట్లాడుతూ గతంలో రెసిడెన్షియల్ స్కూల్స్, ఇళ్లు ఎస్సీ, ఎస్టీ, బీసీ, మైనార్టీలకు విడివిడిగా ఉండేవని, ప్రస్తుతం దళితులు, గిరిజనులు, బీసీ మైనార్టీలందరికీ ఒకేచోట ఇందిరమ్మ ఇండ్లు కేటాయించేలా అధికారులను ఆదేశించినట్లు తెలిపారు. ప్రతి నియోజకవర్గంలో ఒకే క్యాంపస్‌లో గురుకులాలన్నీ ఉండేలా ఏర్పాటు చేసి, కులాల మధ్య అంతరాలు చెరిపేయాలనుకుంటున్నామని స్పష్టం చేశారు. అందుకోసం పైలట్ ప్రాజెక్టుగా కొడంగల్‌లో శంకుస్థాపన చేశామని సీఎం చెప్పారు.

చదువు మీద పెట్టేది ఖర్చు కాదు పెట్టుబడని, విద్యార్థులు బాగా చదువుకుంటేనే ఉన్నత శిఖరాలను అధిరోహిస్తారని అన్నారు. ఆర్‌ఎస్‌ ప్రవీణ్‌కుమార్, ఆకునూరి మురళి లాంటి వారికి చదువుకుంటేనే గుర్తింపు, గౌరవం వచ్చాయని ఆయన అన్నారు.

లోక్‌సభ స్పీకర్‌గా తెలంగాణ బిల్లును ఆమోదించింది జగ్జీవన్‌రామ్ కూతురు మీరాకుమారి అని, తెలంగాణ రాష్ట్రమంతా ఆమెను ఎప్పుడూ గుర్తు చేసుకుంటుందని కొనియాడారు.కాలం ఎప్పుడూ ఒకేలా ఉండదని, ఒకసారి దొరల చేతిలో ఉంటే, ఒకసారి దళితుల చేతుల్లో ఉంటుందన్నారు. దొరలకు ఇష్టం ఉన్నా లేకున్నా అసెంబ్లీలో గడ్డం ప్రసాద్‌ను అధ్యక్షా అని పిలవాల్సిందేనని సీఎం రేవంత్ తెలిపారు.

కొందరు కాంగ్రెస్ ఏం చేసిందని ప్రశ్నిస్తున్నారని, అసలు ఆ ప్రశ్నించే హక్కు, అధికారం కల్పించింది కాంగ్రెస్ పార్టీనేనని తెలిపారు. చదువును ఎవరూ నిర్లక్ష్యం చేయవద్దని, చదువే లక్ష్యంగా పెట్టుకుని ఉన్నత శిఖరాలకు ఎదగాలని సీఎం రేవంత్ రెడ్డి ఆకాంక్షించారు.

The post డాక్టర్ బాబు జగ్జీవన్‌ రామ్ సేవలు మరువలేనివి: సీఎం రేవంత్ appeared first on VEDHA NEWS.

వేద న్యూస్, మందమర్రి:

పెద్దపల్లి మాజీ పార్లమెంట్ సభ్యుడు, దివంగత నేత గడ్డం వెంకటస్వామి (కాకా) ప్రజలకు చేసిన సేవలు మరువలేనివని పట్టణ కాంగ్రెస్ అధ్యక్షుడు నోముల ఉపేందర్ గౌడ్, జిల్లా కాంగ్రెస్ నాయకులు సోత్కు సుదర్శన్, పుల్లూరు లక్ష్మణ్ లు తెలిపారు. కాకా వెంకటస్వామి 9వ వర్ధంతి సందర్భంగా శుక్రవారం పట్టణంలోని సింగరేణి మనోవికాస్ పాఠశాల విద్యార్థులకు పండ్ల, బ్రెడ్ పంపిణీ చేశారు.

ముందుగా పాఠశాల ఆవరణంలో కాంగ్రెస్ శ్రేణులు కాకా వెంకటస్వామి చిత్రపటానికి పూలమాలు వేసి, ఘనంగా నివాళులు అర్పించారు. అనంతరం వారు మాట్లాడుతూ, మొట్టమొదటి తెలంగాణ ఉద్యమంలో పాల్గొన్న ఆయన పోలీస్ బుల్లెట్ గాయాన్ని సైతం లెక్కచేయకుండా తెలంగాణ ప్రత్యేక రాష్ట్రం కోసం పోరాడిన గొప్ప నాయకుడని కొనియాడారు. అదే విధంగా హైదరాబాద్ నగరంలో ఇల్లు లేని పేదలకు సుమారు 80వేల మందికి ఇల్లు ఇప్పించిన ఘనత కాకా వెంకటస్వామికి దక్కుతుందని తెలిపారు.

సింగరేణి సంస్థ నష్టాల్లో కూరుకుపోయి దివాలా తీసే దశలో ఉండగా సంస్థకు వందల కోట్ల ఇప్పించి సంస్థను కాపాడిన గొప్ప నాయకుడని, అదేవిధంగా సింగరేణి కార్మికులకు రిటైర్మెంట్ అయ్యాక వారి జీవితాలకు ఇబ్బంది కలగకుండా ఉండేందుకు పెన్షన్స్ స్కీంను సైతం అమలు చేయించిన ఘనత కాకా వెంకటస్వామికి దక్కుతుందని తెలిపారు. ఎల్లప్పుడూ కార్యకర్తలను కంటికి రెప్పల కాపాడుకున్న గొప్ప నాయకుడు కాకా వెంకటస్వామి అని కొనియాడారు.

ప్రతి ఒక్కరూ ఆయనను ఆదర్శంగా తీసుకొని, ఆయన ఆశయాలను కొనసాగించాలని పిలుపునిచ్చారు. ఈ కార్యక్రమంలో కాంగ్రెస్ పార్టీ ఎస్సీ సెల్ పట్టణ అధ్యక్షుడు నేరువట్ల శ్రీనివాస్, ప్రధాన కార్యదర్శి మండ భాస్కర్, ఐఎన్టియుసి నాయకులు దేవి భీమయ్య, కాంగ్రెస్ నాయకులు పైడిమల్ల నర్సింగ్, మంద తిరుమల్ రెడ్డి, నామిని ముత్తయ్య, ఎండీ పాషా, తిరుపతి తదితరులు పాల్గొన్నారు.

The post కాకా సేవలు మరువలేనివి appeared first on VEDHA NEWS.