•  ఎంబీబీఎస్‌లో గోల్డ్ మెడల్ అందుకున్న డాక్టర్ అనిత
•  ఎంఎస్ జనరల్ సర్జన్‌గానూ పట్టా పొందిన వైద్యురాలు
•  ఎన్నో రకాల ఆపరేషన్లు చేసి రోగులకు పునర్జన్మ ప్రసాదించిన డాక్టర్

వేద న్యూస్, జమ్మికుంట:

సింగరేణి ప్రాంతం నుంచి వచ్చిన వారు ప్రపంచంలో ఎక్కడైనా రాణిస్తారనే నానుడిని అక్షరాలా నిజం చేస్తున్నారు డాక్టర్ అనిత కొత్త. వైద్యం అంటే సేవ చేయడమేననే లక్ష్యంతోనే ఆమె ముందుకు సాగుతున్నారు. తెల్లకోటు ధరించి ప్రజలకు సేవ చేయాలనే ఆలోచన, ఆశయానికి చిన్ననాటనే ఆమె మనసులో బీజం పడింది. తండ్రి సింగరేణిలో పని చేస్తూ..అలసిపోయి ఇంటికి వస్తుండటం బాల్యంలోనే గమనించింది. గని కార్మికులకు తరచూ ఆరోగ్య సమస్యలు వస్తుండటంతో వారిని హైదరాబాద్‌కు పంపేవారు. ఈ నేపథ్యంలోనే వైద్యురాలు కావాలని తండ్రి ప్రేరణతో అనిత.. చదువులో ఎంతో ప్రతిభ కనబరిచి ముందుకు సాగారు. తన కల సాకారానికి కష్టపడి చదివారు. వైద్య చదువులో గోల్డ్ మెడల్ సంపాదించిన అనిత.. కొంత కాలం పాటు సింగరేణి కాలరీస్ కంపెనీ హాస్పిటల్‌లో వైద్య సేవలు అందించడం విశేషం. వృత్తిలో నైపుణ్యాన్ని సంపాదించిన డాక్టర్ అనిత.. సేవాభావాన్ని ఆచరణలో చూపిస్తూ ఆదర్శంగా నిలుస్తున్నారు.

బెస్ట్ డాక్టర్‌గా గుర్తింపు

గోదావరిఖనికి చెందిన శంకరయ్య-లక్ష్మీ దంపతులకు 1987, మే 1న కార్మిక దినోత్సవం రోజున అనిత జన్మించారు. సింగరేణి కాలరీస్ కంపెనీలో ఉద్యోగం చేస్తున్న శంకరయ్య దంపతులకు కార్మిక దినోత్సవం రోజున కూతురు పుట్టడంతో అంతులేని ఆనందంతో ఆ కుటుంబం మురిసిపోయింది. ఇక చిన్ననాటనే తన లక్ష్యాన్ని నిర్దేశించుకున్న ఆమె..చదువుల్లో ఎంతో ప్రతిభ కనబర్చారు.

అనిత విద్యాభ్యాసం మొత్తం గోదావరిఖని‌లో జరిగింది. ఇంటర్మీడియెట్ విజయవాడలో చదివిన ఆమె..శ్రీ వేంకటేశ్వర యూనివర్సిటీలో గవర్నమెంట్ మెడికల్ కాలేజీలో ఎంబీబీఎస్ పూర్తి చేశారు. ఆ సమయంలో ప్యాతాలజీ విభాగంలో గోల్డ్ మెడల్ అందుకున్నారు.

అనంతరం అదే వర్సిటీలో ఎంఎస్ జనరల్ సర్జన్‌గా పట్టా పొందారు. ఆ తర్వాత ప్రపంచ ప్రఖ్యాతి గాంచిన వరల్డ్ ల్యాపరోస్కోపీ సెంటర్‌లో శిక్షణ పొందారు. అది మొదలు ఎన్నో రకాల ఆపరేషన్లు చేశారు. ఈ క్రమంలోనే ప్రజల్లో బెస్ట్ డాక్టర్‌గా గుర్తింపు పొందారు. ఎంతో మంది రోగులకి పునర్జన్మ ప్రసాదించారు. మానవత్వానికి, సేవకు మారుపేరు అయిన పవిత్ర వైద్య వృత్తిలో ఉత్తమ వైద్య సేవలందిస్తూ ముందుకు సాగుతున్నారు.

కొంత కాలం పాటు సింగరేణి కాలరీస్ కంపెనీ హాస్పిటల్‌లో వైద్య సేవలు అందించారు. అనంతరం కుటుంబరీత్యా జమ్మికుంట‌కు వచ్చి తన సేవలు సంజీవని మల్టీస్పెషాలిటీ ఆసుపత్రి‌లో కొనసాగిస్తున్నారు. ఎంఎస్, ఎఫ్ఎంఏఎస్..డాక్టర్ అనిత కొత్త జీవిత భాగస్వామి కూడా డాక్టరే. అనిత భర్త డాక్టర్ ఊడుగుల సురేశ్ ఎండీ జనరల్ ఫిజీషియన్‌గా ‘సంజీవని’ ఆస్పత్రిలో వైద్య సేవలు అందిస్తున్నారు.

The post నాన్న ప్రేరణతో.. తెల్లకోటు ధరించి ప్రజా సేవలో డాక్టర్ అనిత  appeared first on VEDHA NEWS.

•  మౌలిక అవసరాలు, ఉపాధి కల్పనకు తన వంతు కృషి
•  సామాజికవేత్త వెంకట్ ఇంటికి జనం బాట
•  హుజూరాబాద్ నియోజకవర్గంతో పాటు ఇతర ప్రాంతాల నుంచి రాక

వేద న్యూస్, హుజూరాబాద్ ప్రతినిధి:

హుజూరాబాద్ నియోజకవర్గ పరిధిలో నాయకత్వానికి సరికొత్త నిర్వచనాన్ని ఇస్తున్నారు సామాజికవేత్త సబ్బని వెంకట్. ప్రజల అభివృద్ధికి అవసరమయ్యే పనులు తన శక్తి మేరకు చేస్తూ సరికొత్త ఒరవడికి శ్రీకారం చుట్టారు. దాంతో వెంకట్ తన స్వగ్రామం సిర్సపల్లికి వస్తారనే సమాచారం తెలియగానే జనం ఆయన ఇంటి బాట పడుతున్నారు. తమ సమస్యలు పరిష్కరించాలని దరఖాస్తులు సమర్పిస్తున్నారు.

మల్టీ నేషనల్ కంపెనీ ‘జెన్‌ప్యాక్ట్’ వైస్ ప్రెసిడెంట్‌గా ఉన్న సబ్బని వెంకట్ ఇప్పటికే ఎంతో మందికి ఉద్యోగ, ఉపాధి అవకాశాలు కల్పించారు. ఈ నేపథ్యంలోనే ప్రజలు మంచిర్యాల, గోదావరిఖని, కరీంనగర్‌తో పాటు ఇతర ప్రాంతాల నుంచి సబ్బని వెంకట్ వద్దకు వస్తున్నారు. హుజూరాబాద్ నియోజకవర్గ ప్రజలకు మాత్రమే కాకుండా తన వద్దకు వచ్చిన వారందరికీ ఆపన్న హస్తం అందించేందుకు ముందు వరుసలో వెంకట్ నిలబడుతున్నారు.

తన టీం ద్వారా విస్తృతంగా ప్రజలకు అండగా నిలిచే ప్రయత్నం చేస్తున్నారు. యువతకు ఉపాధి కల్పనకు భరోసానిస్తున్నారు. పిల్లల చదువుకు సంబంధించి విద్యా సంస్థల యజమానులతో మాట్లాడుతూ..ఆరోగ్యం విషయమై ఆస్పత్రుల వారితో మాట్లాడుతూ జనానికి సమస్యల పరిష్కారానికి వెంకట్ భరోసానిస్తున్నారు.

నాయకుడిగా ప్రజలకు విద్య, వైద్యం పరంగా వెంకట్ సాయం అందిస్తుండటం పట్ల ప్రజలు సంతోషం వ్యక్తం చేస్తున్నారు. వెంకట్ అందిస్తున్న సేవలతో అన్ని వర్గాల ప్రజల్లో సానుకూల చర్చ జరుగుతోంది. సామాజికవేత్తగా నిస్వార్థంగా సేవలందిస్తున్న వెంకట్ మాదిరిగా నాయకులు సైతం పనులు చేయాలని పలువురు కోరుతున్నారు.

The post నాయకత్వానికి సరికొత్త నిర్వచనం ‘సబ్బని’ appeared first on VEDHA NEWS.

•  సింగరేణి సీఎండీకి సీఐటీయూ ప్రతినిధి బృందం వినతి

వేద న్యూస్, మందమర్రి:

సింగరేణి వ్యాప్తంగా పనిచేస్తున్న కాంట్రాక్ట్ కార్మికుల సమస్యలు పరిష్కారానికి చొరవ చూపాలని సింగరేణి సిఎండి ఎన్ బలరాం నాయక్ (ఐఆర్ఎస్) ను సింగరేణి కాంట్రాక్ట్ కార్మికుల సంఘం సిఐటియు ప్రతినిధి బృందం కోరింది. గురువారం హైదరాబాద్ లోని సింగరేణి భవన్లో సింగరేణి నూతన చైర్మన్, మేనేజింగ్ డైరెక్టర్ గా బాధ్యతలు చేపట్టన బలరాం నాయక్ ను గురువారం మర్యాదపూర్వకంగా కలిసి, శుభాకాంక్షలు తెలిపారు.

ఈ సందర్భంగా వారు మాట్లాడుతూ, సింగరేణి వ్యాప్తంగా కాంట్రాక్ట్ కార్మికుల వేతనాల పెంపుదల, వారు ఎదుర్కొంటున్న సమస్యలు అదేవిధంగా గత సంవత్సరం సెప్టెంబర్ లో చేసిన ఒప్పందంలోని మిగల అంశాలు అమలు చేయించడంలో చొరవ తీసుకొని, కాంట్రాక్ట్ కార్మికుల సమస్యలు పరిష్కరించాలని కోరారు.

ఈ మేరకు సీఎండి కి వినతి పత్రం అందజేశారు. స్పందించిన సిఎండి కాంట్రాక్ట్ కార్మికులకు 30లక్షల రూపాయల భీమా అమలు చేస్తామని, ఇఎస్ఐ అమలు కోసం కృషి చేస్తామని, అదేవిధంగా వేతనాల పెంపుదల, ఇతర సమస్యల పరిష్కారానికి కృషి చేస్తామని, కాంట్రాక్ట్ కార్మికులకు మంచి భవిష్యత్తు కల్పిస్తామని హామీ ఇచ్చినట్టు తెలిపారు. సిఐటియు ప్రతినిధి బృందంలో యూనియన్ రాష్ట్ర ప్రధాన కార్యదర్శి బి మధు, రాష్ట్ర కమిటీ సభ్యులు మల్లేష్ తదితరులున్నారు.

The post కాంట్రాక్ట్ కార్మికుల సమస్యల పరిష్కారానికి చొరవ చూపండి appeared first on VEDHA NEWS.

వేద న్యూస్, మంచిర్యాల ప్రతినిధి:

సింగరేణి గుర్తింపు కార్మిక సంఘం ఎన్నికల్లో భాగంగా బుధవారం మందమర్రి ఏరియాలో ఎన్నికలు ప్రశాంతంగా ముగిశాయి. ఉదయం 7 గంటల నుండి ఓటింగ్ ప్రక్రియ ప్రారంభం కాగా సాయంత్రం 5 గంటల వరకు పోలింగ్ కొనసాగింది. ఏరియాలో 4835 మంది కార్మికుల గాను 11 పోలింగ్ బూతులు ఏర్పాటు చేయగా, 4515 మంది కార్మికులు తమ ఓటు హక్కును వినియోగించడంతో పోలింగ్ 93.38శాతంగా నమోదయింది.

ఓటింగ్ అనంతరం బుధవారం సాయంత్రం పట్టణంలోని సిఈఆర్ క్లబ్ లో కౌంటింగ్ ప్రక్రియ ప్రారంభం కానుంది. అనంతరం రాత్రి వరకు ఫలితాలు వెల్లడి కానున్నాయి. అదేవిధంగా సింగరేణి వ్యాప్తంగా 39,805 మంది ఓటర్లకు గాను 37, 451మంది కార్మికులు తమ ఓటు హక్కును వినియోగించుకోవడంతో 95శాతం పోలింగ్ శాతం నమోదయింది. ఆర్జీ 1 ఏరియాలో 5384 మంది గాను 5044 మంది ఓటు హక్కు వినియోగించుకోవడంతో 93.70శాతం పోలింగ్ శాతం నమోదయింది.

ఆర్జీ 2 ఏరియాలో 3556 మంది గాను 3369 మంది ఉద్యోగులు ఓటు హక్కు వినియోగించుకోవడంతో 94.74శాతం పోలింగ్ శాతం నమోదయింది. ఆర్జీ 3 ఏరియాలో 3884 మంది గాను 3612 మంది ఉద్యోగులు ఓటు హక్కు వినియోగించుకోవడంతో 93శాతం పోలింగ్ శాతం నమోదయింది.

భూపాలపల్లి ఏరియాలో 5442 మంది గాను 3369 మంది ఉద్యోగులు ఓటు 5123 వినియోగించుకోవడంతో 94.13శాతం పోలింగ్ శాతం నమోదయింది. బెల్లంపల్లి ఏరియాలో 996 మంది గాను 959 మంది ఉద్యోగులు ఓటు హక్కు వినియోగించుకోవడంతో 96.30శాతం పోలింగ్ శాతం నమోదయింది. శ్రీరాంపూర్ ఏరియాలో 9127 మంది గాను 8491 మంది ఉద్యోగులు ఓటు హక్కు వినియోగించుకోవడంతో 93శాతం పోలింగ్ శాతం నమోదయింది.

కొత్తగూడెం ఏరియాలో 2326మంది గాను 2207 మంది ఉద్యోగులు ఓటు హక్కు వినియోగించుకోవడంతో 94.88శాతం పోలింగ్ శాతం నమోదయింది. ఎల్లందు ఏరియాలో 614మంది గాను 604 మంది ఉద్యోగులు ఓటు హక్కు వినియోగించుకోవడంతో 98.37శాతం పోలింగ్ శాతం నమోదయింది. మణుగూరు ఏరియాలో 2450 మంది గాను 2378 మంది ఉద్యోగులు ఓటు హక్కు వినియోగించుకోవడంతో 97.06శాతం పోలింగ్ శాతం నమోదయింది.

కార్పొరేట్ లో 1149 మంది గాను 1191 మంది ఉద్యోగులు ఓటు హక్కు వినియోగించుకోవడంతో 96.47శాతం పోలింగ్ శాతం నమోదయింది.

సింగరేణి వ్యాప్తంగా 13 కార్మిక సంఘాలు ఎన్నికల బరిలో నిలువగా ప్రధానంగా ఏఐటియు, ఐఎన్టియుసి, సిఐటియు ల వద్ద ప్రధానంగా పోటీ నెలకొంది. సింగరేణి ఎన్నికల నేపథ్యంలో ఎలాంటి అవాంఛనీయ సంఘటన జరగకుండా పోలీసులు గట్టి బందోబస్తు నిర్వహించారు.

The post ప్రశాంతంగా సింగరేణి ఎన్నికలు appeared first on VEDHA NEWS.

వేద న్యూస్, మందమర్రి:

మందమర్రి సింగరేణి సివిల్ కాంట్రాక్టర్ ఓనర్స్ అసోసియేషన్ నూతన కమిటీ ఏకగ్రీవంగా ఎన్నుకున్నట్లు స్టీరింగ్ కమిటీ సభ్యులు తెలిపారు. అధ్యక్షులుగా బర్ల నాగ మల్లేష్, ఉపాద్యక్షులుగా గుంటి రవీందర్, ప్రధాన కార్యదర్శిగా బర్ల చంద్రశేఖర్, కోశాదికారిగా సిహెచ్ శ్రీనివాస్ లను ఏకగ్రీవం ఎన్నుకున్నట్లు తెలిపారు. స్టీరింగ్ కమిటీ డిసెంబర్ 15న ప్రకటించినా నోటిఫికేషన్ షెడ్యూల్ ప్రకారం డిసెంబర్ 18,19 తేదీలలో పోటీ చేయుటకు దరఖాస్తు చేసుకోవాలని తెలిపారు. డిసెంబర్ 20వ తేదీన ఉపసంహరణ, డిసెంబర్ 22న ఎన్నికలు నిర్వహించడానికి స్టీరింగ్ కమిటీ ప్రకటించింది.

అన్ని పదవులకు గాను సింగిల్ నామినేశన్ వచ్చినందున ఏకగ్రీవంగా ఎన్నికైనట్టుగా స్టీరింగ్ కమిటీ సభ్యులు ప్రకటించారు. ఈ మేరకు ఎన్నికైన వారికి ధృవీకరణ పత్రాలు శుక్రవారం ఉదయం సింగరేణి సివిల్ కాంట్రాక్టర్ ఓనర్స్ అసోసియేన్ కార్యాలయంలో అందజేశారు. నూతనంగా ఎన్నికైన సభ్యులకు తోటి కాంట్రాక్టర్లు అభినందనలు తెలియజేశారు, నూతనంగా ఎన్నికైన సభ్యులు మాట్లాడుతూ, తమపై నమ్మకంతో తమను ఏకగ్రీవంగా ఎన్నుకున్నందుకు కృతఙ్ఞతలు తెలిపారు.

ఈ కార్యక్రమానికి 11 డివిజన్ ల అధ్యక్షుడు కనుకుల మొండయ్య, ఆర్ జీవన్ అధ్యక్షుడు టి రాజలింగు, ప్రధాన కార్యదర్శి ఎ రామ్ రెడ్డి, కోశాధికారి ఎ రాజమౌళి, ఉపాధ్యక్షుడు కురుమ శ్రీనివాస్, శ్రీరాంపూర్ గౌరవ అధ్యక్షుడు బొడ్డయ్య, బెల్లంపల్లి అధ్యక్షుడు గోపికృష్ణ, ఆర్ జి 3 నుండి ఎన్ శంకర్, ఎన్ సమ్మయ్య, ఎన్నికలు నిర్వహించిన స్టీరింగ్ కమిటీ సభ్యులు పి రాజమల్లు, పోతుల పరంధం కుమార్, గోమాస వెంకటేష్, బర్ల రాజకుమార్, మెరుగు దత్తాత్రి తదితరులు పాల్గొన్నారు.

The post సింగరేణి సివిల్ కాంట్రాక్టర్ ఓనర్స్ అసోసియేషన్ సభ్యుల నూతన కమిటీ ఎన్నిక appeared first on VEDHA NEWS.

• ఆధునిక టెక్నాలజీతో కొత్తపుంతలు
• సింగరేణి 103వ ఆవిర్భావ వేడుకలు

వేద న్యూస్, మంచిర్యాల ప్రతినిధి:
సింగరేణి కాలరీస్ కంపెనీ లిమిటెడ్ పేరు వినగానే రాష్ట్రంలో బొగ్గు గనులు గుర్తుకు రావడం సహజం. బొగ్గు ఉత్పత్తిలో అధునాతన టెక్నాలజీని ఉపయోగిస్తూ, ప్రతి యేటా నిర్దేశిత లక్ష్యాలను అధిగమిస్తూ, ప్రగతిపథంలో దూసుకుపోతున్న సింగరేణి సంస్థ నేడు 103వ యేటాకు అడుగుపెట్టబోతోంది. సరిగ్గా 136 సంవత్సరాల క్రితం 1886 సంవత్సరంలో బొగ్గు ఉత్పత్తిని ప్రారంభించిన సంస్థ, 1920 సంవత్సరంలో సింగరేణి కాలరీస్ కంపెనీ లిమిటెడ్ గా పేరు నమోదు కాబట్టి సింగరేణి సంస్థగా రూపాంతరం చెంది, శతాబ్దం కాలంగా దినదినం అభివృద్ధి చెందుతూ, దక్షిణ భారతదేశానికి వెలుగులు పంచుతూ, ప్రగతి పథంలో పయనిస్తూ, ప్రత్యక్షంగా, పరోక్షంగా లక్షలాది మందికి ఉపాధి కల్పిస్తూ, తెలంగాణ కొంగ బంగారంగా విరాజిల్లుతుంది.

ఆధునాతన టెక్నాలజీని సద్వినియోగం చేసుకుంటూ, ఉత్పత్తి, ఉత్పాదకతలో పురోభివృద్ధి సాధిస్తూ, ఏటేటా వార్షిక లక్ష్యాలను అధిగమిస్తూ, దినదినం అభివృద్ధి పధంలో సింగరేణి సంస్థ తన ప్రయాణాన్ని కొనసాగిస్తోంది. ప్రకృతికి విరుద్ధంగా భూగర్భ గనుల్లో సైతం మెరుగైన టెక్నాలజీతో ఉత్పత్తి లక్ష్యాలను చేదిస్తుంది. గుడ్డి దీపం కాంతుల నుండి ఎల్ఈడి కాంతులు నడుమ శోభిల్లుతూ, కార్మికుల ప్రయాసను తగ్గించింది. గతంలో కిలోల బరువున్న దీపపు వెలుగులో భారంగా పనిచేసిన కార్మికులకు తేలికపాటి ఎల్ఈడి దీపాలను అందించి, ఇటువంటి అనేకం నిర్వహించి, ఉత్పత్తి, ఉత్పాదకత కాకుండా కార్మిక శ్రేయస్సు సైతం ముఖ్యమని నిరూపించింది.

అందివచ్చిన శాస్త్ర, సాంకేతికతను సద్వినియోగం చేసుకుంటూ, బొగ్గు ఉత్పత్తి లక్ష్యాలను గణనీయంగా పెంచుకుంటూ, నిర్దేశించిన లక్ష్యాలను అధిగమిస్తూ, ఏటా లాభాలు గడిస్తున్న ప్రభుత్వ రంగ సంస్థగా రికార్డును సొంతం చేసుకుంటుంది. వార్షిక లక్ష్యాలను అధిగమించడం తోపాటు గనుల్లో కార్మికులకు రక్షణ చర్యలు సమర్థవంతంగా అమలు చేస్తూ, రక్షణతో కూడిన బొగ్గు ఉత్పత్తే ధ్యేయంగా ముందుకు నడుస్తుంది.

సింగరేణి సంస్థలో గతంలో సమ్మెలకు, పోరాటాలకు పెట్టింది పేరుగా ఉండగా, వరుస సమ్మెల మూలంగా సంస్థ నష్టాలలో కూరుకుపోగా, 1998 బిఐఎఫ్ఆర్ కు నివేదించగా, సింగరేణి సంస్థను లాభాల బాట పట్టించేందుకు కార్మికులు, అధికారులు కృషి చేయాలని, సంస్థ లాభాలను సాధిస్తే లాభాల వాటా అమలు చేస్తామని అప్పటి ఉమ్మడి ఆంధ్రప్రదేశ్ రాష్ట్ర ముఖ్యమంత్రి నారా చంద్రబాబు నాయుడు చేసిన ప్రకటనను కార్మికులు, అధికారులు సవాలుగా స్వీకరించి, ఉత్పత్తి పెంచడంతో 1998వ సంవత్సరం నుండి నేటి వరకు వరుసగా లాభాలను సాధిస్తున్న ప్రభుత్వ రంగ సంస్థ సింగరేణి సంస్థగా రికార్డులను సృష్టిస్తోంది.

ఉత్పత్తి లక్ష్యాలను ప్రతియేటా పెంచుకుంటూ, కోలిండియా స్థాయిలో అత్యధిక బొగ్గు ఉత్పత్తి, ఉత్పాదకతను సాధిస్తున్న సంస్థగా నిలుస్తుంది. బొగ్గు ఉత్పత్తి సంస్థల్లో అత్యధిక బొగ్గు ఉత్పత్తి సాధించి, తనకంటూ ప్రత్యేక గుర్తింపు పొందిన సింగరేణి సంస్థ బొగ్గు ఉత్పత్తి తోపాటు థర్మల్ విద్యుత్ ఉత్పత్తి రంగంలో ప్రవేశించింది. ఇందులో భాగంగా 2016 సంవత్సరంలో జిల్లాలోని జైపూర్ మండలంలో థర్మల్ విద్యుత్ కేంద్రాన్ని 600 మెగావాట్ల సామర్థ్యం గల 2 కేంద్రాలను నిర్మించి, సమర్థవంతంగా విద్యుత్ ఉత్పత్తి చేస్తూ, విద్యుత్ రంగంలో సైతం తనదైన ముద్రను వేసుకుంటుంది.

థర్మల్ విద్యుత్ తోపాటు సోలార్ విద్యుత్ కేంద్రాల ఏర్పాటు దిశగా అడుగులు వేసి, సింగరేణి వ్యాప్తంగా సోలార్ విద్యుత్ కేంద్రాలను ప్రారంభించింది. త్వరలోనే సింగరేణి సంస్థ నీటి పై తేలి ఆడే సోలార్ విద్యుత్ ప్రాజెక్టు , భూగర్భంలోని వేడి నీటితో జియా థర్మల్ విద్యుత్ ప్రాజెక్టును ప్రారంభించేందుకు శరవేగంగా ముందుకు సాగుతోంది.

ఇతర రాష్ట్రాలకు విస్తరించే దిశగా..
తెలంగాణ రాష్ట్రంలోని సింగరేణి సంస్థ బొగ్గు ఉత్పత్తి సంస్థలో అగ్రగామి సంస్థగా పేరు సంపాదించింది.తెలంగాణ రాష్ట్రంలో బొగ్గు ఉత్పత్తికి పరిమితమయిన సంస్థ ఇతర రాష్ట్రాల్లో సైతం బొగ్గు ఉత్పత్తి చేపట్టేందుకు అడుగులు వేస్తోంది. ఒరిస్సా రాష్ట్రంలో నైని, పార్ధప్రద బొగ్గు క్షేత్రాలలో బొగ్గు ఉత్పత్తి ప్రారంభించేందుకు సన్నాహాలు చేస్తుంది. కాగా ఒడిస్సా రాష్ట్రం నుండి నిర్వహిస్తున్న తవ్వకాలు నుంచి త్వరలోనే బొగ్గు ఉత్పత్తి ప్రారంభం కానుంది. కాగా బొగ్గు రంగంలో తనదైన ముద్ర వేసుకున్న సింగరేణి సంస్థకు కేంద్ర నిర్ణయం సింగరేణి అభివృద్ధికి అడ్డంకిగా మారిందనే సంశయం ప్రస్తుత పరిస్థితిలో ప్రజల్లో నెలకొంది.

బొగ్గు బ్లాకులను ప్రైవేటీకరించడం, బడా పారిశ్రామిక వేత్తలు, థర్మల్ విద్యుత్ కేంద్రాల యాజమాన్యాలు బొగ్గు బ్లాకుల వేలం పాటలో బొగ్గు బ్లాకులను దక్కించుకునే వెసలు బాటు కేంద్ర ప్రభుత్వం కల్పించింది. అదేవిధంగా విదేశాల నుండి బొగ్గును దిగుమతి చేసుకునేందుకు అడ్డంకులు వెలిగించడంతోపాటు ఖచ్చితంగా విదేశీ బొగ్గును కొనుగోలు చేయాలని బొగ్గు ఆధారిత పరిశ్రమలకు ఉత్తర్వులు జారీచేసింది. ఈ తరుణంలో సింగరేణి మరిన్ని బొగ్గు బ్లాకులను కేటాయించడం, ఉత్పత్తి చేసిన బొగ్గును వినియోగదారులు కొనుగోలు చేయడం పెద్ద ప్రశ్నార్థకంగా మారింది. సింగరేణి యాజమాన్యానికి కేంద్ర ప్రభుత్వం తోడ్పాటు అందిస్తుందనే ఆశాభావం సింగరేణి వ్యాప్తంగా నెలకొంది.

కార్మికుల సంక్షేమానికి పెద్దపీట..
బొగ్గు ఉత్పత్తి రంగంలో దూసుకుపోతున్న సింగరేణి సంస్థలో పనిచేస్తున్న కార్మికుల సంక్షేమానికి యజమాన్యం అధిక ప్రాధాన్యం ఇస్తూ వారికి అన్ని సౌకర్యాలు కల్పిస్తూ,సంక్షేమ కార్యక్రమాల అమలులో పెద్దపీట వేస్తోంది. కార్మిక కాలనీలో మెరుగైన సౌకర్యాలు కల్పించడంతో గనులపై కార్మికుల సౌకర్యార్థం అధునాతన స్నానపు గదులు, క్యాంటీన్లు, విశ్రాంతి గదులు, ఆర్వో వాటర్ ప్లాంట్లు లతోపాటు కార్మికుల నివాసాలకు ఏసీలు, కార్మిక కాలనీలో ఆహ్లాదకరమైన వాతావరణం కల్పించేందుకు గాను పార్కులు ఏర్పాటు చేయడమే కాకుండా కార్మిక, కార్మికేతర కుటుంబ పిల్లలకు వివిధ పోటీ పరీక్షలకు చేయూత అందిస్తోంది.

కరోన విరా తాండవం చేసిన వేళలో కార్మికుల కోవైడ్ వార్డులు, ఐసోలేషన్ సెంటర్లు, ఆక్సిజన్ ప్లాంట్ లను ఏర్పాటు చేసి కార్మికులను కాపాడింది. కరోన బారిన పడిన కార్మికులకు ప్రత్యేకంగా సెలవులు అందించి, వారిలో మనోధైర్యాన్ని నింపింది. కార్మికులు, కార్మికుల కుటుంబలు కరోన బారిన పడకుండా వాక్సినేషన్ ను సమర్థవంతంగా నిర్వహించింది.

తెలంగాణకు కొంగుబంగారం.
తెలంగాణ రాష్ట్రం,కేంద్ర ప్రభుత్వం 51:49 శాతం వాటాలతో కేంద్ర, రాష్ట్ర ప్రభుత్వాల ఉమ్మడి సంస్థగా సింగరేణి ప్రతి సంవత్సరం వార్షిక లక్ష్యాలను అధిగమిస్తూ, వేల కోట్ల రూపాయలు లాభాలు ఆర్జిస్తుంది. సింగరేణి సంస్థ తెలంగాణ రాష్ట్రంలోనే అతిపెద్ద ప్రభుత్వ రంగ సంస్థగా రాష్ట్ర అభివృద్ధికి తన వంతు తోడ్పాటును అందిస్తూ, వేలాది మందికి ప్రత్యక్షంగా లక్షలాది మందికి పరోక్షంగా ఉపాధి కల్పిస్తూ, తెలంగాణ రాష్ట్ర కొంగుబంగారంగా విరాజిల్లుతుంది.

రాష్ట్రంలో నూతనంగా ఏర్పడిన కాంగ్రెస్ ప్రభుత్వ ప్రోత్సాహంతో సింగరేణి సంస్థ ప్రతి ఏటా నిర్దేశించిన లక్ష్యాలను అధిగమిస్తూ, మరిన్ని మైలురాళ్లను అధిగమించి, సంస్థ దేశవిదేశాలలో తన ప్రస్థానాన్ని కొనసాగిస్తూ, మరిన్ని అవార్డులు సొంతం చేసుకోవాలని రాష్ట్ర ప్రజలు కోరుకుంటున్నారు. కాగా నేడు సింగరేణి ఆవిర్భావ దినోత్సవం, ఈ సందర్భంగా సింగరేణి వ్యాప్తంగా అంగరంగ వైభవంగా వేడుకలు నిర్వహించేందుకు సింగరేణి యాజమాన్యం అన్ని ఏర్పాట్లు పూర్తి చేసింది.

The post తెలంగాణకు మణిహారంగా సింగరేణి బొగ్గు గనులు appeared first on VEDHA NEWS.