• కొమ్మిడి రాకేష్‌రెడ్డి ఆధ్వర్యంలో స్పందన అనాథాశ్రమంలో..

వేద న్యూస్, జమ్మికుంట:
కాంగ్రెస్ పార్టీ హుజురాబాద్ నియోజకవర్గ ఇన్ చార్జి వొడితెల ప్రణవ్ జన్మదినం సందర్భంగా గురువారం ఆయన మిత్రుడు కొమ్మిడి రాకేష్‌రెడ్డి ఆధ్వర్యంలో వేడుకలు నిర్వహించారు. స్పందన అనాథాశ్రమంలో పిల్లల చేత కేక్ కట్ చేయించారు. వారికి ఫ్రూట్స్ పంపిణీ చేశారు. వారికి భోజనాలు ఏర్పాటు చేశారు. కార్యక్రమంలో రాకేష్ రెడ్డి యువ సైన్యం వ్యవస్థాపకుడు సతీష్ కుమార్, నల్ల కొండల్ రెడ్డి, మద్దుల ప్రశాంత్, సత్యనారాయణ, సమ్మిరెడ్డి, సోక్కారావు తదితరులు పాల్గొన్నారు.

The post ఘనంగా ప్రణవ్ బర్త్ డే appeared first on VEDHA NEWS.

• మీడియా సమావేశంలో కాంగ్రెస్ పార్టీ లీడర్లు
• ఎమ్మెల్యే కౌశిక్ ప్రేరేపణతోనే పార్టీకి వ్యతిరేకంగా కొందరు వ్యాఖ్యలు
• టీపీసీసీ సభ్యుడు పత్తి కిష్ణారెడ్డి విమర్శ

వేద న్యూస్, జమ్మికుంట:

కాంగ్రెస్ పార్టీ హుజూరాబాద్ నియోజకవర్గ ఇన్‌చార్జి వొడితల ప్రణవ్ పై కొందరు నాయకులు చేసిన ఆరోపణలు నిరాధారామైనవని సీనియర్ నాయకులు పేర్కొన్నారు. ఆదివారం జమ్మికుంట పట్టణంలోని వినాయక గార్డెన్స్‌లో నాయకుడు సుంకరి రమేశ్ ఆధ్వర్యంలో సీనియర్ నాయకులు పత్తి కిష్ణారెడ్డి, పొనగంటి మల్లయ్య, దేశిని కోటి, మహిళా కాంగ్రెస్ నేత పూదరి రేణుక శివకుమార్ గౌడ్ హస్తం పార్టీ నాయకులు, కార్యకర్తలతో కలిసి మీడియా సమావేశం నిర్వహించారు. ఈ సందర్భంగా నేతలు మాట్లాడుతూ పార్టీకి వ్యతిరేకంగా మాట్లాడిన నాయకులపై అధిష్ఠానం చర్యలు తీసుకున్నట్టు స్పష్టం చేశారు. దురుద్దేశంతో ఇన్ చార్జి ప్రణవ్, ఆయన కుటుంబ సభ్యులపై దుర్భాషలాడారని తెలిపారు.

కార్యకర్తలు అధైర్య పడొద్దు: పూదరి రేణుక శివకుమార్ గౌడ్
మహిళా కాంగ్రెస్ నాయకురాలు పూదరి రేణుక శివకుమార్ గౌడ్ మాట్లాడుతూ ఇటీవల ప్రెస్ మీట్ పెట్టి పార్టీకి వ్యతిరేకంగా మాట్లాడిన నాయకులు కార్యకర్తల మధ్య చిచ్చు పెట్టే ప్రయత్నం చేస్తున్నారని చెప్పారు. ప్రణవ్‌ను అడగడానికి వారి స్థాయి ఎంత? అని ప్రశ్నించారు. ఇష్టానుసారంగా పార్టీకి వ్యతిరేకంగా మాట్లాడే వారు ‘తస్మాత్ జాగ్రత్త’ అని హెచ్చరించారు. వొడితల ప్రణవ్ కార్యకర్తలను కంటికి రెప్పలా కాపాడుకుంటూ ముందుకెళ్తున్నారని తెలిపారు. గతంలో 3 వేల ఓట్లు రాగా, మొన్నటి సాధారణ ఎన్నికల్లో నాయకులు, కార్యకర్తల సమిష్ఠి కృషితో 54 వేల ఓట్లు వచ్చాయని వివరించారు. హుజూరాబాద్ నియోజకవర్గ పరిధిలో కొందరు లీడర్లు మొన్నటి పార్లమెంటు ఎన్నికల్లో తమకు ప్రణవ్ మర్యాద ఇవ్వలేదని తెలపడం సరికాదన్నారు. కాంగ్రెస్ కార్యకర్తలు ఎవరూ అధైర్యపడొద్దని సూచించారు. ఇప్పటికైతే ఆరుగురే సస్పెండ్ అయ్యారని, ఇంటి దొంగలు ఎవరైనా పార్టీలో ఉంటే సర్దుకోవాలని హితవు పలికారు. కార్యకర్తల మధ్య చిచ్చు పెట్టేందుకు కొందరు ప్రయత్నిస్తున్నారని వెల్లడించారు. రేవంత్ రెడ్డి, ప్రణవ్, పొన్నం ప్రభాకర్, సత్యనారాయణల నాయకత్వంలో పార్టీ నియోజకవర్గంలో బలంగా ముందుకు సాగుతుందని చెప్పారు.

అందరినీ గౌరవించే నాయకుడు ప్రణవ్: పొనగంటి మల్లయ్య
సీనియర్ నాయకుడు పొనగంటి మల్లయ్య మాట్లాడుతూ ఇన్ చార్జి ప్రణవ్ పై కొందరు చేసిన ఆరోపణలను ఖండించారు. ప్రణవ్ సౌమ్యశీలి అని, అందరితో కలుపుగోలుగా మాట్లాడే నాయకుడని, అందరినీ గౌరవించే యువనేతని చెప్పారు. ఆయన ఎన్నడూ స్వరం పెంచి మాట్లాడలేదని తెలిపారు. కొందరు నేతలు ఎమ్మెల్సీ బల్మూరి వెంకట్ ను కలిసి ఆయన్నూ బదనాం చేస్తున్నారని తెలిపారు. విలువలు లేకుండా ఓ సీనియర్ నాయకుడు పార్టీలో విభేదాలు సృష్టించే ప్రయత్నాలు చేస్తున్నారని పేర్కొన్నారు. ఎవరి శక్తి ఏంటో వారే గమనించుకోవాలని సూచించారు. కాంగ్రెస్ పార్టీ లీడర్లు, నాయకులు, కార్యకర్తలు అందరూ కలిసి పార్టీ బలోపేతానికి సమిష్ఠిగా పని చేయాలన్నారు.

అందరి సమిష్ఠి కృషితో పార్టీ బలోపేతం: సీనియర్ నాయకుడు కోటి

సీనియర్ నాయకుడు దేశిని కోటి మాట్లాడుతూ పార్టీ నియోజకవర్గ ఇన్ చార్జి ప్రణవ్ కుటుంబ సభ్యులను కించపరిచేలా కొందరు మాట్లాడటం సరికాదన్నారు. అసభ్యకర పదజాలంలో ప్రణవ్ ను దూషించడం ఎంత మాత్రం సరికాదని చెప్పారు. పార్టీ లో తాను ఎన్ఎస్‌యూఐ ప్రెసిడెంట్ గా పని చేశానని, ఆ తర్వాత జెడ్పీటీసీగా పోటి చేసి ఓడిపోయానని, ఇల్లందకుంట దేవస్థాన చైర్మన్ గా పని చేశానని తెలిపారు. నాడు దామోదర్ రెడ్డిని ఎదిరించి పొన్నం ప్రభాకర్ నాయకత్వంలో పని చేసిన సందర్భాన్ని కోటి గుర్తుచేశారు. వార్డు అభివృద్ధి కోసం ఇతర పార్టీలోకి వెళ్లి..తిరిగి సొంతగూటికి చేరుకున్నట్టు వివరించారు. కొత్తపల్లిలో కొందరు నాయకులు ప్రెస్ మీట్ పెట్టి నాయకుడు ప్రణవ్ ను దూషించడాన్ని ఖండించారు. పార్టీలో అసమ్మతి ఉంటే ఇంటర్నల్ గా ఫిర్యాదు చేయాలని తెలిపారు.

క్రమశిక్షణా కమిటీ చైర్మన్ జి.చిన్నారెడ్డి ఆదేశాల మేరకే సస్పెన్షన్: టీపీసీసీ సభ్యుడు పత్తి కిష్ణారెడ్డి

మీడియా సమావేశంలో టీపీసీసీ సభ్యుడు పత్తి కిష్ణారెడ్డి మాట్లాడుతూ హుజూరాబాద్ ఉప ఎన్నికల సమయంలో రాజకీయం అంటే అమ్మకాలు, కొనుగోలు అనే రీతిలో కొందరు తయారు చేశారని చెప్పారు. తమ గ్రామ, వార్డు అభివృద్ధి కోసం కొందరు లీడర్లు పార్టీ మారి మళ్లీ తిరిగి పార్టీలోకి వచ్చినట్టు తెలిపారు. ఇటివల కాలంలో ప్రజా ఆదరణ కలిగిన నేతలను కొందరని పార్టీలోకి చేర్చుకున్నట్టు చెప్పారు. అయితే, అందులో కొందరు తామే పార్టీని నడుపుతున్నట్టు మాట్లాడుతున్నారని చెప్పారు.

స్థానిక ఎమ్మెల్యే కౌశిక్ రెడ్డి ప్రోద్బలంతో కొందరు కరపత్రాలు, లేఖలు విడుదల చేసి, సమావేశాలు పెట్టి పార్టీ వ్యతరేక కార్యకలాపాలకు పాల్పడ్డారని ఆరోపించారు. పథకం ప్రకారం ఎమ్మెల్యే కౌశిక్ రెడ్డిని కొందరిని కాంగ్రెస్ ముసుగులో వ్యతిరేక వ్యాఖ్యలు చేయిస్తున్నారని విమర్శించారు. అలా ఎమ్మెల్సీ బల్మూరి వెంకట్ నూ బదనాం చేస్తున్నారని వివరించారు.ఇంకా ‘స్థానిక’ ఎన్నికలు, నామినేటెడ్ పదవులు పూర్తి కాలేదని, అప్పుడే కొందరు తమకు నష్టం జరిగింది? అని ఎలా చెప్తారని ప్రశ్నించారు. తమకు జరిగిన నష్టం ఏంటో తెలపాలన్నారు. పక్క పార్టీల నుంచి వచ్చే బహుమతుల కోసం కొందరు బ్లాక్ మెయిల్ రాజకీయాలకు తెర తీశారని పేర్కొన్నారు. ఎమ్మెల్యే కౌశిక్ రెడ్డి ప్రేరేపణతో కోవర్టులుగా మారి కొందరు లీడర్లు పార్టీకి, ఇన్ చార్జి ప్రణవ్ కు వ్యతిరేకంగా మాట్లాడుతున్నారని స్పష్టం చేశారు.

పార్టీ క్రమశిక్షణా కమిటీ చైర్మన్ జి.చిన్నారెడ్డి ఆదేశాల మేరకే కరీంనగర్ డీసీసీ అధ్యక్షుడు, మానకొండూరు ఎమ్మెల్యే కవ్వంపల్లి సత్యనారాయణ ఆరుగురు లీడర్ల సస్పెన్షన్ ఉత్తర్వులు జారీ చేశారని వెల్లడించారు. సమస్యలుంటే నాయకత్వం దగ్గర చర్చించాలని సూచించారు. బహిష్కరణకు గురైన నాయకులతో ఎలాంటి సంప్రదింపులు ఉండబోవని స్పష్టం చేశారు. కమిటీల విషయమై మాట్లాడుతూ ఒకే మండలం, గ్రామం, పట్టణం ఇలా అన్ని కమిటీలకు ఇద్దరేసి అధ్యక్షులు ఎందుకు? అనే విషయమై ఇన్ చార్జి ప్రణవ్ డీసీసీ అధ్యక్షుడు, టీపీసీసీతో చర్చించి కమిటీలను రద్దు చేసినట్టు కిష్ణారెడ్డి వివరించారు. త్వరలో కమిటీలు ఉంటాయని పేర్కొన్నారు. హస్తం పార్టీ శ్రేణులు ఈ సందర్భంగా ‘జై కాంగ్రెస్, జై ప్రణవ్’ అంటూ నినాదాలు చేశాయి. విలేకరుల సమావేశంలో కాంగ్రెస్ పార్టీ నాయకులు, కార్యకర్తలు పెద్ద సంఖ్యలో పాల్గొన్నారు.

The post ప్రణవ్‌పై ఆరోపణలు నిరాధారం appeared first on VEDHA NEWS.

• తెరపైకి పలువురి పేర్లు..అధిష్టానం పరిశీలన
• పార్టీ బలోపేతంతో పాటు స్థానాల గెలుపుపై జిల్లా మంత్రుల దృష్టి
• ఆశావహుల్లో జీవన్ రెడ్డి, ప్రవీణ్ రెడ్డి, రాజేందర్ రావు, ప్రణవ్, రోహిత్ రావు!
• పెద్దపల్లి నుంచి చంద్రశేఖర్, ఎమ్మెల్యే వివేక్ తనయుడు వంశీ, నల్లాల ఓదెలు!

వేద న్యూస్, కరీంనగర్:
ఉమ్మడి కరీంనగర్ జిల్లాలో ఎంపీ అభ్యర్థులుగా కాంగ్రెస్ పార్టీ తరఫున ఎవరిని బరిలో దించాలనే విషయమై హస్తం అధిష్టానం ఫుల్ ఫోకస్ పెట్టినట్లుగా తెలుస్తోంది. ఈ క్రమంలో నాయకుల అభ్యర్థిత్వాన్ని నిశితంగా పరిశీలిస్తున్నట్లు సమాచారం. బలమైన అభ్యర్థులను బరిలో దింపి ఈ సారి అత్యధిక పార్లమెంట్ స్థానాల్లో పాగా వేయాలని భావిస్తోంది. రాష్ట్రంలో అధికారాన్ని దక్కించుకున్న హస్తం పార్టీ..ఎంపీ ఎన్నికల్లోనూ సత్తా చాటడానికి మాస్టర్ ప్లాన్ వేస్తోంది. ఉమ్మడి కరీంనగర్ జిల్లా నుంచి మంత్రులుగా ఉన్న పొన్నం ప్రభాకర్, దుద్దిళ్ల శ్రీధర్ బాబు సైతం పాలన విషయాలతో పాటు తమ సొంత జిల్లాలోని పార్లమెంటు స్థానాలపైన దృష్టి సారిస్తున్నారు.

కరీంనగర్ జిల్లా పరిధిలోని కరీంనగర్, పెద్దపల్లి పార్లమెంట్ స్థానాలకు అభ్యర్థులుగా ఎవరిని ఖరారు చేయాలనే విషయమై అధిష్టానం అభ్యర్థులను జల్లెడ పడుతున్నట్లు తెలుస్తోంది. గత పార్లమెంట్ ఎన్నికల్లో కాంగ్రెస్ అభ్యర్థులు ఓటమి పాలైనప్పటికీ ఈ సారి మాత్రం గెలుపే లక్ష్యంగా కాంగ్రెస్ పార్టీ అధిష్టానం ఆలోచనలకు అనుగుణంగా క్షేత్రస్థాయిలో సమాయత్తమవుతున్నారు.

కరీంనగర్ పార్లమెంట్ స్థానం విషయానికొస్తే..ఈ స్థానం నుంచి గతంలో ప్రాతినిధ్యం వహించిన పొన్నం ప్రభాకర్ ప్రస్తుతం రాష్ట్ర రవాణా, బీసీ సంక్షేమ శాఖ మంత్రిగా ఉన్నారు. కరీంనగర్ పార్లమెంట్ స్థానాన్ని ఈ సారి కచ్చితంగా కాంగ్రెస్ పార్టీ కైవసం చేసుకునే విధంగా ముందుకు సాగుతున్నారు. గతంలో కాంగ్రెస్ పార్టీని వీడిన క్యాడర్ ను తిరిగి సొంత గూటికి తీసుకొచ్చే ప్రయత్నం చేస్తున్నారు.

ముఖ్యంగా కరీంనగర్ జిల్లా కాంగ్రెస్ పార్టీ శ్రేణుల్లో జోష్ నింపుతున్నారు. నాయకులు, కార్యకర్తల మధ్య సమన్వయం ఉండేలా సూచనలు ఇస్తున్నారు. క్షేత్రస్థాయిలో పార్టీని బలోపేతం చేసే దిశగా అడుగులు వేస్తున్నారు. కార్యకర్తల కష్టంతోనే పార్టీ రాష్ట్రంలో అధికారంలోకి వచ్చిందని, పార్లమెంట్ ఎన్నికల్లోనూ గెలుపు వారి వల్లే సాధ్యమవుతుందని భావనతో ముందుకెళ్తున్నారు.

కరీంనగర్ పార్లమెంట్ స్థానం నుంచి కాంగ్రెస్ పార్టీ తరఫున మంత్రి శ్రీధర్ బాబు సోదరుడు శ్రీనుబాబు పోటీ చేస్తారనే వార్తలు ఇటీవల వచ్చాయి. కాగా, తనకు అలాంటి ఆలోచన లేదని శ్రీనుబాబు ప్రకటించారు. కరీంనగర్ పార్లమెంట్ స్థానానికి బీఆర్ఎస్, బీజేపీల నుంచి బలమైన అభ్యర్థులు పోటీలో ఉన్న నేపథ్యంలో కాంగ్రెస్ పార్టీ..బలమైన ఛరిష్మా ఉన్న లీడర్ ను పోటీలో దించాలని భావిస్తోంది. తద్వారా కరీంనగర్ ఎంపీ స్థానాన్ని నిలుపుకోవచ్చనే అభిప్రాయంతో ముందుకు సాగుతోంది.

ఈ టికెట్ రేసులో ప్రముఖంగా ఎమ్మెల్సీ టి.జీవన్ రెడ్డి, హుస్నాబాద్ మాజీ ఎమ్మెల్యే అలిగిరెడ్డి ప్రవీణ్ రెడ్డి, మాజీ ఎమ్మెల్యే వెలిచాల జగపతిరావు తనయుడు రాజేందర్ రావు పేర్లు వినబడుతున్నాయి. వీరితో పాటు హుజురాబాద్ కంటెస్టెడ్ ఎమ్మెల్యే వొడితల ప్రణవ్, ఎమ్మెస్సార్ మనవడు రోహిత్ రావు పేర్లను అధిష్టానం పరిశీలిస్తున్నట్లు సమాచారం. గత అసెంబ్లీ ఎన్నికల్లో జగిత్యాల నుంచి పోటీ చేసిన జీవన్ రెడ్డి ఓటమి పాలయ్యారు. కానీ, సీనియర్ రాజకీయ నాయకుడైన ఆయన్ను(ఎమ్మెల్సీ జీవన్ రెడ్డి) బరిలో దింపడం ద్వారా బీఆర్ఎస్, బీజేపీలను ఈజీగా నిలువరించవచ్చనే అభిప్రాయాలూ అక్కడక్కడ వ్యక్తమవుతున్నట్లు తెలుస్తోంది.

ఇక పెద్దపల్లి పార్లమెంట్ సెగ్మెంట్ విషయానికొస్తే..ఎస్సీ రిజర్వ్‌డ్ స్థానం అయిన ఈ సీటు నుంచి బలమైన అభ్యర్థిని దింపాలనే ఆలోచనలో అధిష్టానం ఉంది. గతంలో ఇక్కడ్నుంచి ఎంపీగా ప్రాతినిధ్యం వహించిన వివేక్ వెంకటస్వామి..ప్రస్తుతం చెన్నూర్ ఎమ్మెల్యేగా ఉన్నారు. ఈ నేపథ్యంలో ఈ సారి ఎవరిని టికెట్ వరిస్తుందనేది ఆసక్తికరంగా మారింది. ఎస్సీ సామాజిక వర్గా నాయకులు అందరూ దాదాపుగా ఇప్పటికే తమ అభ్యర్థిత్వాన్ని పరిశీలించాలని కోరుతూ అధిస్టానాన్ని ఆశ్రయిస్తున్నారు.

మాజీ మంత్రి ఆగం చంద్రశేఖర్ తో పాటు చెన్నూర్ ఎమ్మెల్యే వివేక్ వెంకటస్వామి తనయుడు వంశీ, మాజీ ఎమ్మెల్యే నల్లాల ఓదెలు ఆశావహుల జాబితాలో ఉన్నారు. చూడాలి మరి..చివరికి అధిష్టానం ఈ రెండు స్థానాల్లో ఎవరిని అభ్యర్థులుగా నిలుపుతుందో..అయితే, ఈ రెండు స్థానాల్లో కాంగ్రెస్ గెలుపే లక్ష్యంగా మంత్రులు పొన్నం ప్రభాకర్, దుద్దిళ్ల శ్రీధర్ బాబు దృష్టి సారిస్తున్నారు.

The post కరీంనగర్, పెద్దపల్లి కాంగ్రెస్ ఎంపీ అభ్యర్థిత్వాలపై అధిష్టానం ఫోకస్ appeared first on VEDHA NEWS.