• వ్యసన స్నేహితులను వదులుకుంటేనే యువతకు బంగారు భవిష్యత్తు
•  లేదంటే భవిష్యత్తు అంధకారమే

యువత ఒక దేశ భవిష్యత్తుకు పునాది. వారి ఆలోచనలు, శక్తి, సృజనాత్మకత దేశ అభివృద్ధికి కీలకం. అయితే ఆధునిక సమాజంలో యువత అనేక రకాల వ్యసనాల ఉచ్చులో చిక్కుకునే ప్రమాదం పెరుగుతోంది. ముఖ్యంగా తప్పుడు స్నేహితుల ప్రభావం, ఆసక్తి, ఒత్తిడి, సోషల్ మీడియా ప్రభావం వంటి కారణాల వల్ల యువత ఆల్కహాల్, మత్తు పదార్థాలు, నార్కోటిక్స్, గంజాయి, పోర్నోగ్రఫీ, మొబైల్ ఫోన్ వ్యసనం, అలాగే అనవసర ప్రేమ సంబంధాల వంటి అలవాట్లలో చిక్కుకుంటున్నారు. మొదట ఇవి సరదాగా ప్రారంభమైనా, క్రమంగా అవి జీవితాన్ని నియంత్రించే స్థాయికి చేరుకుంటాయి. శాస్త్రీయంగా పరిశీలిస్తే వ్యసనం అనేది కేవలం ఒక చెడు అలవాటు మాత్రమే కాదు; అది మెదడులో జరిగే జీవరసాయన మార్పుల ఫలితం. మన మెదడులో “డోపమైన్” అనే న్యూరోట్రాన్స్‌మిటర్ ఆనందం, ఉత్సాహం, ప్రేరణ వంటి భావాలను కలిగిస్తుంది. సాధారణంగా చదువు, క్రీడలు, విజయాలు వంటి సానుకూల కార్యకలాపాల వల్ల డోపమైన్ విడుదల అవుతుంది. కానీ ఆల్కహాల్, డ్రగ్స్, పోర్నోగ్రఫీ లేదా సోషల్ మీడియా వంటి వ్యసనాలు ఈ డోపమైన్‌ను అసహజంగా ఎక్కువగా విడుదల చేయిస్తాయి. దీని వల్ల తాత్కాలికంగా ఆనందం కలిగినా, క్రమంగా మెదడు సహజమైన ఆనందాన్ని అనుభవించలేని స్థితికి చేరుతుంది. ఇదే వ్యసనానికి ప్రధాన శాస్త్రీయ కారణం. యువతలో వ్యసనాలు ఎక్కువగా ప్రారంభమయ్యే కారణాల్లో ముఖ్యమైనది స్నేహితుల ప్రభావం. దీనిని శాస్త్రీయంగా “పీర్ ప్రెషర్” అంటారు. ఒక వ్యక్తి తన చుట్టూ ఉన్న వ్యక్తుల ప్రవర్తనను అనుసరించడం మానవ సహజ స్వభావం. యువతలో ఇంకా నిర్ణయాలు తీసుకునే మెదడు భాగం పూర్తిగా అభివృద్ధి చెందకపోవడం వల్ల వారు స్నేహితుల మాటలకు త్వరగా ప్రభావితమవుతారు. “ఒక్కసారి ట్రై చెయ్”, “ఏమీ కాదు”, “అందరూ చేస్తున్నారు” అనే మాటలతో ప్రారంభమైన అలవాటు క్రమంగా వ్యసనంగా మారుతుంది.

ఆల్కహాల్ మరియు మత్తు పదార్థాలు యువత ఆరోగ్యంపై తీవ్రమైన ప్రభావం చూపుతాయి. ఆల్కహాల్ అధికంగా వాడటం వల్ల కాలేయం (లివర్) దెబ్బతిని లివర్ సిరోసిస్ వంటి వ్యాధులు వస్తాయి. అలాగే మెదడు నాడీ వ్యవస్థ పనితీరు తగ్గిపోతుంది. నార్కోటిక్స్ మరియు గంజాయి వంటి మత్తు పదార్థాలు మెదడులోని నాడీ కణాలను ప్రభావితం చేసి నిర్ణయ సామర్థ్యాన్ని బలహీనపరుస్తాయి.

గంజాయిలో ఉండే టీ.హెచ్.సీ. (టెట్రాహైడ్రోకెన్నబినోల్) అనే రసాయనం మెదడు భావోద్వేగాలను నియంత్రించే భాగాలపై ప్రభావం చూపి ఆందోళన, డిప్రెషన్ వంటి సమస్యలను పెంచుతుంది. ఇంటర్నెట్ విస్తరణతో మరో పెద్ద సమస్యగా పోర్నోగ్రఫీ వ్యసనం ఎదిగింది. ఇది మెదడులో అధిక డోపమైన్ విడుదలకు కారణమవుతుంది. దీని వల్ల వాస్తవ జీవిత సంబంధాలపై తప్పు అభిప్రాయాలు ఏర్పడతాయి. యువతలో ఆత్మవిశ్వాసం తగ్గిపోవడం, ఒంటరితనం పెరగడం, సంబంధాల్లో అసంతృప్తి పెరగడం వంటి సమస్యలు వస్తాయి. దీర్ఘకాలంలో ఇది మానసిక ఆరోగ్యంపై తీవ్రమైన ప్రభావం చూపుతుంది.

ఇదే విధంగా మొబైల్ ఫోన్ మరియు సోషల్ మీడియా వ్యసనం కూడా ఆధునిక కాలంలో పెద్ద సమస్యగా మారింది. నిరంతరం ఫోన్ ఉపయోగించడం వల్ల మెదడులో “ఇన్‌స్టంట్ రివార్డ్” వ్యవస్థ ఏర్పడుతుంది. ప్రతి నోటిఫికేషన్, లైక్ లేదా మెసేజ్ మెదడులో చిన్న డోపమైన్ విడుదలకు కారణమవుతుంది. దీని వల్ల యువత ఎక్కువ సమయం ఫోన్‌లో గడపడం ప్రారంభిస్తారు.

ఫలితంగా ఏకాగ్రత తగ్గిపోవడం, చదువులో వెనుకబడటం, నిద్రలేమి, ఆందోళన వంటి సమస్యలు పెరుగుతాయి. యువ వయస్సులో భావోద్వేగాలు బలంగా ఉండటం వల్ల అనవసర ప్రేమ సంబంధాలు కూడా ఒక రకమైన భావోద్వేగ వ్యసనంగా మారవచ్చు. ఈ దశలో మెదడులో ఆక్సిటోసిన్ మరియు సెరటోనిన్ వంటి హార్మోన్ల ప్రభావం ఎక్కువగా ఉంటుంది. దీనివల్ల కొంతమంది యువత చదువు, కెరీర్ లక్ష్యాలను పక్కనబెట్టి భావోద్వేగ నిర్ణయాలు తీసుకుంటారు. సంబంధాలు విఫలమైతే డిప్రెషన్, ఆత్మవిశ్వాస లోపం వంటి సమస్యలు ఎదురవుతాయి.

ఈ వ్యసనాల ప్రభావం వ్యక్తిగత జీవితాన్ని మాత్రమే కాదు, కుటుంబం మరియు సమాజాన్ని కూడా ప్రభావితం చేస్తుంది. ఆరోగ్య సమస్యలు, చదువు మరియు ఉద్యోగ అవకాశాల నష్టం, ఆర్థిక ఇబ్బందులు, కుటుంబ విభేదాలు, కొన్నిసార్లు నేరాలకు దారితీసే పరిస్థితులు కూడా ఏర్పడవచ్చు. అందువల్ల యువత ఈ సమస్యలను చిన్న విషయాలుగా తీసుకోకూడదు. వ్యసనాల నుండి బయటపడటానికి కొన్ని శాస్త్రీయ పరిష్కారాలు ఉన్నాయి.

మొదటగా తప్పుడు స్నేహితులను దూరంగా ఉంచడం అత్యంత ముఖ్యమైనది. మన అభివృద్ధిని కోరుకునే, మంచి మార్గంలో నడిపించే స్నేహితులను మాత్రమే ఎంచుకోవాలి. చెడు అలవాట్లకు ప్రేరేపించే వ్యక్తులతో సంబంధాలను తగ్గించడం వ్యసనాల నివారణలో మొదటి అడుగు.

రెండవది ఆరోగ్యకరమైన జీవనశైలి అలవాటు చేసుకోవడం. క్రీడలు, వ్యాయామం, యోగా, ధ్యానం వంటి కార్యకలాపాలు మెదడులో సహజమైన ఆనంద హార్మోన్లను విడుదల చేస్తాయి. ఇవి ఒత్తిడిని తగ్గించి వ్యసనాల నుంచి దూరంగా ఉండటానికి సహాయపడతాయి. అలాగే పుస్తక పఠనం, సంగీతం, కళలు వంటి హాబీలు యువతలో సృజనాత్మకతను పెంచుతాయి.

మూడవది మైండ్‌ఫుల్‌నెస్ మరియు ధ్యానం. ధ్యానం మన ఆలోచనలను నియంత్రించడానికి సహాయపడుతుంది. ఇది మెదడులో నిర్ణయాత్మక శక్తిని పెంచి ఆకర్షణలకు లోనుకాకుండా ఉండటానికి సహాయపడుతుంది. పరిశోధనలు రోజూ కొద్ది నిమిషాలు ధ్యానం చేసే వ్యక్తుల్లో ఒత్తిడి మరియు వ్యసనాల ప్రవణత తగ్గుతుందని సూచిస్తున్నాయి.

నాలుగవది కౌన్సెలింగ్ మరియు వైద్య సహాయం. వ్యసనం తీవ్రమైన స్థాయికి చేరితే నిపుణుల సహాయం తీసుకోవడం అవసరం. కాగ్నిటివ్ బిహేవియరల్ థెరపీ (సి.బి.టీ.) వంటి చికిత్సా విధానాలు వ్యసనాల కారణాలను గుర్తించి వాటిని అధిగమించడానికి సహాయపడతాయి. కుటుంబ సభ్యులు మరియు గురువుల మద్దతు కూడా చాలా కీలకం.

చివరగా యువత గుర్తుంచుకోవాల్సిన విషయం ఏమిటంటే… జీవితం అమూల్యమైనది. తాత్కాలిక ఆనందాల కోసం దీర్ఘకాల భవిష్యత్తును పణంగా పెట్టకూడదు. మన లక్ష్యాలను స్పష్టంగా నిర్దేశించుకొని వాటి కోసం కృషి చేస్తే వ్యసనాలు స్వయంగా దూరమవుతాయి. మంచి స్నేహాలు, మంచి అలవాట్లు, మంచి ఆలోచనలు ఉన్నప్పుడు జీవితం విజయవంతమైన మార్గంలో ముందుకు సాగుతుంది. యువత ముఖ్యంగాగుర్తుంచుకోవలసిన విషయమేమిటంటే..

మనపై ఎన్నో ఆశలు పెట్టుకున్న తల్లితండ్రులు, భార్యపిల్లలు, స్నేహితులు ఉన్నారన్నది మరువకుండా గుర్తుంచుకోవాలి. వ్యసనాలను ప్రేరేపించే స్నేహం విషంతో సమానం, మిమ్మల్ని (మనల్ని) ఎదగనిచ్చే స్నేహమే నిజమైన స్నేహం.

వ్యసనపరులకు, వ్యసనాలకు దూరంగా ఉండాలి – బంగారు భవిష్యత్తును యువతే నిర్మించుకోవాలి.

– రవిబాబు పిట్టల, ఎం.ఎస్సీ., ఎం.టెక్., (పిహెచ్.డి), పర్యావరణవేత్త, మాజీ అసిస్టెంట్ ప్రొఫెసర్, జే.యన్.టీ.యు.హెచ్, హైదరాబాద్ మరియు జాయింట్ సెక్రటరీ, ఓరుగల్లు వైల్డ్ లైఫ్ సొసైటీ NGO, తెలంగాణ స్టేట్, ఇండియా. మొబైల్: +91 9849425271

The post వ్యసన స్నేహాలపై యువతకు అమూల్యమైన సందేశం appeared first on VEDHA NEWS.

•  జీవితాలపై తీవ్ర ప్రభావం
•  నేరాల పెరుగుదల.. వ్యసనాలకు అడ్డుకట్ట పడాలి

వేద న్యూస్, డెస్క్:

దేశ భవిష్యత్తు యువతరం అని నిపుణులు చెబుతున్నారు. కానీ, ఆధునిక సమాజంలో యువతరం ఎదుర్కొంటున్న అత్యంత ప్రమాదకరమైన సవాలు ఎదుర్కొంటున్నది.
మత్తు పదార్థాల వ్యసనం, ఆల్కహాల్‌, గంజాయి, ఇతర ప్రమాదకరమైన రసాయన మత్తు పదార్థాల వినియోగం చిన్న వయస్సులోనే ప్రారంభమవుతున్నది .
కేవలం ఉత్సాహం కోసమో, స్నేహితుల ఒత్తిడి వలనో, లేదా జీవితంలో కలిగే తాత్కాలిక ఒత్తిడి నుండి తప్పించుకోవడం కోసమో మొదలుపెట్టే ఈ అలవాటు, నెమ్మదిగా వారిని బానిసలుగా మారుస్తోంది.

క్షణికావేశపు నిర్ణయం.. అంధకారం

తొలిసారిగా తీసుకున్న క్షణికావేశపు నిర్ణయం, వారి బంగారు భవిష్యత్తును అంధకారంలోకి నెట్టేస్తుంది. ఈ మత్తు పదార్థాల లభ్యత సులభతరం కావడం, సరిహద్దులు దాటి అక్రమంగా రవాణా కావడం వంటి కారణాల వల్ల, ఈ వ్యసనం పట్టణాలకే పరిమితం కాకుండా, గ్రామీణ ప్రాంతాలకు కూడా వేగంగా విస్తరిస్తోంది. దీని ఫలితంగా, దేశం శక్తిమం తమైన యువతరం తమ విద్యా, ఉద్యోగ అవకాశాలను చేజేతులా కోల్పోతున్నారు.

విద్యా, ఆరోగ్య నష్టం
మత్తు పదార్థాల వ్యసనం యువత జీవితాలను అనేక విధాలుగా నాశనం చేస్తు న్న ది. మొదటిది, విద్యారంగం. వ్యసనానికి గురైన విద్యార్థులు ఏకాగ్రత కోల్పోతారు, జ్ఞాపకశక్తి తగ్గుతుంది, తరగతులకు గైర్హాజరు కావడం జరుగుతుంది, దీని ఫలితంగా వారు చదువులను మధ్యలోనే ఆపేయాల్సి వస్తుంది. రెండవది, ఆరోగ్యం.

దీర్ఘకాలికంగా మత్తు పదార్థాలను వాడటం వల్ల కాలేయం, మెదడ, నాడీ వ్యవస్థ పూర్తిగా దెబ్బతింటాయి. మానసిక సమస్యలు, కుంగుబాటు (డిప్రెషన్‌) మరియు ఆందోళన వంటి సమస్యలు పెరుగుతాయి. మూడవది, కుటుంబ సంబంధాలు. యువత తమ వ్యసనం కోసం అబద్ధాలు ఆడటం, డబ్బు దొంగిలించడం వంటివి చేయడం వల్ల కుటుంబంలో కలహాలు పెరుగుతాయి, తల్లిదండ్రులు, తోబుట్టువుల మధ్య నమ్మకం పూర్తిగా సన్నగిల్లుతుంది. ఈ విధమైన నష్టం కారణంగా, దేశం యొక్క భవిష్యత్తుకు కీలకమైన మానవ వనరు (హ్యూమన్‌ రిసోర్స్‌) దెబ్బతింటోంది.

సామాజిక విధ్వంసం

యువత మత్తు పదార్థాలకు బానిసలుగా మారడం వ్యక్తిగత సమస్యగానే కాకుండా, సామాజిక భద్రతకు తీవ్రమైన ముప్పుగా పరిణమిస్తుంది. మత్తులో ఉన్నప్పుడు విచక్షణ కోల్పోయి నేరాలకు పాల్పడే అవకాశం పెరుగుతుంది. వ్యసనాన్ని కొనసాగించడం కోసం డబ్బు సంపాదించాలనే ఆలోచనతో దొంగతనాలు, దోపిడీలు, కొన్నిసార్లు హత్యలు వంటి ఘోరమైన నేరాలకు కూడా పాల్పడుతున్నారు. ఈ విధంగా, వీరు కేవలం తమ జీవితాలనే కాకుండా, సమాజంలో శాంతి భద్రతలను కూడా నాశనం చేస్తున్నారు.మత్తు పదార్థాల ప్రభావంతో వీరు రోడ్డు ప్రమాదాలకు గురవడం, లేదా ఇతరుల జీవితాలను ప్రమాదంలోకి నెట్టడం వంటివి కూడా జరుగుతున్నాయి. ఇది సమాజంలో భయాన్ని, అస్థిరతను పెంచుతుంది.

నిపుణుల సూచనలు
యువత ఈ విధంగా పెడదారి పడుతుండటం చూసి తల్లిదండ్రులు పెద్దలు తీవ్రమైన ఆందోళనలో ఉన్నారు. తమ పిల్లలను ఈ వ్యసనం నుండి ఎలా రక్షించుకోవాలి, వారికి ఎలా మార్గనిర్దేశం చేయాలి అనే విషయంలో వారు సతమతమవుతున్నారు. ఈ సమస్యకు పరిష్కారం కేవలం చట్టపరమైన చర్యల ద్వారానే కాకుండా, సమగ్రమైన సామాజిక కృషి ద్వారా సాధ్యమవుతుందని నిపుణులు సూచిస్తున్నారు. విద్యా సంస్థలు తమ పాఠ్యాంశాలలో మత్తు పదార్థాల వల్ల కలిగే హాని గురించి అవగాహన కార్యక్రమాలను కచ్చితంగా చేర్చాలి. కుటుంబాలు పిల్లలతో ఎక్కువ సమయం గడపాలి, వారి ఒత్తిడిని అర్థం చేసుకోవాలి, వారు ఎటువంటి స్నేహితులతో తిరుగుతున్నారో నిశితంగా గమనించాలి. యువతలో స్వీయ నియంత్రణ, మానసిక ధైర్యాన్ని పెంచే కార్యక్రమాలు అవసరం.

పరిష్కార మార్గాలు: ఉమ్మడి బాధ్యత
ఈ మత్తు పదార్థాల సమస్యను ఎదుర్కోవడానికి ప్రభుత్వం, విద్యాసంస్థలు, కుటుంబాలు కలిసికట్టుగా కృషి చేయాలి. ప్రభుత్వం అక్రమ మత్తు పదార్థాల సరఫరాను, అమ్మకాలను అరికట్టడానికి మరింత కఠినమైన చట్టాలను అమలు చేయాలి. ముఖ్యంగా విద్యా సంస్థల సమీపంలో వీటి విక్రయాలను పూర్తిగా నిషేధించాలి.

వ్యసనానికి బానిసలైన యువత కోసం తగినన్ని పునరావాస కేంద్రాలు (రీహాబిలిటేషన్‌ సెంటర్స్‌) ఏర్పాటు చేయాలి, అక్కడ వారికి వైద్యపరమైన మరియు మానసిక కౌన్సెలింగ్‌ అందించాలి. యువత తమ సమయాన్ని నిర్మాణాత్మకమైన కార్యకలాపాలు, క్రీడలు, సృజనాత్మక అంశాలపై దృష్టి సారించేలా ప్రోత్సహించాలి. ఈ విధంగా ఉమ్మడి బాధ్యతతో పనిచేసినప్పుడే, మనం ఈ యువతరాన్ని మత్తు కోరల నుండి రక్షించి, వారికి నిజమైన బంగారు భవిష్యత్తును అందించగలుగుతాము.

The post ‘మత్తు’..యువత చిత్తు!..బంగారు భవిష్యత్తు పెడదారి appeared first on VEDHA NEWS.

• అధ్యక్షులుగా ఎర్ర గిరిధర్

వేద న్యూస్,బోయినిపల్లి:

 రాజన్న సిరిసిల్ల జిల్లా బోయినిపల్లి మండలం తడగొండ బీసీ కాలనీలో యువకులు ఆదివారం సమావేశం ఏర్పాటు చేసుకొని నూతనంగా బీసీ కాలనీ ఫ్రెండ్స్ యూత్ అసోసియేషన్ నూతన కార్యవర్గం ఎన్నుకున్నారు.

ప్రెసిడెంట్ గా ఎర్ర గిరిధర్, వైస్ ప్రెసిడెంట్ ఎస్.కె గౌషాత్ , సెక్రెటరీ బొమ్మన ప్రదీప్, క్యాషియర్ గరిగంటి వెంకటేష్, గౌరవ అధ్యక్షులుగా దూస వెంకటేష్ , ముఖ్య సలహాదారుడు దూస సంజీవ్, కార్యవర్గ సభ్యులు బత్తిని రాజు, ఎస్.కె.షాదుల్ , పిట్టల అఖిల్ , ఎర్ర చరణ్ , ఊకంటి సతీష్ లను ఎన్నుకున్నారు.

ఈ నూతన కార్యవర్గ ఎన్నికకు సహకరించిన కమిటీ సభ్యులకు అందరికీ హృదయపూర్వక ధన్యవాదాలు తెలిపారు.

The post బీసీ కాలనీ ఫ్రెండ్స్ యూత్ అసోసియేషన్ నూతన కార్యవర్గం appeared first on VEDHA NEWS.

• గ్రూప్- 2 లో మెరిసిన కమలాపూర్ వాసి
• ఎక్సయిజ్ డిపార్ట్‌మెంట్‌ ఎస్ఐగా ఎంపిక
• పట్టుదలతో ముందుకు సాగి లక్ష్యాన్ని ముద్దాడిన యువకుడు 
• యువతకు ఆదర్శంగా జడల నరేశ్

వేద న్యూస్, హుజూరాబాద్ ప్రతినిధి:

రాష్ట్ర ప్రభుత్వం ఆదివారం వెలువరించిన గ్రూప్-2 ఫలితాల్లో కమలాపూర్ మండల కేంద్రానికి చెందిన జడల నరేష్ అనే యువకుడు 299 ర్యాంకు సాధించి ఎక్సయిజ్ డిపార్ట్ మెంట్ ఎస్సైగా సెలెక్ట్ అయ్యారు. దీంతో నరేశ్ కుటుంబ సభ్యులు, సన్నిహితులు, గ్రామస్తులు సంతోషం వ్యక్తం చేశారు. 

చిన్నతనంలోనే తండ్రిని కోల్పోయినా కానీ తల్లి ప్రోద్బలంతో అనుకున్న లక్ష్యాన్ని సాధించి నేటి యువతకు ఆదర్శంగా నరేష్ నిలిచారని పలువురు పేర్కొన్నారు. నరేశ్ కు కమలాపూర్ యువత గ్రామస్తుల తో పాటు పలువురు ప్రజాప్రతినిధులు శుభాకాంక్షలు, అభినందనలు తెలిపారు.

ఒకటి నుండి పదవ తరగతి వరకు కమలాపూర్లో చదువుకున్న నరేశ్.., బిటెక్ పూర్తి చేసి పోటీ పరీక్షలకు సన్నద్ధం అయ్యాడు. గత కొద్దిరోజుల క్రితం గ్రూప్-4 లో జూనియర్ అసిస్టెంట్ గా సెలెక్ట్ అయి హసన్ పర్తి తహసిల్దార్ ఆఫీస్ లో జూనియర్ అసిస్టెంట్ గా విధులు నిర్వహిస్తూనే.. గ్రూప్ 2 కు ప్రిపేర్ అయ్యాడు. తాజాగా విడుదలయిన ఫలితాల్లో గ్రూప్-2 గెజిటెడ్ అధికారిగా ఎంపిక కావడం పట్ల నరేశ్ తో పాటు ఆయన కుటుంబ సభ్యులు, సన్నిహితుల్లో సంతోషం వ్యక్తమయింది.

‘ఫైర్’మెన్ టు గ్రూప్-2 ఆఫీసర్.. ఎక్సయిజ్ ఎస్ఐగా కనగర్తివాసి కొత్త రాజు

The post తల్లి ప్రోద్బలంతో లక్ష్యఛేదన.. గ్రూప్-2 అధికారిగా కమలాపూర్‌వాసి జడల నరేశ్ appeared first on VEDHA NEWS.

• అన్నదానం మహాదానం

 వేద న్యూస్,వరంగల్: 

 గణపతి నవరాత్రుల ఉత్సవాల సందర్భాన్ని పురస్కరించుకొని ఆటో నగర్ లోని బాల గణపతి యూత్ అసోసియేషన్ ఆధ్వర్యంలో మంగళవారం అన్నదాన కార్యక్రమాన్ని నిర్వహించారు. అన్నదాతలు ముద్దు రాజు-శారదా కుటుంబం సభ్యులు అన్నదానం నిర్వహించారు.

అన్ని దానాలలోకెల్లా అన్నదానం మహాదానమని, భగవంతుడి సన్నిధిలో అన్న ప్రసాద స్వీకరణ ఆధ్యాత్మిక భావనను పెంపొందిస్తుందని అన్నదాతలు వెల్లడించారు. లంబోధరుడు, ఏకదంతుడు, తొలి పూజలు అందుకునే భగవంతుడు బొజ్జ గణపయ్యను.. అందరికీ సిద్ధి, బుద్ధి ప్రసాదించాలని వేడుకున్నట్టు ఈ సందర్భంగా తెలిపారు. వినాయక చవితి సందర్భంగా ప్రతి ఒక్కరూ ఆధ్యాత్మిక భావనలో హాయిగా భగవంతుడిని తలుచుకోవడం, గణనాథుడి స్మరణలో సమయం గడపడం చక్కటి విషయమేనని భక్తులు పేర్కొన్నారు.

కార్యక్రమంలో బాల గణపతి యూత్ అసోసియేషన్ సభ్యులు, స్థానిక పెద్దలు, మహిళలు, భక్తులు అధిక సంఖ్యలో పాల్గొన్నారు.

The post ఏకదంతుడి సన్నిధిలో ఘనంగా అన్నసంతర్పణ appeared first on VEDHA NEWS.

• సీనియర్ సివిల్ జడ్జి టి నాగేశ్వరరావు

వేద న్యూస్ కోరుట్ల ప్రతినిధి:

మత్తు పదార్థాలకు బానిసగా మారి, నేటి యువత తమ విలువైన జీవితాల్ని చిత్తు చేసుకోవద్దని, డ్రగ్స్ పై కఠినవైఖరి అవలంభించా టిలని మెట్ పల్లి సీనియర్ సివిల్ జడ్జి డి. నాగేశ్వర్ రావు అన్నారు. గురువారం మండల్ లీగల్ సర్వీసెస్ కమిటీ, మెట్ పల్లి ఆధ్వర్యంలో నిర్వహించిన అంతర్జాతీయ మాదకద్రవ్యాల దుర్వినియోగం అక్రమ రవాణా వ్యతిరేక దినోత్సవం సందర్భంగా మనోహర్ గార్డెన్ లో ఏర్పాటు చేసిన న్యాయ విజ్ఞాన సదస్సులో ఆయన పాల్గొన్నారు.

ఈ సందర్బంగా ఆయన మాట్లాడుతూ, వివిధ రకాల మాదక ద్రవ్యాలు విద్యార్థులకు అందుబాటులోకి రావడం దురదృష్టకరం అన్నారు. (మాదకద్రవ్యాల దుర్వినియోగ బాధితులకు చట్టపరమైన సేవలు మాదకద్రవ్యాల ముప్పు నిర్మూలన) 2015 పథకం నేటి యువతని రక్షించడం కోసం ప్రభుత్వం రూపొందించినప్పటికి దాని గూర్చి అవగాహన లేక నేటి విద్యార్థులు, యువత మత్తులో చిత్తవుతున్నారని ఆవేదన వ్యక్తం చేసారు.

పోలిసులు కూడా డ్రగ్స్ వాడకం మరియు విక్రయ ప్రాంతాలపై దృష్టి సారించి వ్యాపారులపై ఉక్కుపాదం మోపాలని సూచించారు. డ్రగ్స్ ఆకర్షణకు నేటి టీనేజ్ విద్యార్థులు దూరంగా ఉండి, చదువుపై మాత్రమే దృష్టి సారిస్తే భవిష్యత్తు బంగారు మయం అవుతుందన్నారు. అనంతరం పోలీస్ శాఖ రూపొందించిన వివిధ నినాదాలు గల పోస్టర్లని ఆయన ఆవిష్కరణ చేసారు.

ఈ కార్యక్రమం లో మెట్ పల్లి డియస్పి అట్లూరి రాములు, సీఐ అనిల్ కుమార్, ఎక్షయిజ్ సీఐ వినోద్ కుమార్, ఎస్సై కిరణ్ కుమార్, మండల విద్యా అధికారి మేకల చంద్రశేఖర్, బార్ అసోసియేషన్ అధ్యక్షులు కంతి మోహన్ రెడ్డి , ఉపాధ్యక్షులు తోగిటి రాజశేఖర్,అడిషనల్ పబ్లిక్ ప్రాసిక్యూటర్ చెర్లపల్లి ఆనంద్ గౌడ్, అసిస్టెంట్ గవర్నమెంట్ ప్లీడర్ అబ్దుల్ హఫీజ్, బార్ అసోసియేషన్ సభ్యులు మరియు వివిధ పాఠశాలకు చెందిన దాదాపు 1000 మంది విద్యార్థులు తదితరులు పాల్గొన్నారు.

The post మత్తులో యువత జీవితాలు చిత్తు చేసుకోవద్దు  appeared first on VEDHA NEWS.

వేద న్యూస్, వరంగల్:

భారతీయ స్టేట్ బ్యాంకు (ఎస్బీఐ) – గ్రామీణ స్వయం ఉపాధి శిక్షణా సంస్థ వారు నిరుద్యోగ యువతులకు ఉపాధి కల్పనకు చక్కటి అవకాశం కల్పిస్తున్నట్టు పేర్కొన్నారు. బ్యూటీ పార్లర్ మేనేజ్‌మెంట్ కోర్సుకు సంబంధించి 35 రోజుల పాటు ట్రైనింగ్ ఇవ్వనున్నట్టు సంస్థ డైరెక్టర్ బాస రవి తెలిపారు. ఇందుకు అభ్యర్థులు వరంగల్ రూరల్, హనుమకొండ ,జయశంకర్ భూపాలపల్లి, జనగాం, ములుగు మహబూబాబాద్ జిల్లాల వారై ఉండాలని స్పష్టం చేశారు. ఆసక్తి గల వారు దీనికి అప్లయ్ చేసుకోవచ్చని వెల్లడించారు. 

క్యాండిడేట్స్ వయోపరిమితి 18-45 ఏండ్లు ఉండాలని,  తెలుగు లో చదవటం, రాయటం వచ్చి ఉండాలని,  చదువు కొనసాగిస్తున్న విద్యార్థులు అర్హులు కాదని,  తెలుపు రేషన్ కార్డ్ కలిగి ఉండాలని పేర్కొన్నారు. 

ఆసక్తి గల అభ్యర్థులు 4 పాస్స్ పోర్ట్ సైజు  ఫొటోలు, రేషన్ కార్డ్, ఆధార్ కార్దు, విద్యార్హత జిరాక్స్ కాపీలను తీసుకోని భారతీయ స్టేట్ బ్యాంకు – గ్రామీణ స్వయం ఉపాధి శిక్షణా సంస్థ (SBI RSETI)సంస్కృతి విహార్ టీటీడీసీ, హసన్‌పర్తి, వరంగల్ జిల్లా – 506 371, అడ్రస్‌ లో వచ్చే నెల 7 లోగా పేర్లు నమోదు చేసుకోవాలని స్పష్టం చేశారు. 

శిక్షణ కార్యక్రమం వచ్చే నెల 7 నుంచి ప్రారంభం కానుందని,  శిక్షణ కాలంలో ఉచిత భోజనం, వసతి సదుపాయం కల్పిస్తామని, కోర్సుకు సంబంధించిన మెటీరియల్ కూడా ఫ్రీగా ఇస్తామని చెప్పారు. శిక్షణ పూర్తి చేసిన అభ్యర్థులకు యోగ్యతా పత్రం (సర్టిఫికేట్) ఇవ్వనున్నట్టు వెల్లడించారు.  మరిన్ని వివరాలకు, 97040 56522 , 9849307873, 6281260878,9949108934 నంబర్లలో సంప్రదించొచ్చని స్పష్టం చేశారు. ఈ కోర్సులో జాయిన్ అయ్యేందుకు మున్సిపల్ నివాస ప్రాంత అభ్యర్థులు అనర్హులని పేర్కొన్నారు.  

The post నిరుద్యోగ యువతులకు గొప్ప సదవకాశం.. 35 రోజుల పాటు శిక్షణ, అనంతరం ఉపాధి.. ఎక్కడంటే? appeared first on VEDHA NEWS.

నా ప్రియమైన మాతృభూమిని నేను చూస్తున్నప్పుడు, దాని భవిష్యత్తు గురించి నేను భయపడుతున్నా. అల్లకల్లోలం, అనిశ్చితి తుఫానులతో చుట్టుముట్టబడి దేశం ఉంది. రేపటి తరాల ఆలోచన నా హృదయాన్ని భారంగా మారుస్తోంది. మనం వదిలి వెళ్లే ప్రపంచం అవకాశాల కంటే సమస్యల వారసత్వంగా ఉండవచ్చని నేను భయపడుతున్నా. చిన్నప్పుడు మనం విన్న గొప్ప గొప్ప వీరులు, పూర్వీకులు, స్వాతంత్ర్య సమరయోధుల కథలను ఆదర్శంగా భావించాం. వాటిని యువత అంతగా పట్టించుకున్నట్టు కనిపిస్తలేదు. యువత‌పైనే దేశ భవిష్యతు ఆధారపడి ఉంది. గొప్ప ఆలోచనతో ఉండాల్సిన యువత తప్పు దారిలో పోతే దేశ భవిష్యత్తు ఏంటి? అనేది ప్రశ్నగానే మిగులుతోంది. ప్రపంచంలో అన్ని దేశాల కన్న ఎక్కువ యువత భారతదేశంలో ఉంది. ఆ యువత పెడదోవ పడుతుండటం ఆందోళన కలిగిస్తోంది.

మాదకద్రవ్యాలు, విధ్వంసక ఆకర్షణకు ఎక్కువగా యువత లొంగిపోతున్నది. వ్యసనం, వినాశకరమైన ప్రభావాలకు లోనై.. శక్తిమంతమైన తమ సామర్థ్యాన్ని యువత కోల్పోతున్నది. తరచుగా మోహం.. నీడలలో ఉండి, ముందు ఉన్న విస్తారమైన అవకాశాలను పట్టించుకోవడం లేదు. జెండాలు పట్టి జగం ఏలుతున్నట్టు భావిస్తున్నది కానీ, పగ్గాలు పట్టి వారిని నడిపిస్తున్నది ఎవరో తెలుసుకోక తప్పు దారి పడుతున్నది. భవిష్యత్తులో వచ్చే విపత్తులు గుర్తించక తాత్కాలిక సంతోషం కోసమే బతుకుతున్నది.

అలా యువత తమ విలువైన యవ్వనాన్ని దేనికి పనికి రాకుండా తెలియకుండానే వృథా చేస్తున్నది. కొందరు యువతీయువకులు తమ సోమరితనంతో తల్లిదండ్రులకు భారంగా మారుతున్నారు. తమ తల్లిదండ్రుల కలలను కాల్చి వేస్తున్నారు. రేపటి తరం బాగుండాలి అంటే ఇప్పుడు మనం కష్టపడాలి అనే భావన యువతలో కలగాలి. మన తల్లిదండ్రుల గౌరవాన్ని మన దేశ ఔన్నత్యాన్ని మనమే కాపాడాలి. ‘ఎముకలు కుళ్లిన వయసులు మళ్లినా సోమరులారా చావండి, నెత్తురు మండే శక్తులు నిండిన సైనికులారా రారండి’ అని శ్రీ శ్రీ ఇచ్చిన సందేశాన్ని స్వీకరించాలి. సైనికులై మన బాధ్యతలను మనం నిర్వర్తించాలి, మన భవిష్యత్తు తరాలకు బాటలు వేయాలి.

– ఎస్.వినీత్,(జగిత్యాలవాసి),
ఇండియన్ నేవీ పుణె(మార్కో),
సెల్: 91373 29184.

The post భవితకు యువత సైనికులై కష్టపడాలి appeared first on VEDHA NEWS.

వేద న్యూస్, వరంగల్:

నెక్కొండ మండలం గొట్లకొండ గ్రామంలో సంత్ సేవాలాల్ మహారాజ్ యూత్ అసోసియేషన్ ఆధ్వర్యంలో ఏర్పాటుచేసిన మండల క్రికెట్ క్రీడోత్సవాలు నిర్వహించారు. ఈ క్రికెట్ పోటీల్లో పాల్గొని విజేతలుగా నిలిచిన వారికి శుక్రవారం టీపీసీసీ సభ్యుడు సొంటి రెడ్డి రంజిత్ రెడ్డి బహుమతులు ప్రదానం చేశారు.

ఈ సందర్భంగా రంజిత్ రెడ్డి మాట్లాడుతూ గ్రామీణ ప్రాంతాల్లోని యువత క్రీడల్లో రాణించాలని సూచించారు. క్రీడల్లో గెలిచిన విజేతకు మొదటి బహుమతిని రూ.10 వేలతో పాటు ఫీల్డ్ బహూకరించారు. రెండో బహుమతిని నెక్కొండ మార్కెట్ కమిటీ చైర్మన్ రావుల హరీశ్ రెడ్డి , మండల కాంగ్రెస్ పార్టీ అధ్యక్షుడు బక్కి అశోక్ రూ.5 వేలర తో పాటు బహుమతి అందజేశారు.

కార్యక్రమంలో నెక్కొండ పట్టణ కాంగ్రెస్ అధ్యక్షుడు పెండ్యాల హరిప్రసాద్ ,మండల కాంగ్రెస్ నాయకులు కుసుమ చెన్నకేశవులు, చల్ల శ్రీపాల్ రెడ్డి , మార్కెట్ డైరెక్టర్ రావుల మైపాల్ రెడ్డి కున్సోత్ , నైజాం పోలిశెట్టి భాను ప్రకాష్ , ఎడ్ల వెంకన్న, కున్సోత్ శంకర్, గొట్లకొండ కాంగ్రెస్ పార్టీ అధ్యక్షుడు భూక్య జనార్ధన్, మాలో శివలాల్ , సంతు సేవాలాల్ మహారాజ్ యూత్ అధ్యక్షుడు గుగులోత్ వెంకన్న, ఉపాధ్యక్షుడు దారం సోప్ మహేష్ తదితరులు పాల్గొన్నారు.

The post యువత క్రీడల్లో రాణించాలి: టీపీసీసీ సభ్యుడు రంజిత్ రెడ్డి appeared first on VEDHA NEWS.

వేద న్యూస్, వరంగల్: 

సేవే లక్ష్యంగా ఏర్పాటైన ఆల్-అమన్ ఫౌండేషన్ సహకారంతో గ్రేటర్ వరంగల్ నగరం శంభునిపేట్ కి చెందిన తాహ కమిటీ సభ్యులు కుల, మతాలకు అతీతంగా నగరంలోని నిరుపేద కుటుంబాలకు నిత్యావసర సరుకులను పంపిణీ చేశారు. గత కొద్ది సంవత్సరాలుగా ముస్లిం యువత కలిసి నిరుపేదలకు బట్టలు, నిత్యావసర వస్తువులు పంపిణీ చేయడంతో పాటు పలువురికి ఆర్ధిక సహాయాన్ని అందిస్తూ సమాజంలో ఆదర్శంగా నిలుస్తున్నారు. ఈ సందర్భంగా తాహ కమిటీ సభ్యులు మాట్లాడుతూ ప్రతి ఒక్కరు సమాజ సేవలో ముందుండాలని అన్నారు. కులాలకు మతాలకు అతీతంగా సేవా కార్యక్రమాలు చేయాలని పిలుపునిచ్చారు.కాగా నగరంలో తాహ కమిటీ చేస్తున్న సేవ కార్యక్రమాలను చూసి పలువురు అభినందిస్తున్నారు.

The post సేవే లక్ష్యంగా తాహ కమిటీ..! appeared first on VEDHA NEWS.