• మర్రివానిపల్లిలో ఉచిత వైద్య శిబిరం 
• ఆదిత్య, అమృత ఆస్పత్రుల ఆధ్వర్యంలో..
•  ప్రజలకు ఫ్రీగా మెడిసిన్స్ అందజేత

వేద న్యూస్, ఇల్లందకుంట:

 ఇల్లంతకుంట మండలం మర్రివానిపల్లి గ్రామంలో బుధవారం జమ్మికుంట ఆదిత్య, అమృత ఆస్పత్రుల ఆధ్వర్యంలో ఉచిత వైద్య శిబిరం నిర్వహించారు. ప్రముఖ వైద్య నిపుణులు డాక్టర్ ఆకుల శ్రీనివాస్ జనరల్ మెడిసిన్, డాక్టర్ భరత్ న్యూరాలజిస్ట్ , డాక్టర్ గ్రీష్మ గైనకాలజిస్ట్ ఈ క్యాంపులో పాల్గొన్నారు. వైద్య పరీక్షలు నిర్వహించి రోగులకి ఉచిత షుగర్ పరీక్షలు చేసి అవసరమైన మందులు పూర్తి ఉచితంగా అందజేశారు.

ఇంత గొప్ప కార్యక్రమాన్ని నిర్వహించిన గ్రామ సర్పంచ్ మర్రి శ్రీనివాస్ రెడ్డి, ఉప సర్పంచ్ కడారి పద్మ – నవీన్, వార్డు సభ్యులు జుజాటి శ్రీవాణి, ఎడ్ల చిరంజీవి, ఎరుబాటి నాగరాజు, రౌతు రాజేష్, కోడం సంజీవ్, బైరి రవీందర్, ఏనుగు శోభారాణి ఇతర గ్రామ పెద్దలకు, ఆదిత్య, అమృత హాస్పిటల్ మేనేజింగ్ డైరెక్టర్ దేవేందర్ రెడ్డి కి ప్రత్యేక కృతజ్ఞతలు తెలియజేశారు.

గ్రామాల్లో పేదలకి ఉపయోగపడే మరిన్ని కార్యక్రమాలు చేపట్టడానికి, ముందు ముందు వివిధ గ్రామాలకు తమ ఉచిత వైద్య సేవలను అందజేయడంలో ఆదిత్య, అమృత హాస్పిటల్ యాజమాన్యం ముందుంటాయ ని దేవేందర్ రెడ్డి స్పష్టం చేశారు.

The post పేదలకు ఉచిత వైద్య సేవలు అందించడంలో ముందుంటాం: దేవేందర్ రెడ్డి appeared first on VEDHA NEWS.

వేద న్యూస్, వరంగల్ ప్రతినిధి :

ప్రజాస్వామ్య స్వరాన్ని అణచివేసే ప్రయత్నాలను సహించబోమని, ప్రజల హక్కులు, రాజ్యాంగ పరిరక్షణ కోసం కాంగ్రెస్‌ పార్టీ నిరంతరం పోరాడుతుందని వరంగల్ జిల్లా కాంగ్రెస్‌ పార్టీ అధ్యక్షుడు మహమ్మద్ అయూబ్ అన్నారు. ఉత్తరప్రదేశ్‌లో కాంగ్రెస్‌ అగ్రనేత, లోక్‌సభ ప్రతిపక్ష నేత రాహుల్‌ గాంధీపై కేసులు నమోదు చేయడాన్ని నిరసిస్తూ టీపీసీసీ ఆదేశాల మేరకు మంగళవారం వరంగల్‌ వెంకట్రామ జంక్షన్‌ వద్ద జిల్లా కాంగ్రెస్‌ ఆధ్వర్యంలో భారీ నిరసన ర్యాలీ నిర్వహించారు. ఈ సందర్భంగా కాంగ్రెస్‌ నాయకులు, కార్యకర్తలు రాహుల్‌ గాంధీకి మద్దతుగా నినాదాలు చేస్తూ, కేసులను వెంటనే ఉపసంహరించుకోవాలని డిమాండ్‌ చేశారు. అనంతరం అయూబ్‌ మాట్లాడుతూ.. “రాహుల్‌ గాంధీ ప్రజల తరఫున ప్రశ్నిస్తున్నారు. ప్రజల హక్కులు, ప్రజాస్వామ్యం, రాజ్యాంగ పరిరక్షణ కోసం పోరాడుతున్న నాయకుడిపై కేసులు పెట్టి ఆయన గొంతును అణచివేయాలని చూడటం సరికాదు. ప్రశ్నించే గొంతును కేసులతో అణచివేయాలని చూస్తే కాంగ్రెస్‌ పార్టీ చూస్తూ ఊరుకోదు” అని స్పష్టం చేశారు. రాజకీయంగా ఎదుర్కోలేక కేసుల పేరుతో రాహుల్‌ గాంధీ గొంతును నొక్కాలని చూస్తున్నారని ఆరోపించారు. ఇది ఒక్క రాహుల్‌ గాంధీపై జరుగుతున్న దాడి కాదని, ప్రజాస్వామ్యంపై జరుగుతున్న దాడిగా అభివర్ణించారు. ప్రతిపక్షానికి ప్రశ్నించే హక్కు ఉందని, అధికారంలో ఉన్న వారు విమర్శలను స్వీకరించి ప్రజలకు జవాబుదారీగా వ్యవహరించాలని సూచించారు. రాహుల్‌ గాంధీపై ఎన్ని కేసులు పెట్టినా ఆయన ప్రజా పోరాటాన్ని ఆపలేరు. దేశవ్యాప్తంగా కాంగ్రెస్‌ శ్రేణులు ఆయనకు అండగా నిలుస్తాయి. కాంగ్రెస్‌ పోరాటం వ్యక్తుల కోసం కాదు.. ప్రజాస్వామ్యం కోసం, రాజ్యాంగ పరిరక్షణ కోసం, ప్రజల హక్కుల కోసం” అని అయూబ్‌ పేర్కొన్నారు. రాహుల్‌ గాంధీపై నమోదు చేసిన కేసులను వెంటనే ఉపసంహరించుకోవాలని, రాజకీయ కక్ష సాధింపు ధోరణిని విడనాడాలని కేంద్ర, ఉత్తరప్రదేశ్‌ ప్రభుత్వాలను ఆయన డిమాండ్‌ చేశారు. ప్రజాస్వామ్య హక్కులకు భంగం కలిగించే చర్యలను కాంగ్రెస్‌ పార్టీ ప్రజాస్వామ్య పద్ధతుల్లో తీవ్రంగా ప్రతిఘటిస్తుందని తెలిపారు.ఈ కార్యక్రమంలో కార్పొరేషన్‌ చైర్మన్‌ సంఘ్ వెంకటరాజ్యం, జిల్లా ఎస్సీ సెల్‌ చైర్మన్‌ చిలువేరు శ్రీనివాస్, యూత్‌ కాంగ్రెస్‌ జిల్లా అధ్యక్షుడు కొరివి పరమేష్, మాజీ కార్పొరేటర్‌ గుండేటి నరేందర్, జిల్లా కాంగ్రెస్‌ నాయకులు నల్గొండ రమేష్, వర్ధన్నపేట మండల అధ్యక్షుడు పోశాల వెంకన్న, టౌన్‌ అధ్యక్షుడు ఈగ దామోదర్‌ తదితరులు పాల్గొన్నారు. వివిధ సెల్‌ల నాయకులు, ప్రజాప్రతినిధులు, మండల, టౌన్, డివిజన్‌ నాయకులు, కార్యకర్తలు పెద్ద సంఖ్యలో హాజరయ్యారు.

The post రాహుల్‌ గాంధీపై ఎన్ని కేసులు పెట్టినా ఆయన ప్రజా పోరాటాన్ని ఆపలేరు : డీసీసీ అధ్యక్షుడు అయూబ్ appeared first on VEDHA NEWS.

వేద న్యూస్, వరంగల్ క్రైమ్ :

వరంగల్ పోలీస్ కమిషనరేట్ పరిధిలో 22 మంది ఇన్‌స్పెక్టర్లను బదిలీ చేస్తూ వరంగల్ పోలీస్ కమిషనర్ ఎన్. శ్వేత సోమవారం ఉత్తర్వులు జారీ చేశారు. పరిపాలనా కారణాలపై తక్షణమే అమల్లోకి వచ్చేలా ఈ బదిలీలు చేపట్టినట్లు ఉత్తర్వుల్లో పేర్కొన్నారు. బదిలీల్లో భాగంగా ఎస్. శ్రీనివాస్‌ను గణపురం ఎస్‌హెచ్‌ఓగా, జి. వేణును రఘునాథపల్లి సర్కిల్ సీఐగా, ఎ. శ్రీనివాస్‌ను వరంగల్ సీఎస్‌బీకి, పి. దేవేందర్‌ను నర్మెట్ట సర్కిల్ సీఐగా నియమించారు. అలాగే టి. రవి కుమార్‌ను వరంగల్ డబ్ల్యూపీఎస్-II ఎస్‌హెచ్‌ఓగా, ఎ. సువర్ణను వరంగల్ సీసీఎస్‌కు బదిలీ చేశారు. పి. మంగీలాల్‌ను టాస్క్‌ఫోర్స్‌కు, భరత్ సుమన్‌ను పాలకుర్తి సర్కిల్ సీఐగా, వి. జానకీ రామ్‌రెడ్డిని వరంగల్ సీఎస్‌బీకి, టి. కిరణ్‌ను పీసీఆర్‌కు పంపించారు. ఇక ఎ. ప్రవీణ్ కుమార్‌ను పర్కల్ ఎస్‌హెచ్‌ఓగా, వి. క్రాంతి కుమార్‌ను వరంగల్ టాస్క్‌ఫోర్స్‌కు, అనుముల శ్రీనివాస్‌ను ధర్మసాగర్ ఎస్‌హెచ్‌ఓగా, జి. బాబులాల్‌ను ఆత్మకూరు ఎస్‌హెచ్‌ఓగా నియమించారు. ఆర్. సంతోష్‌ను పర్వతగిరి సర్కిల్ సీఐగా, బి. రాజగోపాల్‌ను టాస్క్‌ఫోర్స్‌కు బదిలీ చేశారు. కె. శ్రీను ఎల్కతుర్తి సీఐగా, పి. రమేష్ హనుమకొండ డబ్ల్యూపీఎస్-I ఎస్‌హెచ్‌ఓగా, కె. సూర్య ప్రసాద్ సీటీసీ వరంగల్‌కు, కె. సాయి రమణను వరంగల్ సీఎస్‌బీకి బదిలీ చేశారు. వై. సంజీవరావును వర్ధన్నపేట సీఐగా, కె. శ్రీనివాసరావును వరంగల్ సీసీఆర్‌బీకి నియమించారు. బదిలీ అయిన అధికారులు వెంటనే రిలీవ్ అయి, కొత్త పోస్టింగ్‌లలో విధుల్లో చేరాలని పోలీస్ కమిషనర్ ఆదేశించారు. సంబంధిత ఏసీపీలు ఈ మేరకు అవసరమైన చర్యలు తీసుకోవాలని ఉత్తర్వుల్లో సూచించారు.

The post వరంగల్ పోలీస్ కమిషనరేట్‌లో 22 మంది ఇన్‌స్పెక్టర్ల బదిలీ appeared first on VEDHA NEWS.

వేద న్యూస్, చిల్పూరు: చిల్పూరు మండలం చిన్నపెండ్యాల గ్రామంలో గ్రామదేవత పోచమ్మ తల్లి బోనాల ఉత్సవాలను భక్తిశ్రద్ధలతో ఘనంగా నిర్వహించారు. ఈ సందర్భంగా మహిళలు సంప్రదాయ దుస్తులు ధరించి నెత్తిన బోనాలు ఎత్తుకుని డప్పు చప్పుళ్లు, మంగళవాయిద్యాల నడుమ ఊరేగింపుగా అమ్మవారి ఆలయానికి చేరుకున్నారు.ఆలయంలో పోచమ్మ తల్లికి ప్రత్యేక పూజలు నిర్వహించి బోనాలు, నైవేద్యాలు సమర్పించి మొక్కులు చెల్లించుకున్నారు. గ్రామ ప్రజలు ఆయురారోగ్యాలతో, సుఖసంతోషాలతో ఉండాలని, పాడిపంటలు సమృద్ధిగా పండాలని అమ్మవారిని ప్రార్థించారు. బోనాల సందర్భంగా గ్రామంలో ఆధ్యాత్మిక వాతావరణం నెలకొంది. మహిళలు, యువత, చిన్నారులు పెద్ద సంఖ్యలో పాల్గొని వేడుకలను విజయవంతం చేశారు. డప్పుల మోతలు, భక్తుల సందడి మధ్య పోచమ్మ బోనాల వేడుకలు కన్నుల పండువగా సాగాయి.

The post చిన్నపెండ్యాలలో ఘనంగా పోచమ్మ బోనాలు appeared first on VEDHA NEWS.

అడవులు మన భవిష్యత్తు – చట్టాల అమలు రాజీలేని బాధ్యత!

అడవులు కేవలం అందమైన ప్రకృతి దృశ్యాలు మాత్రమే కాదు; వర్షపాతం, భూగర్భ జలాలు, గాలి నాణ్యత మరియు జీవవైవిధ్యాన్ని కాపాడే జీవనాధార వ్యవస్థలు. ముఖ్యంగా రిజర్వ్ ఫారెస్టులు అరుదైన వన్యప్రాణులు, మొక్కలు మరియు జలచరాలకు సురక్షిత ఆశ్రయాలు. *రిజర్వ్ ఫారెస్టుల్లో జలవనరుల ప్రాముఖ్యత:* అడవుల్లోని కుంటలు, వాగులు, చెరువులు అటవీ జీవవ్యవస్థకు గుండెకాయ లాంటివి. ఆహార గొలుసులో చేపలు మరియు ఇతర జలచరాలు అత్యంత కీలకం. అక్రమంగా చేపలు పట్టడం వల్ల వన్యప్రాణులకు, నీటిపక్షులకు తీవ్రమైన ఆహార కొరత ఏర్పడి జీవవైవిధ్యం దెబ్బతింటుంది. పైగా అక్రమంగా చేపలు పట్టేవారు వాడే కరెంట్, విష రసాయనాలు మరియు నాటు వలల వల్ల నీరు కలుషితమై, ఇతర జీవులు కూడా నాశనమవుతున్నాయి. 

*చట్టపరమైన రక్షణ & రాజ్యాంగ బాధ్యత:* భారతదేశంలో అటవీ సంపద రక్షణకు బలమైన చట్టాలు ఉన్నాయి: 

*వన్యప్రాణి (సంరక్షణ) చట్టం, 1972 & భారత అటవీ చట్టం, 1927:* అనుమతి లేకుండా రిజర్వ్ ఫారెస్టుల్లోకి ప్రవేశించడం, చేపలు పట్టడం, వేటాడటం లేదా ఆక్రమణలు చేయడం తీవ్రమైన నేరాలు.

*జీవవైవిధ్య చట్టం, 2002:* జీవవనరుల దుర్వినియోగాన్ని అరికడుతుంది.

*భారత రాజ్యాంగంలోని ఆర్టికల్ 51ఏ (జి):* అడవులు, సరస్సులు, నదులు మరియు వన్యప్రాణులను కాపాడటం ప్రతి పౌరుడి ప్రాథమిక బాధ్యతగా పేర్కొంటోంది.

*గిరిజన హక్కులు vs పర్యావరణ పరిరక్షణ:* అడవులపై శతాబ్దాలుగా ఆధారపడిన గిరిజనుల హక్కులు అటవీ హక్కుల చట్టం, 2006 ప్రకారం రక్షించబడినప్పటికీ, అవి వారి కుటుంబ స్వయం సమృద్ధికి మాత్రమే పరిమితం. సాంప్రదాయ హక్కుల పేరుతో బయటి వ్యక్తులు లేదా దళారుల ప్రమేయంతో వాణిజ్య ప్రయోజనాల కోసం అడవులను, జలవనరులను దోచుకోవడం పూర్తిగా చట్టవిరుద్ధం.

*అటవీ అధికారులకు సమాజం అండగా నిలవాలి:* అక్రమ ఆక్రమణలను, చేపల వేటను అరికడుతున్న అటవీ అధికారుల చర్యలు పూర్తిగా సమర్థనీయం. అయితే, కొంతమంది స్వార్థపరులు లేదా రాజకీయ ప్రభావం ఉన్న వ్యక్తులు తమ స్వప్రయోజనాల కోసం విధుల్లో ఉన్న అధికారులను బెదిరించడం, భౌతిక దాడులకు దిగడం తీవ్రమైన నేరం. అటవీ రక్షణలో నిష్పాక్షికంగా పనిచేస్తున్న అధికారులకు ప్రభుత్వం, పోలీస్ యంత్రాంగం మరియు పౌర సమాజం పూర్తి అండగా నిలవాలి.

*ఇప్పుడు మన బాధ్యత:* వాతావరణ మార్పులు మరియు గ్లోబల్ వార్మింగ్ తీవ్రమవుతున్న ఈ కాలంలో అటవీ సంపదను రక్షించుకోవడం అత్యంత ఆవశ్యకం. అడవులను కాపాడుకోవడం ద్వారానే మన భవిష్యత్ తరాల మనుగడ సురక్షితమవుతుంది.

అక్రమాలకు వ్యతిరేకంగా నిలుద్దాం!

అటవీ అధికారులకు మద్దతుగా నిలుద్దాం!

అటవీ పర్యావరణ పరిరక్షణలో భాగస్వాములమవుదాం!

పిట్టల రవి బాబు పర్యావరణ వేత్త

The post అడవులు మన భవిష్యత్తు – చట్టాల అమలు రాజీలేని బాధ్యత! appeared first on VEDHA NEWS.

అడవుల పరిరక్షణ – అటవీశాఖపై దాడులు.. పర్యావరణ భవిష్యత్తుపై ముంచుకొస్తున్న ముప్పు

అటవీ శాఖ అధికారుల పట్ల ఖానాపూర్ ఎమ్మెల్యే వెడ్మ బొజ్జు ప్రదర్శిస్తున్న వైఖరిని తీవ్రంగా ఖండిస్తూ, పర్యావరణ పరిరక్షణతో పాటు ఉద్యోగుల ఆత్మగౌరవాన్ని కాపాడాలనే ఉద్దేశంతో ఈ ప్రకటన చేస్తున్నాం. రేయింబవళ్లు ప్రాణాలకు తెగించి అడవులను, వన్యప్రాణులను సంరక్షిస్తున్న అటవీ సిబ్బందిపై నడిరోడ్డుపై దౌర్జన్యం ప్రదర్శించడం అత్యంత దురదృష్టకరం. ప్రస్తుత ప్రభుత్వ శాసనసభ్యుడిగా, వైల్డ్‌లైఫ్ బోర్డు సభ్యుడిగా, చట్టంపై అవగాహన కలిగిన వ్యక్తిగా ఉండి కూడా హైకోర్టు ఉత్తర్వులను ధిక్కరించడం ప్రజాస్వామ్యాన్ని అవమానించడమే. విధుల్లో ఉన్న సిబ్బందికి కనీస వసతులు కూడా నిరాకరిస్తూ “జంగిల్‌లోనే పడుకోవాలి” అనే హెచ్చరికలు జారీ చేయడం మానవ హక్కుల ఉల్లంఘనగా పరిగణించాలి. ఇక ఈకో-సెన్సిటివ్ జోన్‌లలో అక్రమ నిర్మాణాలు, ఇసుక స్మగ్లింగ్‌కు మద్దతు ఇవ్వడం చట్ట విరుద్ధం మాత్రమే కాకుండా ప్రకృతి సమతుల్యాన్ని భంగం చేసే చర్య.

సమస్యలను ప్రభుత్వ స్థాయిలో పరిష్కరించాల్సింది పోయి, క్షేత్రస్థాయిలో పనిచేసే చిన్న ఉద్యోగులపై ఒత్తిడి తేవడం అన్యాయం. గ్రామీణ ప్రాంతాల్లో అటవీశాఖ సిబ్బందిని అడ్డుకోవడం, జరిమానాలు విధిస్తామని బెదిరించడం రాజ్యాంగానికి విరుద్ధం. అమాయక గిరిజనులను రెచ్చగొట్టి అధికారులను శత్రువులుగా చూపించడం సమాజంలో విభేదాలను పెంచుతుంది. ఈ నేపథ్యంలో హైకోర్టు ఆదేశాలను గౌరవిస్తూ చట్టబద్ధ చర్యలు తీసుకోవడం, ప్రభుత్వం తక్షణమే జోక్యం చేసుకుని అధికారులకు రక్షణ కల్పించడం, శాంతియుత వాతావరణాన్ని నెలకొల్పడం, అలాగే విధులకు ఆటంకం కలిగించే వారిపై కఠిన చర్యలు తీసుకోవడం అత్యవసరం.

ఇక సిర్పూర్ నియోజకవర్గ ఎమ్మెల్యే డా. పాల్వాయి హరీష్ బాబు ప్రదర్శిస్తున్న వ్యాఖ్యలు మరియు వైఖరి తీవ్ర ఆందోళన కలిగించేవిగా ఉన్నాయి.

అడవులను “మీ ఇష్టమొచ్చినట్టుగా చేసుకోండి”, “ఎవరు అడ్డం వచ్చినా మీకు ఏం చేయాలో తెలుసు కదా” అంటూ ప్రజలను రెచ్చగొట్టడం, ముఖ్యంగా అటవీశాఖ అధికారులను లక్ష్యంగా చేసుకుని “అధికారులు అడ్డం వస్తే ఎలా ఎదుర్కోవాలో మీకు తెలుసు” అని ప్రోత్సహించడం పూర్తిగా చట్టవిరుద్ధం మరియు ప్రజాస్వామ్య వ్యవస్థకు విరుద్ధమైన చర్య. అంతేకాకుండా “పోలీసులు కూడా మీకు అడ్డం రారు” అని చెప్పడం ద్వారా ప్రజల్లో చట్టానికి భయం లేకుండా చేసే ప్రయత్నం స్పష్టంగా కనిపిస్తోంది.

ప్రభుత్వ అధికారుల సమక్షంలోనే ఇటువంటి ప్రేరేపణాత్మక వ్యాఖ్యలు చేయడం, ప్రజలను తప్పుదోవ పట్టించడం, స్వార్థ రాజకీయ ప్రయోజనాల కోసం సమాజాన్ని అశాంతికి దారి తీసే విధంగా ప్రవర్తించడం తీవ్రంగా ఖండించదగినది. ఇటువంటి చర్యలు అటవీ సంపద నాశనానికి, అధికారులపై దాడులకు దారి తీసే ప్రమాదం ఉన్నందున వెంటనే నియంత్రించాల్సిన అవసరం ఉంది.

నిజానికి అడవులను కాపాడే బాధ్యత భారత రాజ్యాంగం ప్రకరణ 51 ఏ/(జి) ప్రకారం అందరి బాధ్యత. అయితే అటవీ శాఖ అడవులను వన్యప్రాణులను కాపాడటం ఒక డ్యూటీ మాత్రమే కాదు అడవులను కాపాడే ప్రత్యేక బాధ్యత తీసుకుంటుంది. కానీ అది నేడు వారికి శాపమై కూర్చుంది. దానికి కారణం మనము మరియు మనం ఎంచుకున్న పాలకులు. ఇది ఎందుకు అంటున్నామంటే ఇటీవల కొన్ని రిజర్వ్ ఫారెస్ట్ లో అంటే మన తెలంగాణలోని అమ్రాబాద్ టైగర్ రిజర్వ్ మరియు కవాల్ టైగర్ రిజర్వ్ ఈ రెండు టైగర్ రిజర్వులలో ఇలాంటి సంఘటనలు ఎన్నో జరిగాయి. అటవీ శాఖ మీద దాడి, మరియు విచక్షణ రహితంగా అక్కడి ప్రజలు మరియు పాలకులు వారిని ఎన్నో ప్రయాసలకు గురి చేశారు. ఈమధ్య కొత్తగూడం ఫారెస్ట్ లోనే కావచ్చు,

జన్నారం ఫారెస్ట్ లోనే కావచ్చు మరియు ఉడుంపూర్ ఫారెస్ట్ లోనే కావచ్చు ఒక అటవీ శాఖనే బాధ్యులను చేస్తూ సహాయ నిరాకరణ చేయాల్సిందిగా అక్కడి లోకల్ ఎమ్మెల్యేలు మరియు ప్రజా సంఘాలు వారిని ఎండగడుతున్నారు, అంటే అటవీ శాఖ వారు అడవిని కాపాడడం తప్పా? గతంలో ఓ ఏం.ఎల్.ఎ. సోదరుడు డ్యూటీ నిర్వహిస్తు అక్రమాలను అడ్డుకున్న ఒక లేడీ అటవీ అధికారిణిని దౌర్జన్యంగా కొట్టి బెదిరించడం, డ్యూటీచేస్తున్న అటవీ క్షేత్ర అధికారిని వేటకొడవళ్ళతో నరికి హత్యచేసి చంపడం, ఓ అటవీ సెక్షన్ అధికారి ని హత్యప్రయతంగా కొట్టడం మొదలగు సంఘటనలు అటవీ అధికారుల పై రక్షణ లోపం అద్దం పడుతున్నాయి. అటవీ అధికారులు వారి డ్యూటీని సక్రమంగా చేస్తున్నారు కానీ కొందరు తమ రాజకీయ లబ్ధి కోసం మౌకికంగా పరోక్షంగా అటవీ అధికారులపై అక్కడి ప్రజలను అటవీ శాఖపై ఉసిగొల్పి వారిపై దాడి చేసే క్రమంగా రెచ్చగొడుతున్నారు.

ఒక అక్రమ ఇసుక రవాణా, అక్రమ కలప రవాణా, అక్రమంగా జంతువులను వేటాడి చంపటం ఇదంతా రిజర్వ్ ఫారెస్ట్ లో జరిగే నేరాలు. వీటిని అరికట్టడానికి ప్రజలు, ప్రజా సంఘాలు, లోకల్ నాయకులు, పాలకులు అందరూ సహకరించాలి. ఎందుకంటే అడవులు లేకుంటే జీవనం లేదు మన ముందు తరాలకు మనం ఏమిస్తాం..? ఆలోచించే అవసరం ఎంతైనా ఇప్పుడు ఉన్నది.

ఎక్కడో ఒక చిన్న సంఘటన ఫారెస్ట్ వారు లోకల్ ట్రైబ్స్ మీద అటాక్ చేశారని అదే అదనుగా మిగతా ఫారెస్ట్ సిబ్బందిని, అటవీ శాఖను కూడా ఇబ్బందికి గురి చేయడం మరియు వారికి ఆ గ్రామాల్లో సహాయ నిరాకరణ చేయటం అనేది ఎంతవరకు సమంజసం? మనం ఏమన్నా బ్రిటిష్ కాలంలో ఉన్నామా లేక అటవీ శాఖ వారు బ్రిటిష్ వాళ్ళా..? మనమేమైనా స్వాతంత్రోద్యమం చేస్తున్నామా? వారిపై తిరుగుబాటు చేయడానికి, వారు చేసే డ్యూటీకి మనం అడ్డుపడటం రాజ్యాంగ విరుద్ధం మరియు చట్ట విరుద్ధం, ఇది చెప్పాల్సింది పోయి అక్కడి పాలకులు ముఖ్యంగా ఎమ్మెల్యే ప్రజల అండతో అటవీ శాఖను దూషించడం, బహిర్గతంగా, మీడియా పరంగా బెదిరించడం, వారు గ్రామాల్లోకి వస్తే వారిపై దాడి చేయమని చెప్పడం ఒక పబ్లిక్ మీటింగ్లో మరియు కలెక్టర్, ఎస్పీ ల సమక్షంలో మరియు మీడియా సాక్షిగా ప్రచారం చేయడం జరిగింది. 

ఇదంతా చూస్తుంటే మనం ఏ కాలంలో ఉన్నాము అనేది మనకు మనం ప్రశ్నించుకోవాల్సి వస్తుంది. పాలించే ప్రభుత్వంలో ఉండి, డ్యూటీ చేస్తున్న అధికారుల విధులకు ఆటంక పరుస్తూ బెదిరించడం, జిల్లా పాలక యంత్రాంగం అయినా జిల్లా అటవీ అధికారుల, జిల్లా కలెక్టర్ల మరియు జిల్లా పోలీసు అధికారులముందే అటవీ అధికారులను బెదిరించే సంఘటనలను ఏమని తీసుకోవాలో ఆలోచిఅంచుకోవాల్సిన అవసర తరుణం ఇది. ఈ వార్నింగ్ ఒక రకంగా దౌర్జన్యం. ఇదే సహాయ నిరాకరణ అటవీ శాఖ వారు కూడా చేయాలని తలిస్తే ఈ అడవులు ఏమవుతాయి అనే ప్రశ్న మనకు మనం వేసుకోవాలి. దీనికి కారణం ప్రజలకు అటవీపట్ల అవగాహన లేకపోవడం దానికి సంబంధించిన పాలకులు వారికి సరిగా నచ్చజెప్పకపోవడం పైగా పోడును ప్రోత్సహించడం వాటిని అడ్డుకోవడానికి వెళ్లిన అటవీ శాఖను అందులో మహిళా సిబ్బందిని కూడా లెక్కచేయకుండా వారిపై విచక్షణారహితంగా కారం జల్లడం, కర్రలతోటి కొట్టడం, దూషించడం ఇలాంటి సంఘటనలు ఎన్నో చూసాం. దురదృష్టమేంటంటే అక్కడి ఎమ్మెల్యేలు వైల్డ్ లైఫ్ బోర్డ్ మెంబర్స్ గా ఉండి కూడా అటవీ శాఖకు సహకరించాల్సింది పోయి వారిపై దాడి చేయడానికి ప్రజలను ఉసికొల్పటం మరియు రెచ్చగొట్టడం ఏమిటో… ఇది ప్రజాస్వామ్య దేశమా? లేకుంటే నిరంకుశ పాలన గల దేశమా? అర్థం కావడం లేదు. ఒక ఖాకి యూనిఫామ్ గల పోలీస్ శాఖకు, ఆర్మీకి ఉన్న ప్రాముఖ్యత మన అటవీశాఖ ఖాకీ యూనిఫామ్ కు మనము విలువ ఇవ్వట్లేదు.

ఎన్నో సంఘటనల్లో పోలీస్ శాఖ మరియు కలెక్టర్లు కూడా వారికి సహకరించలేదు పైగా ఇది మా డ్యూటీ కాదు మీకు మీరే పరిష్కరించుకోవాలని ఉచిత సలహాలు ఇచ్చారు. 

ఒక అటవీ దినం సందర్భంగా పర్యావరణ దినం సందర్భంగా టైగర్ డే సందర్భంగా మరియు ఎన్నో అటవీ కి సంబంధించిన పండుగలను చేసుకుంటాం. అందులో ఎన్నో మాట్లాడతాం మొక్కలు నాటాలి, అడవులు కాపాడాలి, జంతువులను కాపాడాలి అని ఎన్నో నినాదాలు చేస్తూ పాఠశాల సంబంధించిన పిల్లలను తీసుకువచ్చి వాళ్లకు ఎన్నో హామీలు ఇస్తూ, ఎన్నో సూక్తులు చెప్పుతూ కార్యక్రమాలు చేస్తుంటాం, కానీ నిజానికి వస్తే ఇవేవీ వాస్తవంగా జరగట్లేదు. మన వాగ్దానాలు మరియు నినాదాలు అక్కడి కార్యక్రమం వరకే గాని క్షేత్రస్థాయిలో పూర్తిగా కార్యరూపం దాల్చటంలేదు.

ఇలాంటి దుష్పరిణామాలు పునరావృత్తం కాకుండా మనమందరం సంఘటితంగా ఉండి ఫారెస్ట్ డిపార్ట్మెంట్ వారికి సహకరించాలి. ఎందుకంటే ప్రజల ఆస్తులైన అడవులను వన్యప్రాణులను, అడవులలో ఉన్న సహజ వనరులను నిత్యం కాపాడే అటవీ అధికారులను, క్షేత్ర స్థాయిలో ఉండే అటవీ నిఘా ఉద్యోగుల వరకు మనం అందరం వారిని అర్ధంచేసుకొని వారికి అండగా ఉండాల్సిన సమయం ఇది. అడవిని మరియు వాటి చట్టాలను గౌరవించాలి. ఎలాగైతే రైల్వే కి సంబంధించిన వస్తువులను దొంగిలిస్తే జైలు పాలు అవుతామో అలాగే అటవీ సంపదను కూడా ఎవరైనా దొంగిలిస్తే జైలు పాలు కావాల్సిందే. 

ఎన్నో చట్టాలు ఆర్టీసీ, పోలీస్, రైల్వే, డాక్టర్స్, హాస్పిటల్స్ పైన దాడిని ఖండిస్తూ ప్రత్యేకమైన చట్టం ఉంది కానీ అటవీశాఖ పై దాడిని ఖండిస్తూ చట్టం ఉన్నా ఎవరు పట్టించుకోవట్లేదు పైగా వారిని ఇష్టమొచ్చినట్టు దూషించటం, దాడి చేయటం రాజ్యాంగ విరుద్ధంగా జరుగుతుంది.

ఈ చట్టావిరుద్ద పోకడలపై గౌరవనీయులైన అటవీ, పర్యావరణ మంత్రివర్యులు కూడా సానుకూలంగా స్పందించి అడవిని, అటవీ శాఖను కాపాడుకునే ప్రయత్నం చేసి ముఖ్యంగా రిజర్వ్ ఫారెస్ట్ లో అటవీ సిబ్బందిపై జరుగుతున్న అన్యాయాలను అక్కడి ప్రజలతో, పాలకులతో మాట్లాడి సమస్యను చట్టపరమైన కోణం దృష్టిలో పెట్టుకొని పరిష్కరించవలసిందిగా మేము కోరుతున్నాము. కాబట్టి అడవులను కాపాడే బాధ్యత ఒక అటవీ శాఖ అనే కాదు మన అందరి పౌరుల ప్రాథమిక బాధ్యత దానిని కాపాడుకొనే ప్రయత్నం చేద్దాం.

“అడవి ఉంటేనే సమాజం ఉంటుంది” అనే సత్యాన్ని గుర్తుంచుకుని అడవులను, వన్యప్రాణులను, పర్యావరణాన్ని కాపాడే అటవీశాఖకు పూర్తి మద్దతు ఇవ్వడం ప్రతి బాధ్యతగల పౌరుడి కర్తవ్యమని స్పష్టం చేస్తూ… “అటవీ, పర్యావరణాన్ని కాపాడే అధికారులను అవమానిస్తే సాహించేది లేదు!” 

– ఓరుగల్లు వైల్డ్ లైఫ్ సంస్థ, 

వరంగల్, తెలంగాణ రాష్ట్రం మరియు హరిత స్వచ్చంద సంస్థలు.

The post అడవుల పరిరక్షణ – అటవీశాఖపై దాడులు.. పర్యావరణ భవిష్యత్తుపై ముంచుకొస్తున్న ముప్పు appeared first on VEDHA NEWS.

• అదుపు లేని భూగర్భజల నిల్వలు, మంచూపర్వతాలవల్ల భూమి స్థిరత్వంపై తీవ్ర ప్రభావం
• భూమి స్థిరత్వంపై ప్రభావం: నేల కుంగిపోవడం (ల్యాండ్ సబ్సిడెన్స్) మరియు భూకంపాలు
• జలచక్రంలో మార్పులు: వరదలు–ఎండల తీవ్రత పెరుగుదల
• మానవ కార్యకలాపాల పాత్ర: అటవీ వినాశనం, పట్టణీకరణ, పరిశ్రమలు వల్ల పర్యావరణ సవాళ్లు

భూగర్భజలం (గ్రౌండ్వాటర్) అనేది భూమి ఉపరితలం క్రింద మట్టి పొరలు మరియు శిలల మధ్య ఉన్న సూక్ష్మ రంధ్రాలు (పోర్స్) మరియు పగుళ్లలో సహజంగా నిల్వ ఉండే నీరు. ఇది భూమి లోపల ఒక పెద్ద “అండర్‌గ్రౌండ్ వాటర్ రిజర్వాయర్” లా కాకుండా, మట్టి మరియు రాళ్లలో ఉన్న చిన్న చిన్న ఖాళీలను నింపి ఉండే నీటి రూపం. వర్షపు నీరు భూమిపై పడిన తరువాత కొంత భాగం ఆవిరైపోతుంది, కొంత భాగం నదులుగా ప్రవహిస్తుంది,

మరికొంత భాగం మట్టి లోపలకి చొచ్చుకుపోయి క్రమంగా భూగర్భజలంగా మారుతుంది. ఈ నీరు ప్రధానంగా రెండు రకాల భూమి నిర్మాణాలలో నిల్వ అవుతుంది—ఒకటి మట్టి, ఇసుక, గరుగు వంటి పదార్థాలలో ఉండే సహజ రంధ్రాలు (ప్రైమరీ పోరోసిటీ), మరొకటి గట్టి రాళ్లలో ఉండే పగుళ్లు, చీలికలు మరియు ఫ్రాక్చర్లు (సెకండరీ పోరోసిటీ). ఇలాంటి నీరు ఎక్కువగా చేరి నిరంతరంగా నిల్వ అయ్యే భూభాగాలను “అక్విఫర్స్” అంటారు, ఇవి నీటిని నిల్వ చేయడమే కాకుండా దానిని కొంత మేరకు ప్రవహించనివ్వగలవు. ఈ అక్విఫర్స్ పైభాగంలో “వాటర్ టేబుల్” అనే స్థాయి ఉంటుంది, దాని కింద భూమి పూర్తిగా నీటితో సంతృప్తమై ఉంటుంది. నీరు భూమిలోకి చొచ్చుకుపోవడాన్ని రీఛార్జ్ అంటారు, ఇది వర్షం, నదులు, సరస్సులు మరియు మానవ నిర్మిత రీచార్జ్ నిర్మాణాల ద్వారా జరుగుతుంది. భూగర్భజలం భూమి సహజ సమతుల్యతలో కీలక పాత్ర పోషిస్తూ మొక్కల వేళ్లకు తేమ అందించడం, నదుల ప్రవాహాన్ని నిలుపుకోవడం మరియు మానవ అవసరాలకు నీటి వనరుగా ఉపయోగపడడం వంటి అనేక ముఖ్యమైన పనులు చేస్తుంది. అయితే ఇది అధిక ఎక్కువ మొత్తంలో భూమి పొరల్లో చేరితే అనేక రకాలుగా భూమికి నష్టం చేయడంతో పాటు భూమియొక్క భౌతిక రసాయనిక మార్పులతోపాటుగా మరియు బౌగోలిక స్వరూపాన్నే మర్చివేస్తుంది.

*భూగర్భజల వ్యవస్థ మరియు భూమి సహజ సమతుల్యత*

భూమి ఉపరితలం క్రింద ఉండే మట్టి పొరలు, శిలల మధ్య రంధ్రాలలో సహజ సిద్ధంగా దాగి ఉన్న నీటినే మనం భూగర్భజలంగా పేర్కొంటాం. ప్రకృతి సమతుల్యతను కాపాడటంలో, నదులకు పునరుజ్జీవనం ఇవ్వడంలో మరియు చెట్ల వేళ్లకు తేమను అందించడంలో భూగర్భజలాలు అత్యంత కీలకమైన పాత్రను పోషిస్తాయి. అయితే, ఏ పదార్థమైనా పరిమితికి లోబడి ఉన్నంతవరకే ప్రయోజనకరంగా ఉంటుంది. సాధారణ అంచనాల ప్రకారం నీరు కేవలం ప్రకృతి ప్రసాదించిన వనరు మాత్రమే కాక, భూమి అంతర్నిర్మాణానికి ఒక ద్రవ ఆధారంగా (హైడ్రాలిక్ సపోర్ట్) కూడా పనిచేస్తుంది. నీటి పరిమాణం అవసరమైన మేరకు ఉన్నప్పుడు భూమి ఉపరితలం సురక్షితంగా, దృఢంగా ఉంటుంది. కానీ అదుపు లేకుండా ఈ నీటి నిల్వలు పెరిగినప్పుడు లేదా అసమతుల్యంగా కూడుకున్నప్పుడు భూమి లోపలి భౌతిక నిర్మాణం దెబ్బతిని భవిష్యత్తులో ఊహించని భౌగోళిక విపత్తులకు దారితీసే అవకాశం ఏర్పడుతుంది.

*మట్టి బంధన శక్తి క్షీణత మరియు నిర్మాణ బలహీనత*

భూమి ధృడత్వానికి దానికి ఉండే మోసే సామర్థ్యం (బీయరింగ్ కెపాసిటీ) మరియు మట్టి కణాల మధ్య ఉండే అంతర్గత బంధం (కోహేషన్) ప్రాథమిక కారణాలు. భూగర్భజలాలు అదుపు లేకుండా నిల్వ అయినప్పుడు మట్టి కణాల మధ్య ఉన్న గాలి ప్రదేశాలు పూర్తిగా నీటితో నిండిపోతాయి. దీనివలన మట్టి కణాల మధ్య ఉండవలసిన సహజమైన రాపిడి మరియు బంధన బలం గణనీయంగా తగ్గిపోతాయి. నీటి సాంద్రత పెరిగేకొద్దీ మట్టి మెత్తగా (“సాఫ్ట్”) మారిపోతుంది, దీని వల్ల భూమి తన సహజ స్వరూపాన్ని మరియు స్థిరత్వాన్ని కోల్పోతుంది. ఈ పరిస్థితి ఏర్పడినప్పుడు ఆ ప్రాంతంలో నిర్మించిన భారీ భవనాలు, మౌలిక సదుపాయాలు మరియు వంతెనల భారాన్ని తట్టుకునే శక్తి భూమికి తగ్గిపోయి, నాణ్యతా లోపాలు లేకపోయినా కట్టడాలు కూలిపోయే ప్రమాదం ముంచుకొస్తుంది.

*భూక్షయం మరియు లోతైన గుంతలు ఏర్పడే ధోరణి*

అధిక భూగర్భజలాలు నేల లోపల నిరంతరం కదులుతూ లేదా ప్రవహిస్తూ ఉంటే, అవి మట్టిలోని సూక్ష్మ కణాలను తమతో పాటు ప్రవాహంలో కొట్టుకుపోయేలా చేస్తాయి. ఈ ప్రక్రియను అంతర్గత భూక్షయం (సబ్ సర్ఫేస్ ఎరోషన్ లేదా పైపింగ్) అని పిలుస్తారు. కాలక్రమేణా మట్టి లోపలి పొరలు కొట్టుకుపోవడం వల్ల అంతర్గతంగా పెద్ద పెద్ద ఖాళీ ప్రదేశాలు, సొరంగాలు వంటి నిర్మాణాలు ఏర్పడతాయి. పైకి చూసేందుకు భూమి సాధారణంగానే కనిపిస్తున్నప్పటికీ, లోపలి పొరల్లో మట్టి ఖాళీ అవడం వల్ల అకస్మాత్తుగా పైకప్పు కూలిపోయి పెద్ద గుంతలు (సింక్ హోల్స్) ఏర్పడతాయి. ఇది రహదారుల భద్రతకు తీవ్ర ముప్పుగా మారడమే కాకుండా, గ్రామీణ మరియు పట్టణ ప్రాంతాల్లో ఊహించని రీతిలో ఆస్తి, ప్రాణ నష్టాలకు కారణమవుతుంది.

*భూమి కుంగిపోవడం (ల్యాండ్ సబ్సిడెన్స్) మరియు కట్టడాల పగుళ్లు*

భూగర్భజల మట్టాల్లో తీవ్రమైన హెచ్చుతగ్గులు లేదా ఒకే చోట విపరీతంగా నీరు చేరడం వల్ల భూమి కుంగిపోవడం (ల్యాండ్ సబ్సిడెన్స్) అనే ప్రక్రియ వేగవంతమవుతుంది. భూమి అడుగున ఉన్న మట్టి పొరలు విపరీతమైన నీటి ఒత్తిడికి గురైనప్పుడు లేదా నీటి నిల్వలు అసమతుల్యంగా ప్రవహించినప్పుడు అంతర్గత ఒత్తిడి క్రమబద్ధతను కోల్పోతుంది. దీని ఫలితంగా పైన ఉన్న నేల పొరలు క్రమంగా కిందికి దిగిపోవడం ప్రారంభమవుతుంది. ఈ ప్రక్రియ వల్ల భూమి సమతలంగా ఉండక ఒకవైపునకు ఒరిగిపోవడం, రహదారులు మరియు రైలు మార్గాలు మధ్యలోకి పగలడం, నివాస గృహాల పునాదులు కదలిపోయి గోడలకు పెద్ద పెద్ద పగుళ్లు (క్రాక్స్) రావడం జరుగుతుంది. ఇది పట్టణ ప్రణాళికకు ఒక ప్రధానమైన భౌగోళిక సవాలుగా పరిణమిస్తోంది.

ద్రవీకరణ (లిక్విఎ్ఫాక్షన్) ప్రమాదం మరియు భూకంప ముప్పు

సంతృప్త భూగర్భజల నిల్వలు ఉన్న ప్రాంతాల్లో ఎదురయ్యే అత్యంత ప్రమాదకరమైన భౌగోళిక ప్రక్రియల్లో “ద్రవీకరణ” (సాయిల్ లిక్విఎ్ఫాక్షన్) ఒకటి. మట్టిలో నీరు గరిష్ఠ పరిమితికి మించి ఉన్నప్పుడు, ఏదైనా చిన్నపాటి భూకంపం లేదా తీవ్రమైన ప్రకంపనలు సంభవిస్తే, ఆ ఒత్తిడికి మట్టి తన కఠినత్వాన్ని పూర్తిస్థాయిలో కోల్పోతుంది. ఆ సమయంలో మట్టి ఒక ఘన పదార్థంలా కాకుండా ద్రవంలా ప్రవర్తించడం ప్రారంభిస్తుంది. ద్రవీకరణ సంభవించినప్పుడు భూమిపై ఉన్న భారీ నిర్మాణాలు, స్తంభాలు మరియు భవనాలు బురదలో కూరుకుపోయినట్లు క్షణాల వ్యవధిలో పక్కకు ఒరిగిపోతాయి లేదా కూలిపోతాయి. భూగర్భజలాలు పరిమితికి మించి ఉండటం వల్ల భూకంపాల సమయంలో సంభవించే నష్టం రెట్టింపు అవుతుంది.

భూసారం దెబ్బతినడం మరియు లవణీకరణ (సాలినిటీ) సమస్యలు

అధిక భూగర్భజలాలు కేవలం భూమి భౌతిక స్థిరత్వాన్నే కాకుండా దాని రసాయన సమతుల్యతను, వ్యవసాయ ఉత్పాదకతను కూడా దెబ్బతీస్తాయి. భూగర్భజల మట్టం ఉపరిభవతలానికి అత్యంత దగ్గరగా వచ్చినప్పుడు, కేశనాళికల చర్య (కాపిల్లరీ యాక్షన్) ద్వారా నీరు పైకి చేరుకుంటుంది. ఎండ తీవ్రతకు ఆ నీరు ఆవిరైపోయినప్పుడు నీటిలో కరిగి ఉన్న ఖనిజ లవణాలు మట్టి పై పొరల్లోనే మిగిలిపోతాయి. దీనివల్ల నేలలో ఉప్పు శాతం విపరీతంగా పెరిగిపోతుంది (సాయిల్ సాలినిటీ). భూసారం తీవ్రంగా క్షీణించి పంటల వేళ్లకు గాలి ఆడక, విత్తనాలు మొలకెత్తని స్థితి ఏర్పడుతుంది. కాలక్రమేణా సారవంతమైన భూములు కూడా నిరుపయోగమైన చౌడు భూములుగా మారిపోయే ప్రమాదం ఉంది.

స్పాంజ్ సిద్ధాంతంతో తేలికగా అర్థం చేసుకునే విశ్లేషణ

ఈ సంక్లిష్టమైన భౌగోళిక సూత్రాన్ని సులభంగా అర్థం చేసుకోవడానికి ఒక స్పాంజ్ (స్పాంజ్) ఉదాహరణను పరిశీలించవచ్చు. ఒక పొడి స్పాంజ్ లేదా కొద్దిగా తేమ ఉన్న స్పాంజ్ కొంత ఒత్తిడిని, భారాన్ని తట్టుకుని దృఢంగా ఉంటుంది. కానీ అదే స్పాంజ్‌ను నీటితో పూర్తిగా నింపివేస్తే, అది అత్యంత మృదువుగా మరియు ఆకారం కోల్పోయేలా మారుతుంది.

దాన్ని ఏమాత్రం నొక్కినా ఆకారం చెదిరిపోతుంది మరియు అది ఏ రకమైన భారాన్ని మోయలేదు. మన భూమి కూడా సరిగ్గా ఈ స్పాంజ్ సూత్రం ఆధారంగానే పనిచేస్తుంది. భూమిలో పరిమితంగా నీరు ఉన్నప్పుడు అది మట్టికి సపోర్ట్‌గా ఉంటుంది, కానీ శృతిమించిన నీటి నిల్వలు భూమిని ఒక బలహీనమైన, ఆకారం లేని స్పాంజ్‌లా మార్చివేస్తాయి.

శాస్త్రీయ నివారణ చర్యలు మరియు భూగర్భజల నిర్వహణ

ఈ తీవ్రమైన సమస్యను అదుపు చేయడానికి సమగ్రమైన పర్యావరణ మరియు సాంకేతిక నిర్వహణ పద్ధతులను పాటించడం తక్షణ అవసరం. వర్షపు నీటిని ఒకే చోట కాకుండా క్రమబద్ధంగా నిల్వ చేసే వర్షపు నీటి నిల్వ (రెయిన్వాటర్ హార్వెస్టింగ్) పద్ధతులను ప్రోత్సహించాలి. భూగర్భజలాలను విచ్చలవిడిగా తోడేయడం కాకుండా, రీచార్జ్ పిట్స్ (రీఛార్జ్ పిట్స్) ద్వారా నీటిని సమతుల్యంగా భూమిలోకి ఇంకేలా చూడాలి.

వాటర్‌షెడ్ నిర్వహణ (వాటర్షెడ్ మానేజ్మెంట్) ద్వారా నీటి ప్రవాహ దిశను మరియు ఇంకుడు మట్టాలను శాస్త్రీయంగా నియంత్రించాలి. అంతేకాకుండా, లోతైన వేర్ల వ్యవస్థ (రూట్ సిస్టం) ఉన్న చెట్లను విస్తారంగా పెంచడం వల్ల వేళ్లు మట్టిని గట్టిగా పట్టి ఉంచి, భూక్షయాన్ని మరియు భూమి బలహీనపడటాన్ని అడ్డుకుంటాయి. వివేకవంతమైన జల నిర్వహణ ద్వారా మాత్రమే మనం భూభౌతిక రక్షణను సాధించగలము.

ఉదాహరణగా నేపాల్ వరద విపత్తు దుర్ఘటన అధ్యయనం:

మొన్న నేపాల్ లో చోటుచేసుకున్న వరద విపత్తు దుర్ఘటనను శాస్త్రీయ దృక్పథంతో పరిశీలిస్తే, ఇది ఒక్కసారిగా జరిగిన ప్రకృతి కోపం కాకుండా పలు సహజ–మానవ కారణాల సమ్మేళనంగా కనిపిస్తుంది.

అతివృష్టి (హెవీ రెయిన్ఫాల్) ప్రధాన కారణంగా ఉండగా, వాతావరణ మార్పులు (క్లైమేట్ చేంజ్) కారణంగా తక్కువ సమయంలో అధిక వర్షపాతం నమోదవడం, నదులు–వాగులు తమ సహజ ప్రవాహ మార్గాలను కోల్పోవడం, చెరువులు ఆక్రమణకు గురవడం, డ్రైనేజ్ వ్యవస్థలు సక్రమంగా లేకపోవడం వంటి అంశాలు పరిస్థితిని మరింత తీవ్రతరం చేశాయి. అటవీ వినాశనం, పట్టణీకరణ వల్ల భూమి నీటిని చొరబడనీయకుండా మారిపోవడం కూడా వరద నీరు వేగంగా పేరుకుపోవడానికి కారణమైంది. ఈ వరద లక్షణాలు చూస్తే—తక్కువ సమయంలో నీటి మట్టం ఒక్కసారిగా పెరగడం, రహదారులు, ఇళ్లు మునిగిపోవడం, విద్యుత్–రవాణా వ్యవస్థలు స్థంభించడం, తాగునీటి కాలుష్యం వంటి సమస్యలు తీవ్రంగా కనిపించాయి.

ఈ దుర్ఘటనలో అనేక మంది ప్రాణాలు కోల్పోయారు; అధికారిక లెక్కల ప్రకారం (ప్రాంతానుసారం మారవచ్చు) దశాబ్దాల సంఖ్యలో మరణాలు సంభవించగా, వందలాది మంది నిరాశ్రయులయ్యారు మరియు వేల ఎకరాల పంట నష్టపోయింది. మొత్తం చూస్తే, ఈ ఘటన మనకు ముందస్తు హెచ్చరిక వ్యవస్థలు (ఎర్లీ వార్నింగ్ సిస్టమ్స్), సుస్థిర పట్టణ ప్రణాళిక, నీటి వనరుల సంరక్షణ, అటవీ పరిరక్షణ వంటి అంశాల ప్రాముఖ్యతను గుర్తు చేస్తూ, భవిష్యత్తులో ఇలాంటి విపత్తులను తగ్గించడానికి శాస్త్రీయ విధానాలను కచ్చితంగా అమలు చేయాల్సిన అవసరాన్ని స్పష్టంగా తెలియజేస్తుంది.

అదుపు లేని భూగర్భజల నిల్వలు భూమి సహజ సమతుల్యతను తీవ్రంగా దెబ్బతీసే ఒక సంక్లిష్టమైన భౌగోళిక మరియు పర్యావరణ సమస్యగా మారుతున్నాయి.

భూగర్భజలాలు సాధారణంగా భూమి జీవవ్యవస్థను పోషించడంలో, నదులకు జీవం ఇవ్వడంలో మరియు మట్టి తేమను కాపాడడంలో కీలక పాత్ర పోషించినప్పటికీ, వాటి అసమతుల్య పెరుగుదల లేదా నియంత్రణలేని సేకరణ భూమి అంతర్గత నిర్మాణాన్ని బలహీనపరుస్తుంది. మట్టి కణాల మధ్య ఉన్న సహజ బంధన శక్తి తగ్గిపోవడం, భూమి మోసే సామర్థ్యం క్షీణించడం, అంతర్గత భూక్షయం ద్వారా గుంతలు ఏర్పడటం, భూసభసైడ్ (ల్యాండ్ సబ్సిడెన్స్) కారణంగా భూమి కుంగిపోవడం, భూకంపాల సమయంలో ద్రవీకరణ ప్రమాదం పెరగడం వంటి అనేక భౌగోళిక విపత్తులు ఒకదానితో ఒకటి అనుసంధానమై మరింత తీవ్ర ప్రభావాన్ని చూపుతాయి. అదే సమయంలో రసాయన పరంగా కూడా భూగర్భజలాల అసమతుల్యత వల్ల లవణీకరణ సమస్యలు పెరిగి వ్యవసాయ భూములు సారాన్ని కోల్పోతాయి, ఇది ఆహార భద్రతకే ప్రమాదకరంగా మారుతుంది.

ఈ అన్ని అంశాలను స్పాంజ్ సిద్ధాంతం ద్వారా అర్థం చేసుకుంటే, పరిమిత నీరు భూమికి బలాన్ని ఇస్తే, అధిక నీరు దానిని బలహీనమైన, అస్థిరమైన వ్యవస్థగా మార్చుతుందని స్పష్టమవుతుంది. అందువల్ల, రైన్వాటర్ హార్వెస్టింగ్, రీచార్జ్ పిట్స్, వాటర్‌షెడ్ మేనేజ్‌మెంట్, వృక్ష సంపద పెంపకం వంటి శాస్త్రీయ మరియు స్థిరమైన భూగర్భజల నిర్వహణ పద్ధతులను సమర్థవంతంగా అమలు చేయడం అత్యవసరం. సమతుల్య జల వినియోగం మరియు పర్యావరణ అవగాహన ద్వారానే భూమి స్థిరత్వాన్ని కాపాడుతూ భవిష్యత్ తరాలకు సురక్షితమైన, స్థిరమైన భౌగోళిక వాతావరణాన్ని అందించగలము. నేపాల్ వంటి పర్వత ప్రాంతాల్లో వరదల వంటి విపత్తులు తగ్గాలంటే మానవులు ప్రకృతితో సమతుల్యంగా జీవించడం అత్యంత అవసరం.

ముఖ్యంగా అడవుల సంరక్షణ (డెఫారెస్టేషన్ తగ్గించడం), కొండలపై అనియంత్రిత నిర్మాణాలను నియంత్రించడం, సహజ జల మార్గాలను (నదులు, వాగులు) ఆక్రమణల నుండి రక్షించడం కీలకం. బయోడైవర్సిటీని కాపాడటానికి స్థానిక మొక్కల పెంపకం, వన్యప్రాణుల సంరక్షణ, మట్టి క్షీణతను తగ్గించే చర్యలు (సాయిల్ కన్సర్వేషన్) తీసుకోవాలి. అదేవిధంగా వర్షపు నీటి సంరక్షణ (రెయిన్వాటర్ హార్వెస్టింగ్), పర్యావరణ అనుకూల వ్యవసాయం, ప్రజల్లో అవగాహన పెంపు ద్వారా సహజ వనరులను సమర్థంగా ఉపయోగిస్తే వరదల తీవ్రతను గణనీయంగా తగ్గించవచ్చు. ప్రకృతిని దోచుకోవడం కాదు, దాన్ని కాపాడుకోవడం ద్వారానే భవిష్యత్తు తరాలకు సురక్షితమైన పర్యావరణాన్ని అందించగలం.

 రవిబాబు పిట్టల, పర్యావరణవేత్త, ఫార్మర్ అసిస్టెంట్ ప్రొఫెసర్, JNTUH, హైదరాబాద్ మరియు జాయింట్ సెక్రటరీ, ఓరుగల్లు వైల్డ్ లైఫ్ సొసైటీ, తెలంగాణ. సెల్: 9849425271.

The post మంచు పర్వతాల కరుగుదల..వాతావరణ మార్పుల ప్రభావం appeared first on VEDHA NEWS.

• జమ్మికుంటలో అరుదైన హైడాటిడ్ సిస్ట్ శస్త్రచికిత్స విజయవంతం
• ఆదిత్య మల్టీ స్పెషాలిటీ హాస్పిటల్‌లో డాక్టర్ మహిపాల్ ఆధ్వర్యంలో విజయవంతమైన ఆపరేషన్

వేద న్యూస్ , జమ్మికుంట:

జమ్మికుంట పట్టణంలో అరుదైన, క్లిష్టమైన శస్త్రచికిత్సను ఆదిత్య మల్టీ స్పెషాలిటీ హాస్పిటల్‌లో జనరల్ సర్జన్ డాక్టర్ మహిపాల్ విజయవంతంగా నిర్వహించారు.

సిరిసేడు గ్రామానికి చెందిన 70 ఏళ్ల రైతు 16 సంవత్సరాల క్రితం హనుమకొండలోని ప్రముఖ ఆసుపత్రిలో కాలేయంలోని హైడాటిడ్ సిస్ట్‌ల తొలగింపునకు లాపరోటమీ శస్త్రచికిత్స చేయించుకున్నారు. అయితే ప్రస్తుతం ఆయనకు కాలేయంతో పాటు పొత్తికడుపులోని పెరిటోనియం ప్రాంతానికి కూడా హైడాటిడ్ వ్యాధి విస్తరించింది.

ఆపరేషన్ చేయడానికి దాదాపు 8 ఆసుపత్రులు నిరాకరించడంతో, రోగి కుటుంబ సభ్యులు పలు ఆసుపత్రులను సంప్రదించిన అనంతరం చివరకు జమ్మికుంటలోని ఆదిత్య మల్టీ స్పెషాలిటీ హాస్పిటల్‌ను ఆశ్రయించారు.

రోగిని పరీక్షించిన డాక్టర్ మహిపాల్, కాలేయంలో సుమారు 12 హైడాటిడ్ పరాన్నజీవి తిత్తులు ఉన్నట్లు గుర్తించారు. పరిస్థితి క్లిష్టంగా ఉన్నప్పటికీ, అవసరమైన వైద్య పరీక్షలు నిర్వహించి ఎక్స్‌ప్లోరేటరీ లాపరోటమీ ద్వారా శస్త్రచికిత్స చేయాలని రోగి బంధువులకు వివరించారు.

శస్త్రచికిత్స సమయంలో కాలేయం, పొత్తికడుపు ప్రాంతంలో ఉన్న హైడాటిడ్ తిత్తులను, వాటి గోడలను జాగ్రత్తగా తొలగించారు. తిత్తుల్లోని పరాన్నజీవులు ఇతర ప్రాంతాలకు వ్యాపించకుండా ఉండేందుకు ప్రత్యేకమైన స్కోలిసైడల్ ఏజెంట్ ఉపయోగించారు. క్లిష్టమైన పరిస్థితుల్లో డాక్టర్ మహిపాల్ తన అనుభవాన్ని ఉపయోగించి శస్త్రచికిత్సను విజయవంతంగా పూర్తి చేశారు.

అరుదైన, సాధారణంగా అధిక వ్యయంతో కూడుకున్న ఈ శస్త్రచికిత్సను అతి తక్కువ ఖర్చుతో విజయవంతంగా నిర్వహించడంపై రోగి కుటుంబ సభ్యులు డాక్టర్ మహిపాల్ మరియు ఆదిత్య మల్టీ స్పెషాలిటీ హాస్పిటల్ యాజమాన్యానికి కృతజ్ఞతలు తెలిపారు.

గ్రామీణ ప్రాంతాల్లో కూడా క్లిష్టమైన, అరుదైన శస్త్రచికిత్సలను అనుభవజ్ఞులైన వైద్యుల ఆధ్వర్యంలో అందుబాటులోకి తీసుకురావడం ద్వారా స్థానిక ప్రజలకు మెరుగైన వైద్య సేవలు అందించడమే తమ లక్ష్యమని ఆసుపత్రి వర్గాలు పేర్కొన్నాయి.

The post ఆదిత్య ఆసుపత్రిలో అతి తక్కువ ఖర్చుతో అరుదైన సర్జరీ..సక్సెస్.. డాక్టర్ మహిపాల్ సారథ్యంలో.. appeared first on VEDHA NEWS.

• భూ తగాదాలో ఇరు వర్గాల మధ్య ఘర్షణ.. మహిళకు తీవ్ర గాయం
• 2015 ఒప్పంద పత్రం ఉన్నా న్యాయం జరగడం లేదంటున్న బాధితులు
• సర్పంచ్ వర్గం నుంచి ప్రాణభయం ఉందంటూ పోలీసులను ఆశ్రయించిన కుటుంబం

వేద న్యూస్, వీణవంక:

కరీంనగర్ జిల్లా హుజురాబాద్ నియోజకవర్గం వీణవంక మండలం లక్మాజిపల్లి గ్రామంలో ఐదు గుంటల భూమికి సంబంధించిన వివాదం ఇరు వర్గాల మధ్య ఘర్షణకు దారితీసింది.

ఈ ఘటనలో గెల్లు శ్రీనివాస్ యాదవ్ కుటుంబానికి చెందిన రజితకు కాలికి తీవ్ర గాయం కావడంతో ఆసుపత్రిలో చికిత్స పొందుతున్నట్లు బాధితులు తెలిపారు.

బాధితుడు గెల్లు శ్రీనివాస్ యాదవ్ తెలిపిన వివరాల ప్రకారం.. తమకు సంబంధించిన ఐదు గుంటల భూమి విషయంలో కొంతకాలంగా వివాదం కొనసాగుతోందన్నారు.

ఈ క్రమంలో ఇరు వర్గాల మధ్య ఘర్షణ చోటుచేసుకుని దాడి జరిగినట్లు పేర్కొన్నారు. దాడిలో తన భార్య రజిత ఫై సర్పంచ్ శ్రీనివాస్ దాడి చేయగా కాలుకు బలమైన గాయం కావడంతో ఆసుపత్రిలో చేర్పించినట్లు తెలిపారు.

ఈ భూమి వివాదానికి సంబంధించి గ్రామ పెద్దమనుషుల సమక్షంలో 2015లో జరిగిన ఒప్పందానికి సంబంధించిన పత్రం తమ వద్ద ఉందని గెల్లు శ్రీనివాస్ యాదవ్ పేర్కొన్నారు. అయినప్పటికీ తమకు న్యాయం జరగడం లేదని ఆవేదన వ్యక్తం చేశారు.

ఈ ఘటనపై పోలీస్ స్టేషన్‌లో ఫిర్యాదు చేసినట్లు బాధితులు తెలిపారు. తమకు న్యాయం చేయడంతో పాటు రక్షణ కల్పించాలని పోలీసులను కోరారు.

గ్రామ సర్పంచ్  వల్ల తమ కుటుంబానికి ప్రాణభయం ఉందని బాధితులు ఆరోపించారు.ఈ భూ వివాదంపై పోలీసులు విచారణ జరిపి, ఇరు వర్గాల వాదనలు మరియు అందుబాటులో ఉన్న పత్రాలను పరిశీలించి చట్టపరమైన చర్యలు తీసుకోవాలని బాధితులు కోరుతున్నారు.

The post సర్పంచ్ వర్గం నుంచి ప్రాణభయం ఉందంటూ పోలీసులను ఆశ్రయించిన కుటుంబం appeared first on VEDHA NEWS.

• కష్టజీవుల దరి చేరిన కార్పొరేట్ వైద్యం
• వల్బాపూర్‌లో ఫ్రీ హెల్త్ క్యాంపు
•  ఆదిత్య, అమృత మల్టీ స్పెషాలిటీ హాస్పిటల్ సౌజన్యంతో..
•  వల్బాపూర్ గ్రామస్తులకు ఉచిత ఓపి: దేవేందర్ రెడ్డి

వేద న్యూస్, జమ్మికుంట:

వీణవంక మండలం వల్బాపూర్ గ్రామ ప్రజలకు నాణ్యమైన వైద్య సేవలను అందించాలనే లక్ష్యంతో బాలవికాస స్వచ్ఛంద సంస్థ ఆధ్వర్యంలో జమ్మికుంట ఆదిత్య, అమృత మల్టీ స్పెషాలిటీ హాస్పిటల్ సౌజన్యంతో శనివారం గ్రామపంచాయతీ ఆవరణలో ఉచిత వైద్య శిబిరాన్ని నిర్వహించారు.
ఈ సందర్భంగా ఏర్పాటు చేసిన సమావేశంలో గ్రామ సర్పంచ్ మాట్లాడుతూ.. ప్రస్తుత ఆహారపు అలవాట్లలో మార్పులు చేసుకోవాల్సిన అవసరం ఉందన్నారు. నకిలీ, కల్తీ ఆహార పదార్థాలు పెరుగుతున్న నేపథ్యంలో ప్రజలు అప్రమత్తంగా ఉండాలని సూచించారు. ప్రతిరోజూ తగినంత మంచినీరు తీసుకోవడంతో పాటు ఆకుకూరలు, కూరగాయలను ఉడికించి తీసుకోవాలని, సమతుల్య ఆహారానికి ప్రాధాన్యం ఇవ్వాలని కోరారు.

 

 

ప్రముఖ వైద్యులు డాక్టర్ భరత్, డాక్టర్ శ్రీనివాస్, డాక్టర్ గ్రీష్మ మాట్లాడుతూ.. కార్బోహైడ్రేట్లు అధికంగా ఉండే ఆహార పదార్థాల వినియోగాన్ని తగ్గించి, పోషక విలువలు కలిగిన ఆహారాన్ని తీసుకోవాలని సూచించారు. నిత్యం వ్యాయామం చేయడం ద్వారా ఆరోగ్యాన్ని కాపాడుకోవచ్చన్నారు. జంక్ ఫుడ్ అధికంగా తీసుకోవడం వల్ల యువతలో ఊబకాయం పెరుగుతోందని, బరువును నియంత్రించుకోవడం ముఖ్యమని తెలిపారు.

సొంత గ్రామం పై దేవేందర్ రెడ్డి మమకారం

ఆదిత్య ఆసుపత్రి మేనేజింగ్ డైరెక్టర్ ఎలుక దేవేందర్ రెడ్డి మాట్లాడుతూ.. సమాజ సేవలో బాలవికాస సంస్థ అందిస్తున్న సేవలు అభినందనీయమన్నారు. సంస్థ సహకారంతో పేద ప్రజలకు ఉచిత వైద్య సేవలు అందించాలనే ఉద్దేశంతో ఈ శిబిరాన్ని నిర్వహించినట్లు తెలిపారు. ఆదిత్య, అమృత ఆసుపత్రుల ఆధ్వర్యంలో గతంలో అనేక వైద్య శిబిరాలు నిర్వహించి ఉచిత పరీక్షలు, మందులు అందించామని, భవిష్యత్తులోనూ ఇటువంటి కార్యక్రమాల్లో పాల్గొని తమ వంతు సహకారం అందిస్తామని చెప్పారు. తమ స్వగ్రామమైన వల్బాపూర్ ప్రజలకు ఆసుపత్రిలో ఉచిత ఓపీ సేవలు అందిస్తామని హామీ ఇచ్చారు.ఉప సర్పంచ్ నామని విజేందర్..మాట్లాడుతూ సీజనల్ వ్యాధుల పట్ల ప్రజలు అప్రమత్తంగా ఉండాలని సూచించారు. గ్రామంలో మురుగునీరు నిల్వ ఉండకుండా చర్యలు తీసుకోవడంతో పాటు పరిసరాలను పరిశుభ్రంగా ఉంచుకోవాలని కోరారు.
జమ్మికుంట బాలవికాస సెంటర్ మేనేజర్ పబ్బు సులోచన మాట్లాడుతూ.. ప్రతి మహిళ ఆరోగ్యంపై అవగాహన పెంచుకుని ఇంటిని ఆరోగ్యానికి తొలి కేంద్రంగా మార్చాలని సూచించారు. బాలవికాస కార్యక్రమాలు నిర్వహిస్తున్న 14 సెంటర్ల పరిధిలోని 180 గ్రామాల్లో ఉచిత వైద్య శిబిరాలు నిర్వహిస్తున్నట్లు తెలిపారు. ఇప్పటివరకు సుమారు రూ.2 కోట్ల విలువైన మందులను ఉచితంగా పంపిణీ చేసినట్లు పేర్కొన్నారు.

ఆయా సెంటర్ల పరిధిలోని దాతల సహకారంతో ఈ కార్యక్రమాలను విజయవంతంగా నిర్వహిస్తున్నామని తెలిపారు.

ఈ కార్యక్రమంలో బాలవికాస కోఆర్డినేటర్ స్వాతి, కరోబార్ రాజశేఖర్, పాలకవర్గ సభ్యులు, ఆదిత్య ఆసుపత్రి పీఆర్వోలు రఫిక్, శ్రీకాంత్, దుర్గాప్రసాద్, ఆసుపత్రి సిబ్బంది అనిల్‌రావు, మహేష్, శ్రావణ్, రంజిత్, పూజ, అనూష, శృతి తదితరులతో పాటు గ్రామ ప్రజలు పెద్ద సంఖ్యలో పాల్గొన్నారు.

The post సొంతూరిపై ప్రేమ.. వల్బాపూర్ ప్రజలకు ఉచిత ఓపీ: ఎలుక దేవేందర్ రెడ్డి appeared first on VEDHA NEWS.