•  ఉస్మానియా వర్సిటీ వీసీ ఆచార్య రవీందర్

వేద న్యూస్, చార్మినార్:
భారతీయ రాజ్యాంగంలోని సంక్లిష్టమైన పారిభాషిక పదాలను, వాటి భావనలను విద్యార్థుల అవగాహనా సౌలభ్యం కోసం పునర్విచించవలసిన అవసరం ఉందని, ఆ దిశగా ఈ సదస్సు ఉపయోగపడుతుందని ఆచార్య రవీందర్ అన్నారు. హైదరాబాద్ ప్రభుత్వ సిటీ కళాశాలలోని రాజనీతి శాస్త్ర విభాగం, కమిషన్ ఆఫ్ సైంటిఫిక్ అండ్ టెక్నికల్ టెర్మినాలజీ, ఢిల్లీ సంయుక్తంగా రెండ్రోజుల పాటు నిర్వహిస్తున్న జాతీయ సదస్సు ప్రారంభ సభలో బుధవారం ఉస్మానియా వర్సిటీ వీసీ రవీందర్ ముఖ్య అతిథిగా పాల్గొన్నారు.

ఈ సందర్భంగా ఆయన ప్రసంగించారు. పాశ్చాత్య భాషల దృష్టి కోణంలో నుండి రాజ్యాంగంలో పొందుపరచబడిన 4,000 సాంకేతిక పదాలను దేశీయ కోణంలో నుంచి బోధనా యోగ్యంగా మార్చుకోవాలని అభిప్రాయపడ్డారు. విజ్ఞాన శాస్త్రాల (సైన్స్) నేపథ్యంలో నుండి వచ్చిన విద్యార్థులు కూడా రాజ్యాంగ విలువలను అర్థం చేసుకొనే విధంగా రాజనీతి శాస్త్రాన్ని రూపొందించుకోవాలని సూచించారు.

అంతర్జాతీయ విజ్ఞానాన్ని స్థానిక భాషల్లోకి అందుబాటులోకి తీసుకురావాలని, రాజ్యాంగ పీఠికలోని సామాజికన్యాయం, లౌకిక, ప్రజాస్వామ్య, సామ్యవాద మొదలగు గంభీరమైన పారిభాషిక పదాలకు అర్థవంతమైన సూత్రీకరణలను, వ్యాఖ్యానాలను స్థిరపరిస్తే విద్యావిషయక ప్రయోజనం కలుగుతుందని తెలిపారు.

అత్యవసరమైన విషయంపై సదస్సు నిర్వహిస్తున్నందుకు కళాశాల ప్రిన్సిపాల్, సమన్వయకర్త డా.కె.భాస్కర్ ను, ఇతరులను అభినందించారు. సభలో గౌరవ అతిథిగా పాల్గొన్న ఆచార్య ఇ. వెంకటేష్ మాట్లాడుతూ భారత రాజ్యాంగంలోని, నైతికతను, రాజ్యాంగ మౌలిక తత్వాన్ని గ్రామీణ స్థాయిలో విస్తృతంగా ప్రచారం చేయాల్సిన అవసరముందని పేర్కొన్నారు.

ఎత్నిక్ డెమోక్రసి ఇన్ లిబరలిజం లాంటి కొత్త పదాలకున్న ప్రాసంగికతను అర్థం చేసుకోవాలని చెప్పారు. ప్రిన్సిపాల్ ఆచార్య పి.బాల భాస్కర్ అధ్యక్షత వహించిన ఈ సభలో కమిషన్ ఉపసంచాలకులు డా.షహజాద్ ప్రత్యేక ఆహ్వానితులుగా పాల్గొని నిర్వాహకులను అభినందించారు.

రాష్ట్రంలోని వివిధ కళాశాలల నుండి పాల్గొన్న రాజనీతిశాస్త్ర ఆచార్యులు ఆయా సాంకేతిక సదస్సులలో ఉత్సాహంగా పాల్గొని మాట్లాడుతూ ఈ సదస్సు ఎంతగానో ఉపయోగపడుతుందని చెప్పారు. ఈ సభలో డా.అయిజాజ్ సుల్తానా, డా.విప్లవ్ దత్ శుక్లా, డా.తిరుపతి, డా.శంకర్, డా.పావని, డా.కృష్ణవేణి, డా.శ్రీనివాస్ తదితర ఆచార్యులు, విద్యార్థులు పాల్గొన్నారు.

The post సాంకేతిక పదాలను బోధనాయోగ్యంగా మార్చుకోవాలి appeared first on VEDHA NEWS.

వేద న్యూస్, చార్మినార్:
ప్రభుత్వ సిటీ కళాశాల రాజనీతి శాస్త్ర విభాగం, కమిషన్ ఆఫ్ సైంటిఫిక్ అండ్ టెక్నికల్ టెర్మినాలజీ, ఢిల్లీ సంయుక్తంగా రెండ్రోజుల పాటు జాతీయ సదస్సు నిర్వహిస్తున్నదని సిటీ కాలేజీ ప్రిన్సిపాల్ ఆచార్య బాల భాస్కర్ మంగళవారం ఒక ప్రకటనలో తెలిపారు.

నేడు(బుధవారం), రేపు(గురువారం) రెండ్రోజులు ‘‘రాజ్యాంగంలో సాంకేతిక పదాల ప్రాముఖ్యత’’ పై నిర్వహించే సదస్సును ఈ నెల 3న ఉదయం 10.30 గంటలకు ఆజామ్ హాల్ లో ప్రారంభించనున్నట్లు పేర్కొన్నారు.

ఈ సభకు ముఖ్య అతిథిగా విద్యాశాఖ కార్యదర్శి బుర్రా వెంకటేశం, గౌరవ అతిథిగా ఉస్మానియా విశ్వవిద్యాలయం వీసీ ఆచార్య రవీందర్, కమిషన్ ఉపసంచాలకులు డా.షహజాద్ ప్రత్యేక ఆహ్వానితులుగా పాల్గొంటారని వెల్లడించారు.

భాస్కర్ సమన్వయం చేస్తున్న ఈ సదస్సులో రాష్ట్రంలోని వివిధ కళాశాలల నుండి వంద మందికి పైగా ఆచార్యులు పాల్గొననున్నారు. పది మంది విషయ నిపుణులు సాంకేతిక సదస్సులలో అనేక అంశాలపై ప్రసంగించునున్నారు. అనంతరం ఆయా అంశాలపై చర్చ జరగనుంది.

The post సిటీ కాలేజీలో రాజనీతి శాస్త్ర విభాగం జాతీయ సదస్సు appeared first on VEDHA NEWS.

వేద న్యూస్, హైదరాబాద్/చార్మినార్:
హైదరాబాద్ ప్రభుత్వ సిటీ కళాశాల డిగ్రీ ద్వితీయ సంవత్సర విద్యార్థి చిక్కొండ్ర రవి రెండు జాతీయ కవితా పురస్కారాలు సాధించినట్లు ఆ కాలేజీ తెలుగు శాఖ అధ్యక్షులు డాక్టర్ కోయి కోటేశ్వర రావు శనివారం ఒక ప్రకటనలో తెలిపారు. పోపూరి వెంకట సుబ్బారావు ధర్మ నిధి సందర్భంగా శ్రీ పద్మావతి మహిళా విశ్వవిద్యాలయం(తిరుపతి)లో తెలుగు శాఖ నిర్వహించిన జాతీయ స్థాయి కవితల పోటీలో చిక్కొండ్ర రవి ద్వితీయ బహుమతి సాధించారు.

ఇటీవల జరిగిన ధర్మనిధి సదస్సులో శ్రీ పద్మావతి విశ్వ విద్యాలయం ఉపాధ్యక్షులు ఆచార్య దేవూరి భారతి, సుప్రసిద్ద రచయిత్రి ఓల్గా చిక్కొండ్ర రవికి రూ.2,500 నగదు, బహుమతి, ప్రశంసా పత్రం ప్రదానం చేశారు. విశ్వ విద్యాలయం తెలుగు శాఖ అధ్యక్షులు ఆచార్య కొలకలూరి మధుజ్యోతి, ప్రముఖ సాహితీ వేత్త డా. దీర్ఘాసి విజయ కుమార్, డా సుభాషిణి ఈ కార్యక్రమంలో పాల్గొన్నారు.

గురజాడ సాంసృతిక సమాఖ్య (విజయనగరం)లో గురజాడ వర్ధంతి సందర్భంగా నిర్వహించిన కవితల పోటీలో విజేతగా నిలిచి చిక్కొండ్ర రవి.. మహా కవి గురజాడ ఉత్తమ కవితా పురస్కారాన్ని సాధించారు. పరీక్షల కారణంగా రవి బహుమతి ప్రదానోత్సవ సభకు హాజరు కాలేదు.

 

సిటీ కళాశాల ప్రిన్సిపాల్ ఆచార్య పి.బాలభాస్కర్ నిర్వాహకుల పక్షాన చిక్కొండ్ర రవికి జ్ఞాపిక, ప్రశంసా పత్రం, రూ.2,500 నగదు బహుమతిని ప్రదానం చేశారు. ఈ సందర్భంగా చిన్న వయస్సులోనే ప్రతిష్ఠాత్మకమైన పురస్కారాలు సాధించిన రవిని ప్రిన్సిపాల్ ఆచార్య బాల భాస్కర్, ఐక్యూఏసి కో ఆర్డినేటర్ డా.నీరజ, తెలుగు శాఖ అధ్యాపకులు అభినందించారు.

The post సిటీ కాలేజీ స్టూడెంట్ రవికి రెండు జాతీయ కవితా పురస్కారాలు appeared first on VEDHA NEWS.