- ఇండ్లు, ఇండ్లస్థలాలు ఇవ్వాలి.. జర్నలిస్టు బీమా పథకం తేవాలి
- హైదరాబాద్ యూనియన్ ఆఫ్ జర్నలిస్ట్స్ (హెచ్యూజే) వినతి
వేద న్యూస్, హైదరాబాద్ ప్రతినిధి:
రాష్ట్రంలో కొత్తగా ముఖ్యమంత్రిగా బాధ్యతలు చేపట్టిన సీఎం రేవంత్ రెడ్డి జర్నలిస్టుల సమస్యల పరిష్కారానికి కృషి చేయాలని హైదరాబాద్ యూనియన్ ఆఫ్ జర్నలిస్ట్స్ (హెచ్యూజే) విజ్ఞప్తి చేసింది. మేనిఫెస్టోలో పేర్కొన్నట్టుగా జర్నలిస్టులందరికీ ఇండ్లు, ఇండ్ల స్థలాలు ఇవ్వాలని, జర్నలిస్టు బీమా పథకం తీసుకురావాలని కోరింది. సోమవారం హైదరాబాద్ చిక్కడపల్లిలోని త్యాగరాయగానసభలో హెచ్యూజే కార్యవర్గ సమావేశం జరిగింది. ఈ సందర్భంగా టీడబ్ల్యూజేఎఫ్ రాష్ట్ర కార్యదర్శి ఎర్రం నర్సింగరావు మృతి పట్ల హెచ్ యూజే సభ్యులు సంతాపం వ్యక్తం చేశారు.
అనంతరం హెచ్యూజే అధ్యక్ష, కార్యదర్శులు అరుణ్ కుమార్, బి.జగదీశ్ మాట్లాడుతూ హైదరాబాద్ నగరంలో ఏండ్ల నుంచి పనిచేస్తున్న జర్నలిస్టులకు ఇండ్లు, ఇండ్లస్థలాలు అందడం లేదని, ప్రభుత్వం ఈ సమస్యను పరిష్కరించాలని కోరారు. రైతు, నేతన్న బీమాల బీమా పథకం మాదిరిగా… జర్నలిస్టుల బీమా పథకం ప్రారంభించాలని విజ్ఞప్తి చేశారు. ప్రస్తుతం జర్నలిస్టులకు ఇచ్చిన హెల్త్ కార్డులు చాలా ప్రైవేటు హాస్పిటల్స్లో పనిచేయడం లేదని తెలిపారు.
కాబట్టి ప్రభుత్వం జర్నలిస్టుల సమస్యలపై సానుకూలంగా స్పందించాలని కోరారు. పత్రికలు, టీవీలకు ఇచ్చే యాడ్స్ నిధుల్లో జర్నలిస్టుల సంక్షేమానికి ఒకటీ నుంచి రెండు శాతం నిధులు కేటాయించాలని విజ్ఞప్తి చేశారు. ఈ సంద్భరంగా టీడబ్ల్యూజేఎఫ్ రాష్ట్ర ప్రధాన కార్యదర్శి బి.బసవపున్నయ్య జిల్లా కమిటీకి మార్గనిర్దేశం చేశారు.
కార్యక్రమంలో టీడబ్ల్యూజేఎఫ్ రాష్ట్ర కార్యదర్శులు చంద్రశేఖర్, విజయానంద్, హెచ్యూజే వర్కింగ్ ప్రెసిడెంట్ నవీన్, ట్రెజరర్ రాజశేఖర్, ఆర్గనైజింగ్ సెక్రెటరీ నాగవాణి, ఆఫీస్ బేరర్స్ వీరేష్, సర్వేశ్వర్ రావు , శివశంకర్, రమేష్, మధుకర్, అచ్చిన ప్రశాంత్, నిస్సార్, లలిత, నర్సింహా, సాగర్, శ్రీధర్ తదితరులు పాల్గొన్నారు.