నోట్ల కట్టలు.. బంగారం కుప్పలు!

= మారని లంచావతారులు
= జలమండలి జీఎం ఇంట్లో ఏసీబీ దాడులు
= రూ.1.10 కోట్ల నగదు.. 2.1 కేజీల బంగారం, 9.2 కేజీల వెండి..
= కాస్ట్లీ విల్లాలు.. ఎకరాల కొద్దీ వ్యవసాయ భూములు..
= ఇవీ ఆయన అక్రమంగా సంపాదించిన ఆస్తుల చిట్టా
= ఆదాయానికి మించిన ఆస్తుల కేసులో కుమార్ అదుపులోకి..
= మొత్తం ఆస్తుల విలువ సుమారు రూ.5.88 ఉంటుందని అంచనా
= అక్రమార్కుల గుండెల్లో వణుకు పుట్టిస్తున్న ఏసీబీ ఉక్కుపాదం!

వేద న్యూస్, క్రైం బ్యూరో
రాష్ట్రంలో అవినీతి అధికారులు రోజురోజుకూ పెచ్చుమీరిపోతున్నారు. ప్రభుత్వాలు మారుతున్నా, చట్టాలు ఎంత కఠినంగా మారుతున్నా లంచగొండుల తీరులో మాత్రం ఏమాత్రం మార్పు రావడం లేదు. ఏసీబీ అధికారులు నిరంతరం దాడులు చేస్తూ, అవినీతి తిమింగలాలను రెడ్ హ్యాండెడ్‌గా పట్టుకుని జైలు గదుల్లో వేస్తున్నా.. అక్రమార్కులు తమ పద్ధతి మార్చుకోవడం లేదు. లంచాలు తీసుకోవడం, వందల కోట్లు కూడబెట్టడమే పనిగా పెట్టుకుంటున్నారు. తాజాగా హైదరాబాద్ జలమండలి జనరల్ మేనేజర్ కుమార్ నివాసాలపై ఏసీబీ అధికారులు జరిపిన మెరుపు దాడులు ఈ చేదు నిజాన్ని మరోసారి నిరూపించాయి. ఆదాయానికి మించిన ఆస్తులు కలిగి ఉన్నారనే పక్కా సమాచారంతో అధికారులు ఇవాళ తెల్లవారుజాము నుంచి జరిపిన సోదాల్లో కోట్లలో నగదు.. కిలోల కొద్దీ బంగారం, విలువైన ఆస్తి పత్రాలు బయటపడగా.. అధికారులు ఒక్కసారిగా ఖంగుతిన్నారు.

మారని నైజం.. పెచ్చుమీరుతున్న అవినీతి
తెలంగాణ ప్రభుత్వ కార్యాలయాల్లో లంచగొండితనం వేళ్లూనుకుపోయిందనడానికి ఈ ఘటనే సజీవ సాక్ష్యం. సామాన్య ప్రజల అవసరాలను ఆసరాగా చేసుకుని, తమ అధికారిక హోదాలను దుర్వినియోగం చేస్తూ కొందరు అధికారులు బెంబేలెత్తిస్తున్నారు. గత కొద్దిరోజులుగా ఏసీబీ అధికారులు ఉక్కుపాదం మోపుతూ, వరుసగా రైడ్స్ నిర్వహిస్తున్నా అక్రమార్కులలో భయం అన్నదే లేకుండా పోయింది. తోటి అధికారులు లంచాలు తీసుకుంటూ జైలు పాలవుతున్న దృశ్యాలను కళ్లారా చూస్తున్నా, తమకు ఏమీ కాదనే ధీమాతో లంచాల వేటను కొనసాగిస్తూనే ఉన్నారు. సంపాదనపై ఉన్న అత్యాశతో వందల కోట్లు అక్రమ మార్గంలో సంపాదించడమే పరమావధిగా బతుకుతున్నారు.

ఏసీబీ వ్యూహాత్మక దాడులు
జలమండలి జీఎం కుమార్ భారీగా ఆదాయానికి మించిన ఆస్తులు కూడబెట్టారన్న బలమైన ఆరోపణలు, ఫిర్యాదుల నేపథ్యంలో ఏసీబీ రంగంలోకి దిగింది. అత్యంత పక్కా వ్యూహంతో మంగళవారం తెల్లవారుజామున 6 గంటలకే మల్లాపూర్ పరిధిలో ఉన్న జీఎం కుమార్ నివాసానికి ఏసీబీ ప్రత్యేక బృందాలు చేరుకున్నాయి. తనిఖీలు ప్రారంభించడమే కాకుండా, ఇంట్లో ఉన్నవారు ఎవరూ బయటికి వెళ్లకుండా, లోపలికి ఎవరూ రాకుండా ముందస్తుగా కఠిన చర్యలు తీసుకున్నారు. కుమార్ తన అక్రమ సంపాదనను దాచడానికి బినామీలను, బంధువులను వాడుకున్నట్లు అధికారులు గుర్తించారు. ఇందులో భాగంగానే ఆయనకు సంబంధించిన కీలకమైన వ్యాపార, వ్యక్తిగత నెట్‌వర్క్‌పై అధికారులు పూర్తిగా దృష్టి పెట్టారు.

తవ్వేకొద్దీ అక్రమాస్తులు
ఈ దాడుల్లో భారీగా ఆస్తులు బయటపడినట్లు అధికారులు వెల్లడించారు. సంగారెడ్డి, నిజామాబాద్‌ జిల్లాల్లో మొత్తం 18 ఎకరాల వ్యవసాయ భూములు ఉన్నట్లు గుర్తించారు. అలాగే హైదరాబాద్‌లో 6 ప్లాట్లు, నిజామాబాద్‌లో 3 ఎకరాల భూమి, ఓ ఇంటికి సంబంధించిన పత్రాలు స్వాధీనం చేసుకున్నారు. అదేవిధంగా రూ.1.10 కోట్ల నగదును కూడా అధికారులు పట్టుకున్నారు. కుమార్‌ నివాసంలో నిర్వహించిన తనిఖీల్లో 2.1 కిలోల బంగారం, 9.2 కిలోల వెండి వస్తువులు లభించాయి. అదనంగా కారు, బైక్‌లను కూడా అధికారులు స్వాధీనం చేసుకున్నారు. ఇప్పటివరకు గుర్తించిన ఆస్తుల విలువ సుమారు రూ.5.88 కోట్లుగా అంచనా వేస్తున్నప్పటికీ, వాటి మార్కెట్‌ విలువ మరింత ఎక్కువగా ఉండొచ్చని అధికారులు భావిస్తున్నారు. ఈ వ్యవహారంపై అవినీతి నిరోధక చట్టం కింద కేసు నమోదు చేసిన ఏసీబీ అధికారులు, కుమార్‌కు సంబంధించిన ఇతర ఆస్తులపై కూడా విచారణ కొనసాగిస్తున్నట్లు తెలిపారు.

మారని అధికారుల తీరు
చట్టాలు ఎంత కఠినంగా మారుతున్నా, తోటి అవినీతి అధికారులు ఏసీబీ వలకు చిక్కి జైలు పాలవుతున్న దృశ్యాలను కళ్లారా చూస్తున్నా లంచగొండుల నైజంలో మాత్రం ఏమాత్రం మార్పు రావడం లేదు. సమాజంలో లంచగొండితనం నరనరాన జీర్ణించుకుపోయిందనడానికి ప్రతిరోజూ జరుగుతున్న ఏసీబీ దాడులే సజీవ సాక్ష్యం. సామాన్య ప్రజల అవసరాలను, ఆవేదనను ఆసరాగా చేసుకుని తమ అధికారిక హోదాలను అడ్డం పెట్టుకుని వందల కోట్లు అక్రమ మార్గంలో సంపాదించడమే కొందరు అధికారులు పరమావధిగా పెట్టుకుంటున్నారు. సమాజానికి సేవ చేయాల్సిన స్థానాల్లో కూర్చుని, ప్రజాధనాన్ని దోచుకుంటూ బినామీల పేర్లతో ఆస్తులు, విలాసవంతమైన ఫ్లాట్లు కూడబెడుతూ వ్యవస్థను పూర్తిగా భ్రష్టు పట్టిస్తున్నారు.