వావ్.. ఫ్యూచర్ ఓరుగల్లు!

= మామునూరు ఎయిర్‌పోర్ట్‌, ఓఆర్ఆర్‌, మెగా టెక్స్‌టైల్ పార్క్‌తో మారుతున్న నగర రూపురేఖలు
= హైదరాబాద్‌కు దీటుగా రియల్ ఎస్టేట్ హబ్‌గా ఎదుగుదల
= ఆకాశాన్నంటనున్న భూముల ధరలు
= వేలాది ఉద్యోగాలు కల్పించనున్న మెగా ప్రాజెక్టులు
= హైదరాబాద్ ఐటీ ఉద్యోగులు, ఎన్ఆర్ఐల దృష్టి ఇప్పుడు వరంగల్‌పైనే
= అభివృద్ధిలో పరుగులు.. సామాన్యులకు అందని భూముల ధరలు
= పెట్టుబడిదారుల చూపు ఉత్తర తెలంగాణ వైపు
= ఐటీ, టెక్స్‌టైల్, లాజిస్టిక్స్ రంగాలకు కొత్త ఊపు
= వరంగల్ – హైదరాబాద్ ఎకనామిక్ కారిడార్‌తో పెరుగుతున్న కనెక్టివిటీ
= గ్రామాల నుంచి గ్లోబల్ సిటీ వైపు వరంగల్ ప్రయాణం

వేద న్యూస్, ప్రత్యేక ప్రతినిధి
(కృష్ణ-9701923260 )
ఉత్తర తెలంగాణ గుండెకాయగా పేరొందిన వరంగల్ మహానగరం ఇప్పుడు కొత్త ఆర్థిక యుగంలోకి అడుగుపెడుతోంది. ఒకప్పుడు చారిత్రక కట్టడాలు, విద్యాసంస్థలు, వ్యవసాయ ఆధారిత ఆర్థిక వ్యవస్థతో గుర్తింపు పొందిన ఈ నగరం.. ఇప్పుడు భారీ మౌలిక సదుపాయాల ప్రాజెక్టులు, పారిశ్రామిక విస్తరణ, రవాణా కనెక్టివిటీ, ఐటీ పెట్టుబడులతో తెలంగాణలో రెండో అతిపెద్ద ఆర్థిక కేంద్రంగా ఎదగడానికి వేగంగా పయనిస్తోంది. ముఖ్యంగా మామునూరు విమానాశ్రయం పునర్నిర్మాణం, కాకతీయ మెగా టెక్స్‌టైల్ పార్క్, ఔటర్ రింగ్ రోడ్డు, హైదరాబాద్-వరంగల్ ఎకనామిక్ కారిడార్ వంటి ప్రాజెక్టులు నగర భవిష్యత్తును పూర్తిగా మార్చబోతున్నాయన్న అభిప్రాయం వ్యక్తమవుతోంది. ఈ పరిణామాల ప్రభావం ఇప్పుడు స్పష్టంగా రియల్ ఎస్టేట్ రంగంలో కనిపిస్తోంది. హనుమకొండ, కాజీపేట, మడికొండ, ధర్మసాగర్, హసన్‌పర్తి, గీసుకొండ వంటి ప్రాంతాల్లో భూముల ధరలు రోజురోజుకూ పెరుగుతున్నాయి. పెట్టుబడిదారులు, రియల్ ఎస్టేట్ వ్యాపారులు, ఐటీ ఉద్యోగులు, ఎన్ఆర్ఐలు వరంగల్ వైపు ఆసక్తిగా చూస్తున్నారు. ఒకప్పుడు తక్కువ ధరలకు లభించిన గ్రామీణ ప్రాంత భూములు ఇప్పుడు కోట్ల రూపాయల విలువ పలుకుతున్నాయి.

మామునూరు ఎయిర్‌పోర్ట్‌తో కొత్త ఊపు
వరంగల్ అభివృద్ధి చరిత్రలో అత్యంత కీలకమైన మలుపుగా మామునూరు విమానాశ్రయం పునర్నిర్మాణాన్ని భావిస్తున్నారు. దశాబ్దాలుగా నిలిచిపోయిన ఈ ప్రాజెక్ట్ ఇప్పుడు మళ్లీ వేగం అందుకుంది. ఎయిర్‌పోర్ట్ నిర్మాణానికి అవసరమైన 953 ఎకరాల భూమిని తెలంగాణ ప్రభుత్వం ఇప్పటికే కేంద్రానికి అప్పగించింది. దీంతో విమానాశ్రయ నిర్మాణానికి సంబంధించి తదుపరి ప్రక్రియలు వేగవంతమయ్యాయి. ఇక ఈ ప్రాజెక్టుకు మరింత ప్రాధాన్యం తీసుకొచ్చిన అంశం ఏమిటంటే.. విమానాశ్రయ నిర్మాణానికి అవసరమైన టెక్నికల్ సపోర్ట్, సూపర్వైజింగ్ బాధ్యతలను ఎయిర్‌పోర్ట్స్ అథారిటీ ఆఫ్ ఇండియా వరంగల్ నేషనల్ ఇన్‌స్టిట్యూట్ ఆఫ్ టెక్నాలజీ కు అప్పగించడం. దేశవ్యాప్తంగా పేరొందిన సాంకేతిక విద్యాసంస్థ అయిన వరంగల్ ఎన్ఐటీ భాగస్వామ్యం కావడంతో ప్రాజెక్టుపై మరింత నమ్మకం పెరిగింది. ఎయిర్‌పోర్ట్ నిర్మాణం పూర్తయితే వరంగల్‌కు దేశీయ, అంతర్జాతీయ స్థాయిలో కనెక్టివిటీ పెరుగుతుంది. పరిశ్రమలు, ఐటీ సంస్థలు, ఎగుమతుల రంగం, పర్యాటక రంగం అన్నీ ఒకేసారి లాభపడే అవకాశం ఉంది. ముఖ్యంగా ఉత్తర తెలంగాణకు ఇది గేమ్ చేంజర్ ప్రాజెక్ట్‌గా మారుతుందని నిపుణులు అభిప్రాయపడుతున్నారు.

కాకతీయ మెగా టెక్స్‌టైల్ పార్క్‌తో పారిశ్రామిక విప్లవం
గీసుకొండ మండలం చౌటపల్లి వద్ద ఏర్పాటు చేస్తున్న పీఎం మిత్ర కాకతీయ మెగా టెక్స్‌టైల్ పార్క్ వరంగల్ ఆర్థిక వ్యవస్థకు మరో భారీ బలంగా మారనుంది. రూ.1,695 కోట్ల వ్యయంతో 1,320 ఎకరాల్లో అభివృద్ధి చేస్తున్న ఈ పార్క్ దేశంలోనే తొలి ఫంక్షనల్ టెక్స్‌టైల్ పార్క్‌గా గుర్తింపు పొందింది. టెక్స్‌టైల్ రంగానికి సంబంధించిన స్పిన్నింగ్, వీవింగ్, డైయింగ్, గార్మెంట్స్, ఎగుమతులు వంటి అన్ని కార్యకలాపాలు ఒకే ప్రాంగణంలో ఉండేలా ఈ పార్క్‌ను రూపకల్పన చేశారు. దీని వల్ల వేల సంఖ్యలో ప్రత్యక్ష, పరోక్ష ఉద్యోగాలు లభించనున్నాయి. ముఖ్యంగా గ్రామీణ యువత, మహిళలకు ఉపాధి అవకాశాలు పెరుగుతాయని అధికారులు చెబుతున్నారు. ఇప్పటికే పలువురు పారిశ్రామికవేత్తలు, టెక్స్‌టైల్ కంపెనీలు ఈ ప్రాంతంలో పెట్టుబడులకు ఆసక్తి చూపుతున్నాయి. విమానాశ్రయం, ఎకనామిక్ కారిడార్, రైల్వే కనెక్టివిటీ కలిసొస్తే వరంగల్ దక్షిణ భారత టెక్స్‌టైల్ కేంద్రంగా మారే అవకాశాలు ఉన్నాయని పరిశ్రమ వర్గాలు భావిస్తున్నాయి.

ఓఆర్ఆర్‌తో భూముల ధరలకు రెక్కలు
వరంగల్ మహానగర అభివృద్ధి సంస్థ ప్రతిపాదించిన ఔటర్ రింగ్ రోడ్డు అలైన్‌మెంట్ ఖరారు కావడం రియల్ ఎస్టేట్ రంగంలో భారీ మార్పులకు దారి తీసింది. ముఖ్యంగా ధర్మసాగర్, హసన్‌పర్తి, కాజీపేట, మడికొండ, రాంపూర్ ప్రాంతాల్లో భూముల ధరలు ఒక్కసారిగా పెరిగాయి. రియల్ ఎస్టేట్ వ్యాపారుల అంచనాల ప్రకారం కొన్ని ప్రాంతాల్లో భూముల విలువ సంవత్సర కాలంలోనే 12 నుంచి 15 శాతం వరకు పెరిగింది. గతంలో గజానికి కొన్ని వేల రూపాయలుగా ఉన్న ధరలు ఇప్పుడు లక్షల రూపాయలకు చేరుకున్నాయి. ముఖ్యంగా హనుమకొండ, మడికొండ ప్రాంతాల్లో గజం ధర రూ.1 లక్ష నుంచి రూ.2 లక్షల వరకు పలుకుతోందని రియల్ ఎస్టేట్ వర్గాలు చెబుతున్నాయి. ఓఆర్ఆర్ పూర్తయితే వరంగల్, హనుమకొండ, కాజీపేట మధ్య ట్రాఫిక్ ఒత్తిడి తగ్గడమే కాకుండా పరిశ్రమలకు, లాజిస్టిక్స్ రంగానికి భారీ ఊతం లభిస్తుంది. హైదరాబాద్-వరంగల్ హైవేపై ప్రయాణ సమయం కూడా గణనీయంగా తగ్గే అవకాశం ఉంది.

హైదరాబాద్‌కు ప్రత్యామ్నాయ నగరంగా వరంగల్?
ఇప్పటి వరకు తెలంగాణలో రియల్ ఎస్టేట్ అంటే హైదరాబాద్ అనే భావన ఉండేది. కానీ ఇప్పుడు వరంగల్ కూడా అదే దిశగా వేగంగా దూసుకుపోతోందని మార్కెట్ విశ్లేషకులు చెబుతున్నారు. హైదరాబాద్‌లో భూముల ధరలు ఆకాశాన్నంటడంతో పెట్టుబడిదారులు ప్రత్యామ్నాయ నగరాల వైపు మొగ్గుచూపుతున్నారు. ఆ జాబితాలో వరంగల్ ముందంజలో నిలుస్తోంది. ప్రస్తుతం వరంగల్ పరిధిలో సుమారు 350కి పైగా కొత్త నివాస ప్రాజెక్టులు నిర్మాణంలో ఉన్నాయి. అపార్ట్‌మెంట్లు, గేటెడ్ కమ్యూనిటీలు, విల్లా ప్రాజెక్టులు వేగంగా పెరుగుతున్నాయి. స్థానిక వ్యాపారవేత్తలతో పాటు హైదరాబాద్‌లో పనిచేస్తున్న ఐటీ ఉద్యోగులు, విదేశాల్లో ఉన్న ఎన్ఆర్ఐలు కూడా వరంగల్‌లో పెట్టుబడులు పెట్టేందుకు ఆసక్తి చూపుతున్నారు.

ఐటీ హబ్‌గా మారే అవకాశాలు
తెలంగాణ ప్రభుత్వం వరంగల్‌ను రాష్ట్రంలో రెండో అతిపెద్ద ఐటీ కేంద్రంగా అభివృద్ధి చేయాలని లక్ష్యంగా పెట్టుకుంది. ఇప్పటికే ఐటీ టవర్ ఏర్పాటు, సాఫ్ట్‌వేర్ కంపెనీల రాక, స్టార్టప్ ఎకోసిస్టమ్ అభివృద్ధి వంటి చర్యలు ప్రారంభమయ్యాయి. మడికొండ, రాంపూర్ ప్రాంతాల్లో ఐటీ సెజ్‌లు, పరిశ్రమల విస్తరణకు అనుకూల పరిస్థితులు ఉండటంతో ఈ ప్రాంతాలు పెట్టుబడులకు హాట్‌స్పాట్‌లుగా మారుతున్నాయి. మెరుగైన రోడ్లు, విమానాశ్రయం, పరిశ్రమల వృద్ధి కలిపి వరంగల్‌ను ఐటీ, ఇండస్ట్రియల్ మిక్స్‌డ్ ఎకానమీగా మార్చే అవకాశం ఉందని నిపుణులు అభిప్రాయపడుతున్నారు.

రవాణా, కనెక్టివిటీతో వేగవంతమైన వృద్ధి
హైదరాబాద్-వరంగల్ ఎకనామిక్ కారిడార్, ఎన్ హెచ్-163 విస్తరణ పనులు వరంగల్ అభివృద్ధికి మరింత ఊతమిస్తున్నాయి. రవాణా సౌకర్యాలు మెరుగుపడటంతో పరిశ్రమలు, గిడ్డంగులు, లాజిస్టిక్స్ కేంద్రాలు ఏర్పడే అవకాశాలు పెరుగుతున్నాయి. హైదరాబాద్ నుంచి వరంగల్‌కు ప్రయాణ సమయం తగ్గడం, భవిష్యత్తులో వేగవంతమైన రైల్వే కనెక్టివిటీ రావడం, విమానాశ్రయం అందుబాటులోకి రావడంతో వరంగల్‌ను ప్రాంతీయ వాణిజ్య కేంద్రంగా తీర్చిదిద్దనున్నాయి.

పెరుగుతున్న ధరలు.. సామాన్యుల్లో ఆందోళన
అయితే ఈ అభివృద్ధి మరోవైపు ఆందోళనకూ కారణమవుతోంది. భూముల ధరలు విపరీతంగా పెరగడంతో మధ్యతరగతి, సామాన్య కుటుంబాలకు స్థలం కొనుగోలు చేయడం కష్టమవుతోంది. గ్రామీణ ప్రాంతాల్లోనూ రియల్ ఎస్టేట్ వ్యాపారం పెరగడంతో వ్యవసాయ భూములు వేగంగా కమర్షియల్ ఆస్తులుగా మారుతున్నాయి. కొన్ని ప్రాంతాల్లో అక్రమ వెంచర్లు, అనుమతుల్లేని లే అవుట్లు కూడా పెరుగుతున్నాయని స్థానికులు చెబుతున్నారు. భవిష్యత్తులో సమస్యలు రాకుండా ప్రభుత్వం కఠిన నియంత్రణలు అమలు చేయాల్సిన అవసరం ఉందని పట్టణాభివృద్ధి నిపుణులు సూచిస్తున్నారు.

ఉత్తర తెలంగాణ భవిష్యత్తును మార్చే కేంద్రంగా వరంగల్
మామునూరు ఎయిర్‌పోర్ట్, కాకతీయ మెగా టెక్స్‌టైల్ పార్క్, ఓఆర్ఆర్, ఐటీ విస్తరణ, ఎకనామిక్ కారిడార్ కలిసి వరంగల్‌ను తెలంగాణలో అత్యంత వేగంగా ఎదుగుతున్న నగరంగా నిలబెడుతున్నాయి. ఒకప్పుడు చారిత్రక నగరంగా మాత్రమే గుర్తింపు పొందిన వరంగల్.. ఇప్పుడు పరిశ్రమలు, ఐటీ, విద్య, రవాణా, రియల్ ఎస్టేట్ రంగాల్లో భారీ అవకాశాల నగరంగా మారుతోంది. రాబోయే ఐదేళ్లలో ఈ ప్రాజెక్టులు పూర్తిస్థాయిలో అమల్లోకి వస్తే వరంగల్ రూపురేఖలు పూర్తిగా మారిపోవడం ఖాయమని విశ్లేషకులు భావిస్తున్నారు. హైదరాబాద్ తర్వాత తెలంగాణలో పెట్టుబడిదారులు అత్యంత ఆసక్తిగా చూస్తున్న నగరంగా వరంగల్ నిలవడం ఇప్పుడు స్పష్టంగా కనిపిస్తోంది.