= మయన్మార్, కంబోడియా, లావోస్ దేశాల్లో నెట్వర్క్ అడ్డాలు
= గత నాలుగేళ్లుగా సైబర్ బాధితుల్లో తెలంగాణే టాప్
= ఉత్తరాది ముఠాలతో చెయ్యికలిపి చైనా ముఠాల పంజా
= చదువుకున్న యువతే లక్ష్యంగా సాగుతున్న డిజిటల్ దోపిడీ
= హ్యూమన్ ట్రాఫికింగ్ ద్వారా ఇండియన్ కేడర్ నియామకాలు
= రూ.కోట్లలో సరిహద్దులు దాటుతున్న తెలంగాణ ఐటీ సొమ్ము
= స్టాక్ ట్రేడింగ్, డిజిటల్ అరెస్టుల పేరిట వేధింపులు
= పోలీసు వ్యవస్థకు సవాలుగా మారిన సరిహద్దుల నేరాలు
= జాగ్రత్త పడకపోతే అకౌంట్లు ఖాళీ కావడం ఖాయం
వేద న్యూస్, ప్రత్యేక ప్రతినిధి
ఆగ్నేయాసియా దేశాలైన మయన్మార్, కంబోడియా, లావోస్ కేంద్రాలుగా కార్యకలాపాలు సాగిస్తున్న అంతర్జాతీయ చైనిస్ సైబర్ ముఠాలు తమ క్రూరమైన కన్ను తెలంగాణపై వేశాయి. గత నాలుగు సంవత్సరాలుగా మన రాష్ట్రంలో సైబర్ నేరాల బారిన పడి, ఆన్లైన్ ద్వారా కష్టార్జితాన్ని పోగొట్టుకుంటున్న బాధితుల సంఖ్య దేశంలోనే అత్యధికంగా నమోదు కావడం అత్యంత భయాందోళన కలిగిస్తోంది. ఒకప్పుడు కేవలం జార్ఖండ్లోని జామతారా లేదా రాజస్థాన్లోని మేవాత్ పరిసర ప్రాంతాలకే పరిమితమైన సైబర్ నేరాలు, ఇప్పుడు చైనా ముఠాల పర్యవేక్షణలో సరిహద్దులు దాటి అంతర్జాతీయ కుంభకోణంగా మారాయి. విపరీతంగా పెరిగిన ఐటీ విస్తరణ, పెరిగిన డిజిటల్ లావాదేవీలు మరియు ప్రజల వద్ద ఉన్న ఆర్థిక సామర్థ్యాన్నే ఆసరాగా చేసుకుని ఈ ముఠాలు తెలంగాణ వాసులను ప్రధాన లక్ష్యంగా చేసుకున్నాయి.
మయన్మార్, కంబోడియా, లావోస్లలో సైబర్ కాంపౌండ్లు
ఈ విదేశీ చైనా ముఠాలు మయన్మార్, కంబోడియా, లావోస్ సరిహద్దు ప్రాంతాల్లో మిలిటరీ తిరుగుబాటుదారులు, సాయుధ బలగాల రక్షణలో ప్రత్యేక ‘సైబర్ పార్కులు’ లేదా ‘స్కామ్ కాంపౌండ్లను’ ఏర్పాటు చేసుకున్నాయి. అక్కడ వేలాది మంది భారతీయులను, ముఖ్యంగా ఉద్యోగాల పేరిట తీసుకెళ్లి తీవ్ర నిర్బంధంలో ఉంచి భారతదేశానికి ఫోన్ చేయిస్తున్నారు. ఈ చైనా ముఠాలకు మన దేశంలోని ఉత్తరాది రాష్ట్రాలకు చెందిన స్థానిక సైబర్ నేరగాళ్లతో (నార్త్ ఇండియన్ గ్యాంగ్స్) పక్కా నెట్వర్క్ ఉంది. ముఠాల నకిలీ బ్యాంక్ ఖాతాలు, నకిలీ సిమ్ కార్డ్లను ఉత్తరాది గ్యాంగ్స్ సమకూరుస్తుంటే.. ప్రధాన సాంకేతికత, క్రిప్టోకరెన్సీ మళ్లింపుల వెనుక చైనా హెడ్లు కీలక పాత్ర పోషిస్తున్నారు.
నాల్గేళ్లుగా ఎందుకు పెరిగింది?
గడిచిన నాలుగేళ్ల గణాంకాలను పరిశీలిస్తే, ఆన్లైన్ ఆర్థిక మోసాల్లో తెలంగాణ నానాటికీ మొదటి స్థానానికి చేరుకోవడానికి ప్రధాన కారణాలు ఉన్నాయని నిపుణులు విశ్లేషిస్తున్నారు. తెలంగాణ ప్రజల్లో ముఖ్యంగా హైదరాబాద్ సహా ద్వితీయ శ్రేణి నగరాల్లో డిజిటల్ చెల్లింపుల వినియోగం, స్టాక్ మార్కెట్ ఆసక్తి చాలా ఎక్కువ. దీనినే సైబర్ ముఠాలు ఎరగా వాడుకుంటున్నాయి. ప్రముఖ అంతర్జాతీయ పెట్టుబడి సంస్థల పేరిట వాట్సాప్, టెలిగ్రామ్ గ్రూపులు క్రియేట్ చేసి, తక్కువ సమయంలోనే వందల శాతాల లాభాలు వస్తాయని నమ్మించి కోట్లాది రూపాయలు డిపాజిట్ చేయిస్తున్నారు. సీబీఐ, ఈడీ, నాసిక్ కస్టమ్స్, లేదా పోలీసు అధికారుల ముసుగులో నిమిషాల వ్యవధిలో హెచ్చరించి, ‘డిజిటల్ అరెస్ట్’ పేరుతో బాధితుల ప్రాణభయాన్ని సృష్టించి అకౌంట్లు ఖాళీ చేయిస్తున్నారు. మోసపోయిన సొమ్ము మ్యూల్ ఖాతాల నుంచి సెకన్లలో క్రిప్టోకరెన్సీ గా మారి చైనా, కంబోడియా, మలేషియా వాలెట్లలోకి మళ్లిపోతోంది.
పోలీసులకు సవాలుగా మారిన అంతర్జాతీయ దర్యాప్తు
తెలంగాణ పోలీసులు సమర్థవంతంగా పనిచేస్తూ కేసులు నమోదు చేస్తున్నప్పటికీ, ఈ దర్యాప్తు సరిహద్దులు దాటడం ప్రధాన ప్రతిబంధకంగా మారింది. విదేశాలలో ఉన్న సైబర్ కాంపౌండ్లను ఛేదించాలన్నా, అక్కడ ఉన్న నిందితులను అరెస్ట్ చేయాలన్నా అంతర్జాతీయ దౌత్య సంబంధాలు, రెడ్కార్నర్ నోటీసులు, సుదీర్ఘమైన చట్టపరమైన ప్రక్రియలు అవసరమవుతున్నాయి. స్థానికంగా ఉన్న మ్యూల్ అకౌంట్ హోల్డర్లను పోలీసులు పట్టుకుంటున్నప్పటికీ, అసలు సూత్రధారులైన చైనా ముఠాల నాయకులు ఆగ్నేయాసియాలోని సురక్షిత స్థావరాల నుంచి వందల కోట్లను దర్జాగా కొల్లగొడుతున్నారు.
ప్రజల్లో స్వీయ జాగ్రత్తలే ఏకైక రక్షణ
నాలుగేళ్లుగా అత్యధిక సైబర్ బాధితులు ఉన్న రాష్ట్రంగా తెలంగాణ నిలవడం శ్రేయస్కరం కాదు. కాబట్టి ప్రజలు అపరిచిత వ్యక్తుల నుంచి వచ్చే వీడియో కాల్స్, ట్రేడింగ్ పెట్టుబడుల ప్రకటనలు, పార్ట్టైమ్ జాబ్ ఆఫర్లను ఎట్టి పరిస్థితుల్లోనూ నమ్మవద్దు. సాంకేతిక పరిజ్ఞానంతో పాటు కాస్త సమయస్ఫూర్తిని ప్రదర్శిస్తేనే ఈ ‘చైనా-నార్త్ ఇండియన్’ సైబర్ నెట్వర్క్ బారిన పడకుండా కాపాడుకోగలము. ఒకవేళ ఏమరపాటుతో ఆన్లైన్ మోసానికి గురైతే, ఏమాత్రం ఆలస్యం చేయకుండా గోల్డెన్ అవర్లో నేషనల్ సైబర్ క్రైమ్ హెల్ప్లైన్ నంబర్ 1930 లేదా అధికారిక వెబ్సైట్ ద్వారా ఫిర్యాదు చేసి సొమ్మును ఫ్రీజ్ చేయించుకోవాలని పోలీసులు కోరుతున్నారు.