= జీవో 97పై భగ్గుమన్న విద్యార్థి లోకం
= పాలిటెక్నిక్తో స్కిల్ వర్సిటీల అనుసంధానంపై వ్యతిరేకత
= డిప్లొమా తర్వాత బీటెక్ అవకాశాలు పోతాయని ఆందోళన
= ఈసెట్ లేటరల్ ఎంట్రీ రద్దవుతుందన్న భయం
= టెక్నికల్ విద్యను శ్రామిక శిక్షణగా మార్చొద్దని డిమాండ్
= కాలేజీల విలీనంతో అధ్యాపకుల సర్వీసులపైనా గుబులు
= ఫీజు రీయింబర్స్ మెంట్, స్కాలర్షిప్లు వెంటనే ఇవ్వాలని పట్టు
= రాష్ట్రవ్యాప్తంగా కాలేజీల బంద్, రహదారులపై రాస్తారోకోలు
= వరంగల్, సిరిసిల్ల, హైదరాబాద్లలో ఉధృతంగా నిరసనలు
= దిగిరాకుంటే సచివాలయ ముట్టడికి విద్యార్థి సంఘాల హెచ్చరిక
వేద న్యూస్, ఎల్.కృష్ణ (ప్రత్యేక ప్రతినిధి)
తెలంగాణలో సాంకేతిక విద్యా వ్యవస్థను సమూలంగా మార్చేసే దిశగా రాష్ట్ర ప్రభుత్వం తీసుకొచ్చిన వివాదాస్పద జీవో నంబర్ 97 విద్యార్థి వర్గాల్లో తీవ్ర అలజడి రేపుతోంది. నైపుణ్యాభివృద్ధి పేరిట ‘శక్తి’ స్కీమ్ను తెరపైకి తెచ్చి ప్రభుత్వ పాలిటెక్నిక్ కళాశాలలను ఐటీఐలు, అడ్వాన్స్డ్ టెక్నాలజీ సెంటర్లు, యంగ్ ఇండియా స్కిల్ యూనివర్సిటీలతో అనుసంధానం చేయాలని ప్రభుత్వం తీసుకున్న నిర్ణయంపై రాష్ట్రవ్యాప్తంగా నిరసన జ్వాలలు మిన్నంటుతున్నాయి. సాంకేతిక పరిజ్ఞానాన్ని, ఇంజనీరింగ్ పునాదులను అందించే పాలిటెక్నిక్ వ్యవస్థ స్వయంప్రతిపత్తిని దెబ్బతీసేలా ఉన్న ఈ నిర్ణయాన్ని తక్షణమే ఉపసంహరించుకోవాలని, జీవో 97ను బేషరతుగా రద్దు చేయాలని డిమాండ్ చేస్తూ వేలాది మంది విద్యార్థులు రోడ్డెక్కారు.
మూడేళ్ల డిప్లొమా తర్వాత బీటెక్ కల ఏమవుతుంది?
ప్రభుత్వ పాలిటెక్నిక్ విద్యార్థుల ప్రధాన ఆందోళన వారి ఉన్నత విద్యా భవిష్యత్తుపైనే కేంద్రీకృతమైంది. పదో తరగతి పూర్తికాగానే ప్రవేశ పరీక్ష రాసి పాలిటెక్నిక్లో చేరే విద్యార్థులు మూడేళ్ల డిప్లొమా పూర్తి చేసుకుని, ఈసెట్ లేటరల్ ఎంట్రీ ద్వారా నేరుగా ఇంజనీరింగ్ రెండో సంవత్సరంలో అడ్మిషన్ పొందడం దశాబ్దాలుగా వస్తున్న విద్యా విధానం. అయితే శక్తి స్కీమ్ ద్వారా పాలిటెక్నిక్ను స్కిల్ వర్సిటీలకు అనుసంధానిస్తే లేటరల్ ఎంట్రీ రద్దయ్యే ప్రమాదం ఉందని విద్యార్థులు భయాందోళన చెందుతున్నారు. మూడేళ్లు కష్టపడి సాంకేతిక కోర్సులు పూర్తి చేసిన తర్వాత, బీటెక్ చేయాలంటే మళ్లీ రెండేళ్లు ఇంటర్మీడియట్ చదవాల్సిన దుస్థితి కల్పిస్తే మా విలువైన సమయం, భవిష్యత్తు నాశనమైపోతాయి అని విద్యార్థులు ఆవేదన వ్యక్తం చేస్తున్నారు.
డిప్లొమాను కేవలం శ్రామిక శిక్షణగా మార్చొద్దు
పాలిటెక్నిక్ విద్యను సాధారణ వృత్తి విద్యా లేదా శ్రామిక శిక్షణా కేంద్రాల స్థాయికి దిగజార్చవద్దని విద్యార్థి సంఘాలు తీవ్రస్థాయిలో ఆగ్రహం వ్యక్తం చేస్తున్నాయి. పాలిటెక్నిక్ కళాశాలల్లో థియరీతో పాటు ల్యాబ్లలో ప్రయోగాత్మక సాంకేతిక పరిజ్ఞానాన్ని, ఇంజనీరింగ్ స్థాయి ప్రాథమిక సూత్రాలను నేర్పిస్తారు. అలాంటి స్వతంత్రత కలిగిన వ్యవస్థను కేవలం ఐటీఐలు, స్వల్పకాలిక నైపుణ్య శిక్షణలతో ముడిపెట్టి పరిశ్రమలకు చౌకగా లభించే కూలీలుగా మార్చే కుట్ర జరుగుతోందని విద్యార్థి సంఘాల నేతలు ఆరోపిస్తున్నారు. పరిశ్రమల అవసరాలకు తగ్గట్టుగా నైపుణ్యాలు పెంచడాన్ని ఎవరూ తప్పుపట్టకపోయినా, పాలిటెక్నిక్ డిప్లొమాకు ఉన్న సాంకేతిక హోదాను తొలగించి కేవలం నైపుణ్య సర్టిఫికెట్లకే పరిమితం చేస్తే భవిష్యత్తు అంధకారమవుతుందని ఆందోళన వ్యక్తం చేస్తున్నారు.
పేద, మధ్యతరగతి విద్యార్థులపై తీవ్ర ఆర్థిక భారం
పాలిటెక్నిక్ కళాశాలల్లో అత్యధికంగా గ్రామీణ, పేద, దిగువ మధ్యతరగతి కుటుంబాలకు చెందిన విద్యార్థులే చదువుకుంటున్నారు. తక్కువ ఖర్చుతో ప్రభుత్వ కాలేజీల్లో డిప్లొమా పూర్తి చేసి, ఆపై లేటరల్ ఎంట్రీ ద్వారా బీటెక్ పూర్తి చేసుకుని సాఫ్ట్వేర్, కోర్ ఇంజనీరింగ్ రంగాల్లో స్థిరపడాలనే లక్ష్యంతో వారు చేరుతుంటారు. ఇప్పుడు ఈ విద్యా మార్గానికి బ్రేకులు వేస్తే పేద విద్యార్థులు ఇంజనీరింగ్ విద్యకు శాశ్వతంగా దూరం కావాల్సి వస్తుందని వాపోతున్నారు. ఇప్పటికే ప్రభుత్వం నుంచి రావాల్సిన ఫీజు రీయింబర్స్మెంట్, విద్యార్థుల స్కాలర్షిప్లు సకాలంలో విడుదల కాక విద్యార్థులు తీవ్ర ఇబ్బందులు ఎదుర్కొంటున్నారు. ఇలాంటి సమయంలో మార్పుల పేరిట విద్యా విధానాన్ని గందరగోళపరిస్తే ప్రైవేటు సంస్థల చేతుల్లో విద్యార్థులు బలవుతారని విద్యారంగ నిపుణులు హెచ్చరిస్తున్నారు.
అధ్యాపకుల్లోనూ పెరిగిన సర్వీసు ఆందోళనలు
జీవో 97 ప్రభావం కేవలం విద్యార్థులకే కాకుండా పాలిటెక్నిక్ కళాశాలల్లో పనిచేస్తున్న అధ్యాపకులు, అధ్యాపకేతర సిబ్బందిపైనా తీవ్రంగా పడుతోంది. పాలిటెక్నిక్ వ్యవస్థను స్కిల్ యూనివర్సిటీ, ఏటీసీల పరిధిలోకి మారిస్తే సాంకేతిక విద్యా శాఖ పరిధిలోని ఉద్యోగుల క్యాడర్ నిర్మాణం, ప్రమోషన్ల విధానం, సర్వీసు నిబంధనలు గందరగోళంలో పడతాయన్న భయం అధ్యాపకుల్లో వ్యక్తమవుతోంది. సాంకేతిక విద్యా మండలి నిబంధనల ప్రకారం నడుస్తున్న కళాశాలలను కార్పొరేట్ తరహా నైపుణ్య కేంద్రాలతో విలీనం చేయడం వల్ల ప్రభుత్వ లెక్చరర్ల సర్వీసు భద్రత ప్రశ్నార్థకంగా మారుతుందని అధ్యాపక సంఘాలు కూడా అంతర్గతంగా తీవ్ర అసంతృప్తిని వ్యక్తం చేస్తున్నాయి.
రాష్ట్ర వ్యాప్తంగా ధర్నాలు..
జీవో 97ను తక్షణమే రద్దు చేయాలని డిమాండ్ చేస్తూ రాష్ట్రవ్యాప్తంగా పాలిటెక్నిక్ కళాశాలలు నిరసనలతో దద్దరిల్లుతున్నాయి. మేడ్చల్, వరంగల్, రాజన్న సిరిసిల్ల, వికారాబాద్, హైదరాబాద్, రంగారెడ్డి జిల్లాల్లోని పాలిటెక్నిక్ కళాశాలల ఎదుట విద్యార్థులు తరగతులను బహిష్కరించి మహాధర్నాలు, రాస్తారోకోలు నిర్వహించారు. ప్రధాన రహదారులపై బైఠాయించి ప్రభుత్వానికి వ్యతిరేకంగా నినాదాలు చేశారు. పాలిటెక్నిక్ విద్య ప్రత్యేకతను కాపాడాలని, ఈసెట్ ద్వారా బీటెక్ ప్రవేశాలను యథాతథంగా కొనసాగిస్తామని ప్రభుత్వం స్పష్టమైన అధికారిక ప్రకటన చేయాలని డిమాండ్ చేశారు. తక్షణమే జీవో 97ను ఉపసంహరించుకోకపోతే విద్యార్థి సంఘాలతో కలిసి సచివాలయాన్ని ముట్టడిస్తామని విద్యార్థి లోకం హెచ్చరించింది.