వేద న్యూస్, డెస్క్:
‘‘ఏ దేశమేగినా పొగడరా తల్లి భూమి భారతి..నిలపరా నీ జాతి నిండు గౌరవాన్ని’’ అన్న పంక్తులను ఆదర్శంగా తీసుకున్న తెలుగు వారు విదేశాల్లో సంక్రాంతి సంబురాలు ఘనంగా నిర్వహించారు. కెనడా నోవా స్కోటియా తెలుగు అసోసియేషన్ హాలిఫాక్స్ లో వైభవంగా సంక్రాంతి, భోగి & కనుమ వేడుకలు జరుపుకున్నారు. హాలిఫాక్స్, డార్ట్ మౌత్ , బెడ్ ఫోర్డ్, సమీపవాసులందరూ కలసి బెడ్‌ఫోర్డ్‌లోని ఫ్రెంచ్ స్కూల్‌లో సంక్రాంతి సెలబ్రేట్ చేసుకున్నారు.
నిర్వాహకులు సుప్రజా హరి, ప్రియాంక సురేష్, శ్రీలేఖ బృంద సభ్యులు కలిసి వేదికను..సంక్రాంతి పండుగ సంప్రదాయం ఉట్టిపడేలా ముగ్గులతో, గాలిపటాలతో, పూల తోరణాలతో , భోగి కుండలతో అలంకరించారు. కెనడా నోవా స్కోటియాలోని 300 కి పైగా తెలుగు కుటుంబాలు వేడుకకు పండుగ కళను తీసుకు రావడానికి అచ్చ తెలుగు సంప్రదాయ దుస్తులు ధరించి కన్నుల విందు చేశారు.
కెనడా నోవా స్కోటియా తెలుగు అసోసియేషన్ ప్రెసిడెంట్ శ్రీహరి రెడ్డి చల్లా ఆధ్వర్యంలో స్పాన్సర్లు (కెనడా ఎడ్యుకేషన్ కనెక్ట్- విజయ్ రాహుల్ భాష్యకర్ల , శ్రీహరి రెడ్డి చల్లా , ఇండియన్ గ్రోసరీస్ – జితేందర్ బాలి , టైటాన్ ఓక్ ఫైనాన్షియల్ సర్వీస్ యాజమాన్యం, ఆండ్రూ లీపర్, వన్ రియాల్టీ ఈస్ట్ -శివ నవనీథన్, శ్రీహరి బృంద సభ్యుల సహకారం తో విజయవంతంగా వేడుకలు నిర్వహించారు.
ఇలాంటి కార్యక్రమాలు జరుపుకోవడం తెలుగు పండుగలకు మూలమని, భావి తరాలకు మన సంప్రదాయాలను తెలియజేసేందుకు దోహదపడుతుందని నిర్వాహకులు తెలిపారు. నృత్య వేదికలో పిల్లలు నిత్య శ్రీ విద్య, రోహిత్ సాయి చల్లా, శ్రీనివాస్ చిన్ని, మహాశ్విన్ విద్యా, సుసుష్మ ప్రదీప్, వేదాన్షిక సురేష్, తదితరులు పాల్గొన్నారు. చిన్న పిల్లలకు ముత్తైదువులతో భోగి పండ్లు పోయించి చిన్నారులను కలకాలం ఆయురారోగ్యాలతో ఉండాలని దీవించారు. చిన్న పెద్ద అందరూ కలిసి భోగి మంటల చుట్టూ నృత్యం చేశారు.
సరదాలు తెచ్చే సంక్రాంతి, హరిదాసుల ప్రదర్శనలతో, డూ డూ బసవన్న మాటలతో అబ్బురపరిచాయి. జానపదం, కూచిపూడి, భరతనాట్యం, ఒడిసి, తెలుగు చిత్రాల పాటలు నృత్యాల వంటి అనేక సాంస్కృతిక నృత్యాలు ప్రదర్శించబడ్డాయి. ప్రజలు వాటిని చూసి చాలా ఆనందించారు. పండుగలంటే ఇలా ఉండాలి అన్న అనుభూతిని కలిగించాయి. అందరు మైమరచి మన తెలుగు ఔన్నత్యాన్ని కొనియాడారు కళాకారులందరికీ పార్వతి శాస్త్రి చెల్లూరి, వేణుగోపాల్ రావు బెజవాడ, నూకరాజు కరణం జ్ఞాపికతో సత్కరించారు. శ్రీనివాస్ చిన్ని బృందం ప్రజలందరికీ అరటి ఆకులో రుచికరమైన తెలుగు వారి సంక్రాంతి ప్రత్యేక పండుగ విందు భోజనాలు అందించారు.
కెనడా నోవా స్కోటియా సంక్రాంతి సంబరాలు ఆరు గంటల పాటు ఎంతో సరదాగా, ఉత్సాహంగా నిర్వహించారు. కార్యక్రమం ముగిసే సమయానికి, నిర్వాహకులు ప్రతి ఒక్కరికి, స్పాన్సర్‌లకు మరియు వాలంటీర్లకు కృతజ్ఞతలు తెలిపారు. కెనడా నోవా స్కోటియా అసోసియేషన్ అధ్యక్షులు శ్రీ హరి మాట్లాడుతూ ఇటువంటి కార్యక్రమాలు జరుపుకోవడం మూలంగా మన పండుగలు మరియు సంప్రదాయాలు భావితరాలకు తెలియజేసే ముందుకు తీసుకు వెళ్లడానికి దోహదం చేస్తాయని తెలిపారు.
మన సంస్కృతి, ప్రేమను తరువాతి తరానికి పంచాలని ఇలాంటి మరిన్ని కార్యక్రమాలు జరగాలని ఆశించారు. సుప్రజ హరి మాట్లాడుతూ ఏ దేశమేగినా ఎందుకాలిడినా ఎవ్వరేమనినా పొగడరా నీ తల్లి భూమి భారతిని నిలుపరా నీ జాతి నిండు గౌరవము తో అనే విధంగా కెనడా నోవా స్కోటియా తెలుగు అసోసియేషన్ కృషి చేస్తుందని తెలిపారు.