*కార్తీక శోభతో విరాజిల్లిన ఏడుపాయల.. వైభవంగా ఆకాశ దీపోత్సవం!*
*వనదుర్గామాత సన్నిధిలో దీపాల వెలుగులు.. కనులపండువగా ఆకాశ దీపోత్సవం!*
వేద న్యూస్, పాపన్నపేట
తెలంగాణలో ప్రసిద్ధ పుణ్యక్షేత్రమైన ఏడుపాయల వనదుర్గామాత ఆలయం కార్తీక శోభతో విరాజిల్లుతోంది. పవిత్ర కార్తీక మాసాన్ని పురస్కరించుకుని ఆదివారం రాత్రి ఆలయ ప్రాంగణంలో ఆకాశ దీపోత్సవ వేడుకలను అత్యంత వైభవంగా నిర్వహించారు.
భక్తిపారవశ్యంలో మునిగిన మంజీరా తీరం:
మంజీరా నదీ తీరాన వెలిసిన అమ్మవారి సన్నిధిలో జరిగిన ఈ వేడుకలకు పరిసర ప్రాంతాల నుంచే కాకుండా వివిధ జిల్లాల నుంచి భక్తులు భారీ సంఖ్యలో తరలివచ్చారు. మహిళా భక్తులు భక్తిశ్రద్ధలతో వేలాది మట్టి ప్రమిదలను వెలిగించి అమ్మవారికి ప్రత్యేక పూజలు నిర్వహించడంతో ఆలయ ప్రాంగణమంతా దీపాల కాంతులతో దేదీప్యమానంగా మెరిసిపోయింది. వేదపండితుల మంత్రోచ్ఛారణలు, మంగళవాయిద్యాలు, భక్తుల ‘జై దుర్గా మాతకు జై’ అనే నామస్మరణతో ఏడుపాయల క్షేత్రం మార్మోగింది.
లోకకల్యాణం కోసం ఆకాశ దీపం:
ఆలయ గోపురం వద్ద ఏర్పాటు చేసిన ప్రత్యేక స్తంభానికి అర్చకులు ఆకాశ దీపాన్ని శాస్త్రోక్తంగా వెలిగించి పైకి ఎగురవేశారు. లోకకల్యాణం, ప్రజల సుఖశాంతుల కోసం ఈ దీపాన్ని ఏర్పాటు చేసినట్లు అర్చకులు తెలిపారు. ఆకాశంలో వెలుగులు విరజిమ్మిన ఈ దీప కాంతులను భక్తులు భక్తిభావంతో వీక్షించి పులకించిపోయారు. తరలివచ్చిన భక్తులకు ఎలాంటి అసౌకర్యం కలగకుండా అధికారులు తగిన ఏర్పాట్లు చేశారు.
ఈ కార్యక్రమంలో ఆలయ అర్చకులు శంకర్ శర్మ, పార్థివ శర్మ, ఆలయ సిబ్బంది సూర్య శ్రీనివాస్, ప్రతాప్ రెడ్డి, సాయిబాబా, మధుసూదన్ రెడ్డిలతో పాటు పెద్ద సంఖ్యలో భక్తులు పాల్గొన్నారు.
